సర్కార్ కీలక నిర్ణయం.. నగరంలో ఎలక్ట్రిక్ బైక్ టాక్సీలపై నిషేధం

ప్రస్తుతం ఎక్కడ చూసినా ఎలక్ట్రిక్ బైక్‌లు దర్శనం ఇస్తున్నాయి. పర్యావరణ హితంతోపాటు పెరుగుతున్న పెట్రోల్ ధరల నుంచి ఉపశమనం పొందేందుకు అంతా ఎలక్ట్రిక్ వాహనాల వైపు మళ్లుతున్నారు. ఈ క్రమంలోనే ఎలక్ట్రిక్ బైక్ టాక్సీలు కూడా అందుబాటులోకి వచ్చాయి. అయితే తాజాగా ఎలక్ట్రిక్ బైక్ టాక్సీలపై నిషేధం విధిస్తూ కర్ణాటకలో అధికారంలో ఉన్న సిద్ధరామయ్య సర్కార్ సంచలన నిర్ణయం తీసుకుంది. ఇక నుంచి ఎలక్ట్రిక్ బైక్‌లను టాక్సీలుగా వినియోగించకూడదని స్పష్టం చేసింది. ఎలక్ట్రిక్‌ బైక్‌ ట్యాక్సీలు మహిళలకు సురక్షితంగా లేవని.. అంతే కాకుండా మోటార్ వెహికల్స్ యాక్ట్‌ను ఉల్లంఘిస్తున్నాయని పేర్కొంది. అయితే అంతర్జాతీయ మహిళా దినోత్సవం అయిన మార్చి 8 వ తేదీన కర్ణాటక ప్రభుత్వం ఈ నిర్ణయాన్ని వెల్లడించింది.

ఈ మేరకు 2021 నాటి ఎలక్ట్రిక్‌ బైక్‌ ట్యాక్సీ స్కీమ్‌ను ఉపసంహరించుకుంటున్నట్లు కర్ణాటక ప్రభుత్వం శుక్రవారం ఉత్తర్వులు జారీ చేసింది. కొన్ని యాప్‌ ఆధారిత ప్రైవేటు సంస్థలు.. మోటార్ వెహికల్ యాక్ట్‌ నిబంధనలను ఉల్లంఘించి.. చట్టవ్యతిరేక కార్యకలాపాలకు పాల్పడుతున్నట్లు తమ దృష్టికి వచ్చిందని ప్రభుత్వం ఆ ఉత్తర్వుల్లో పేర్కొంది. ప్రయాణాలకు వీలు కాని ఈ ఎలక్ట్రిక్ బైక్‌లను ట్రాన్స్‌పోర్ట్‌ వాహనాలుగా కూడా కొందరు ఉపయోగిస్తున్నట్లు తేలిందని.. వెల్లడించింది. ఇలా చేయడం వల్ల పన్నులు వసూలు చేయడం కూడా కష్టంగా మారిందని సర్కార్ తెలిపింది.

ఈ సందర్భంగానే ప్రయాణికులతోపాటు ఆటో, క్యాబ్‌ డ్రైవర్లతో.. ఈ ఎలక్ట్రిక్ బైక్‌ రైడర్లు గొడవలు పడుతున్న ఘటనలు చోటు చేసుకున్నాయని సిద్ధరామయ్య ప్రభుత్వం గుర్తించింది. రాష్ట్రంలో శాంతి భద్రతలు, మహిళల రక్షణ దృష్ట్యా ఈ స్కీమ్‌ను రద్దు చేస్తున్నామని ప్రభుత్వం తమ ఉత్తర్వుల్లో స్పష్టం చేసింది. 2021లో అప్పటి బీజేపీ నేతృత్వంలోని బసవరాజ్ బొమ్మై ప్రభుత్వం ఈ ఎలక్ట్రిక్‌ బైక్‌ ట్యాక్సీ సేవలను అమల్లోకి తీసుకువచ్చింది. అయితే అప్పట్లోనే ప్రభుత్వం తీసుకున్న ఈ నిర్ణయాన్ని ఆటో, క్యాబ్‌ యజమానులు, డ్రైవర్లు తీవ్రంగా వ్యతిరేకించారు. వాటిని రద్దు చేయాలని ఆందోళనలకు కూడా దిగారు. మరోవైపు ఈ బైక్‌ ట్యాక్సీల్లో వెళ్లే మహిళలతో రైడర్లు అసభ్య చేష్టలకు పాల్పడిన సంఘటనలు కూడా వెలుగు చూడడంతో తాజాగా కాంగ్రెస్ ప్రభుత్వం ఈ నిర్ణయం తీసుకుంది.