సచివాలయంలో అగ్ని ప్రమాదం.. భారీగా ఎగిసిపడుతున్న మంటలు
national | Suryaa Desk | Published : Sun, Mar 10, 2024, 12:01 AM
మధ్యప్రదేశ్ సెక్రటేరియట్‌లో భారీ ఫైర్ యాక్సిడెంట్ జరిగింది. రాజధాని భోపాల్‌లోని వల్లభ్ భవన్‌లో శనివారం ఉదయం 9:30 గంటలకు ఈ ఘటన చోటు చేసుకుంది. దీంతో వల్లభ్ భవన్ నుంచి భారీగా మంటలు ఎగిసిపడుతున్నాయి. ఉదయాన్నే సచివాలయానికి చేరుకున్న అధికారులు ఫైర్ యాక్సిడెంట్‌ను గుర్తించి పోలీసులు, అగ్నిమాపక సిబ్బందికి సమాచారం అందించారు. దీంతో విషయం తెలుసుకున్న ఫైర్ సిబ్బంది.. ఫైరింజన్లను తీసుకువచ్చి మంటలు ఆర్పివేస్తున్నారు.
వల్లభ్ భవన్‌లోని మూడో అంతస్తులో మంటలు చెలరేగినట్లు అధికారులు, ఉద్యోగులు గుర్తించారు. సచివాలయంలో భారీ అగ్నిప్రమాదం చోటు చేసుకోవడం స్థానికులు, సచివాలయ ఉద్యోగులను తీవ్ర భయందోళనకు గురిచేసింది. అయితే ఒక్కసారిగా ఎగిసిపడిన మంటలను గమనించిన స్థానికులు అక్కడి నుంచి పరుగులు తీశారు. అయితే ఈ ఫైర్ యాక్సిడెంట్‌కు సంబంధించిన పూర్తి వివరాలు తెలియాల్సి ఉంది.
భారీ అగ్ని ప్రమాదం జరగడంతో ఆ ప్రాంతంలో దట్టంగా పొగలు అలముకున్నాయి. ఇక సచివాలయంలో ఎవరైనా ఉద్యోగులు, సిబ్బంది చిక్కుకున్నారా అనే వివరాలు అధికారులు పరిశీలిస్తున్నారు. అగ్ని ప్రమాదానికి చోటు చేసుకోవడానికి గల కారణాలు వెల్లడి కాకపోయినప్పటికీ షార్ట్ సర్క్యూట్ కారణంగానే జరిగి ఉంటుందని అధికారులు ప్రాథమికంగా అనుమానం వ్యక్తం చేస్తున్నారు. ఈ ప్రమాదానికి గల కారణాల కోసం దర్యాప్తు చేస్తున్నారు
|
|