సిద్ధంగా ఉండండి.. ఈ నెల 14 లేదా 15 తేదీల్లో లోక్‌సభ ఎన్నికల నోటిఫికేషన్!

లోక్‌సభ ఎన్నికలకు సంబంధించి కీలక అప్‌డేట్ వచ్చింది. వచ్చే గురువారం లేదా శుక్రవారం రోజున లోక్‌సభ ఎన్నికల షెడ్యూల్ విడుదల కానున్నట్లు సంబంధిత వర్గాల ద్వారా తెలుస్తోంది. ఇప్పటికే దేశవ్యాప్తంగా వివిధ రాష్ట్రాల్లో కేంద్ర ఎన్నికల సంఘం అధికారుల బృందం పర్యటించింది. ఇక సోమవారం నుంచి బుధవారం వరకు కేంద్ర ఎన్నికల సంఘం అధికారులు జమ్మూ కాశ్మీర్‌లో పర్యటించనున్నారు. ఈ క్రమంలోనే ఈ పర్యటన ముగియగానే లోక్‌సభ ఎన్నికల షెడ్యూల్‌ను విడుదల చేసే అవకాశాలు ఉన్నట్లు సదరు వర్గాలు వెల్లడించాయి.

సోమవారం నుంచి నుంచి బుధవారం వరకు కేంద్ర ఎన్నికల బృందం జమ్మూ కాశ్మీర్‌లో పర్యటించనుంది. బుధవారం జమ్మూ కాశ్మీర్‌ పర్యటన ముగియగానే గురువారం లేదా శుక్రవారం రోజున లోక్‌సభ ఎన్నికల షెడ్యూల్‌ను ఎన్నికల సంఘం విడుదల చేసే అవకాశాలు ఉన్నట్లు తెలుస్తోంది. ఇక ఈ ఏడాది సెప్టెంబర్‌లోగా జమ్మూ కాశ్మీర్‌లో అసెంబ్లీ ఎన్నికలు నిర్వహించాలని ఇప్పటికే సుప్రీంకోర్టు కేంద్ర ఎన్నికల సంఘానికి సూచనలు చేసింది. ఈ నేపథ్యంలోనే లోక్‌సభ ఎన్నికలతోపాటే జమ్మూ కాశ్మీర్ అసెంబ్లీకి కూడా ఎన్నికలు నిర్వహించడం సాధ్యం అవుతుందో కాదో పరిశీలించాలని కేంద్ర ఎన్నికల సంఘాన్ని కేంద్ర ప్రభుత్వం కోరింది. ఈ నేపథ్యంలోనే సోమవారం నుంచి బుధవారం వరకు అధికారులు ఆ రాష్ట్రంలో పర్యటించనున్నారు.

  ఇక లోక్‌సభ ఎన్నికల షెడ్యూల్‌ విడుదల చేయడంతోనే దేశవ్యాప్తంగా ఎన్నికల కోడ్‌ అమల్లోకి రానుంది. ఈ నేపథ్యంలోనే పార్టీలు గానీ, కేంద్రంతోపాటు ఆయా రాష్ట్రాల్లో స్థానిక ప్రభుత్వాలు గానీ.. ఎన్నికల హామీలు గానీ, ప్రాజెక్టుల ప్రారంభోత్సవాలు గానీ పూర్తి చేయాల్సి ఉంటుంది. ఇక జమ్మూ కాశ్మీర్లో చివరగా 2014 లో అసెంబ్లీ ఎన్నికలు జరిగాయి. ఆ తర్వాత జమ్మూ కాశ్మీర్‌కు ప్రత్యేక హోదా కల్పించే ఆర్టికల్‌ 370 ని కేంద్ర ప్రభుత్వం 2019 లో రద్దు చేసింది. అనంతరం జమ్మూ కాశ్మీర్ రాష్ట్రాన్ని జమ్మూ కాశ్మీర్‌, లడఖ్‌ అనే రెండు కేంద్రపాలిత ప్రాంతాలుగా విభజించింది.

ఇక ఆర్టికల్‌ 370 రద్దును సవాల్‌ చేస్తూ సుప్రీంకోర్టులో చాలా పిటిషన్లు దాఖలయ్యాయి. గత ఏడాది డిసెంబర్‌లో ఈ పిటిషన్లు అన్నింటిపై విచారణ జరిపిన సుప్రీంకోర్టు.. కీలక తీర్పును వెలువరించింది. ఆర్టికల్‌ 370 ను రద్దు చేస్తూ కేంద్ర ప్రభుత్వం తీసుకున్న నిర్ణయాన్ని సుప్రీంకోర్టు సమర్థించింది. అదేవిధంగా సాధ్యమైనంత త్వరగా జమ్మూ కాశ్మీర్‌కు రాష్ట్ర హోదా కల్పించాలని కేంద్రానికి సూచించింది. అనంతరం జమ్మూ కాశ్మీర్‌లో 2024 సెప్టెంబర్‌లోగా అసెంబ్లీ ఎన్నికలు నిర్వహించాలంటూ కేంద్ర ఎన్నికల సంఘానికి ఆదేశాలు జారీ చేసింది.