మిస్‌ వరల్డ్ 2024 గా క్రిస్టినా పిస్కోవా.. టాప్-8 లో భారత్‌కు చెందిన సినిశెట్టి

71 వ మిస్ వరల్డ్ పోటీల్లో చెక్ రిపబ్లిక్ దేశానికి చెందిన క్రిస్టినా పిస్కోవా విజేతగా నిలిచి ప్రపంచ సుందరి కిరీటాన్ని దక్కించుకున్నారు. రన్నరప్‌గా లెబనాన్‌కు చెందిన అజైటౌన్‌ నిలిచారు. 28 ఏళ్ల తర్వాత భారత్ వేదికగా జరిగిన ఈ మిస్ వరల్డ్ పోటీలు ముగిశాయి. ముంబైలోని జియో వరల్డ్ కన్వెన్షన్ సెంటర్‌ వేదికగా ఈ మిస్ వరల్డ్ 2024 ఫైనల్ పోటీలు జరిగాయి. మొత్తం ప్రపంచంలోని 112 దేశాలకు చెందిన అందాల భామలు ఈ మిస్ వరల్డ్ 2024 పోటీ పడ్డారు. ఇక ఈసారి భారీ అంచనాలతో మిస్ వరల్డ్ పోటీల్లో నిలిచిన భారత్‌కు నిరాశే ఎదురైంది. భారత్ నుంచి పోటీలో ఉన్న సిని శెట్టి 8 వ స్థానంలో నిలిచారు.

టాప్‌-4 లో క్రిస్టినా పిస్కోవా (చెక్ రిపబ్లిక్), యాస్మిన్‌ అజైటౌన్‌ (లెబనాన్‌), అచే అబ్రహాంస్‌ (ట్రినిడాడ్‌ అండ్‌ టుబాగో), లీసాగో చోంబో (బోట్స్వానా)లు ఉన్నారు. ఇక చివరి వరకు తీవ్ర ఉత్కంఠకు తెరలేపిన ఈ మిస్ వరల్డ్ 2024 పోటీల్లో క్రిస్టినా, అజైటౌన్‌ నిలవగా.. అందులో క్రిస్టినాకే అదృష్టం వరించింది. ఇక మన దేశం నుంచి ప్రాతినిథ్యం వహించిన కన్నడ భామ సినిశెట్టి టాప్‌-8 తో సరిపెట్టుకున్నారు.

కర్ణాటకకు చెందిన సినీ శెట్టి టాప్‌-8 లో నిలిచారు. ఇతర దేశాల భామలకు సినీ శెట్టి గట్టి పోటీ ఇచ్చినా.. అజైటౌన్‌ (లెబనాన్‌) టాప్‌-4 కు ఎంపిక కావడంతో సినీ శెట్టి వెనుదిరక తప్పలేదు. ఇక ఈ కార్యక్రమానికి రిలయన్స్ అధినేత ముఖేష్ అంబానీ సతీమణి నీతా అంబానీ అతిథిగా విచ్చేశారు. ఈ సందర్భంగా ఆమె మిస్‌ వరల్డ్‌ హ్యుమానిటేరియన్‌ అవార్డును అందుకున్నారు. మిస్‌ వరల్డ్‌ ఆర్గనైజేషన్‌ ఛైర్‌ ఉమెన్‌ జూలియా మోర్లీ.. నీతా అంబానీకి మిస్‌ వరల్డ్‌ హ్యుమానిటేరియన్‌ అవార్డును ప్రదానం చేశారు.

దాదాపు 28 సంవత్సరాల తర్వాత ఈ మిస్ వరల్డ్ పోటీలకు భారత్ ఆతిథ్యం ఇచ్చింది. చివరిసారిగా 1996లో భారత్‌లో ఈ ప్రపంచ సుందరి పోటీలు జరగ్గా అందులో గ్రీస్‌కి చెందిన ఇరెనా స్క్లీవా విజేతగా నిలిచారు. అప్పుడు భారత్ టాప్ 5 లో నిలిచింది. 1951లో యునైటెడ్ కింగ్‌డమ్‌లో మిస్ వరల్డ్ పోటీలను ఎరిక్ మోర్లీ ప్రారంభించారు. అప్పటి నుంచి ఈ పోటీలు ప్రపంచవ్యాప్తంగా వివిధ దేశాల్లో నిర్వహిస్తూ ఉన్నారు. మొదటి సారి నిర్వహించిన మిస్ వరల్డ్ పోటీల్లో స్వీడన్‌కు చెందిన కెర్‌స్టిన్ కికీ హకాన్సన్ విజేతగా నిలిచి ప్రపంచ సుందరి కిరీటాన్ని అందుకున్నారు.