మీ ఫోన్ పోయిందా.. నో వర్రీ.. ఇలా చేస్తే మీ ఫోన్ మళ్లీ మీ చేతిలోకి

నేటి ప్రపంచంలో ఫోన్ లేనిదే పూట గడవదు. ఒక్క పూట భోజనం లేకపోయినా బతకగలరేమో కానీ.. అరచేతిలో సెల్ ఫోన్ లేనిదే బతకడం కష్టమైన పరిస్థితి. బ్యాంకు లావాదేవీల నుంచి భోజనం వరకూ ప్రతిదీ ఫోన్ మీదనే ఆధారపడి ఉన్న స్థితి. అయితే ఒక్కసారిగా మీ చేతిలోని ఫోన్ మాయమైతే.. వేలు పోసి కొన్న మీ ఫోన్ పోతే .. మీ పరిస్థితి ఏంటీ? ప్రపంచం మొత్తం స్తంభించిపోయిన ఫీలింగ్ కదూ. కానీ ఇకపై మీకు ఆ చింత అక్కర్లేదు. మీ ఫోన్ పోయినా.. మేమున్నాం అంటున్నారు ఎన్టీఆర్ జిల్లా పోలీసులు. పోగోట్టుకున్న మీ ఫోన్ తెచ్చివ్వడం మా గ్యారెంటీ అని అంటున్నారు.

ఎన్టీఆర్ కృష్ణా జిల్లా ప్రజలకు పోలీసులు గుడ్ న్యూస్ వినిపించారు. ఫోన్ పోగొట్టుకున్న బాధితుల కోసం కొత్త విధానం ప్రారంభించారు. ప్రజల కోసం చాట్ బాట్ సేవలను అందుబాటులోకి తెచ్చారు ఎన్టీఆర్ జిల్లా పోలీసులు. సిటిజన్ ఫ్రెండ్లీ పోలీసింగ్‌లో భాగంగా 2023 జూన్‌లో చాట్ బాట్ సేవలు తీసుకువచ్చారు. ఈ విధానం ద్వారా ఫోన్ పోగొట్టుకున్న బాధితుల నుంచి ఫిర్యాదులు తీసుకుని వారికి ఫోన్లు అందించారు. ఇప్పటి వరకు 5,240 మొబైల్స్ మిస్సింగ్ ఫిర్యాదులు అందుకున్న ఎన్టీఆర్ జిల్లా పోలీసులు..

ఎవరైనా ఫోన్ పోగొట్టుకుంటే వెంటనే పోలీసులు ఏర్పాటు చేసిన చాట్ బాట్ వాట్సాప్ నంబర్ “94406 27057” కు హాయ్ అని మెసేజ్ పంపాలి. ఆ తర్వాత మీకో గూగుల్ పేజీ లింక్ వస్తుంది. ఆ లింక్ మీద క్లిక్ చేసి పోయిన ఫోన్ వివరాలను తెలియజేయాలి . ఈ సమాచారం ఆధారంగా టెక్నాలజీని ఉపయోగించి పోయిన ఫోన్ జాడను గుర్తించి రికవరీ చేస్తామని పోలీసులు చెబుతున్నారు. ఫోన్ పోగొట్టుకుంటే వీలైనంత త్వరగా సమాచారం అందించాలని చెబుతున్నారు. దీనివల్ల ఫోన్ రికవరీ ఛాన్సులు పెరగడంతో పాటుగా మీ డేటా కూడా చోరీకి గురికాకుండా జాగ్రత్తలు తీసుకోవచ్చని సూచిస్తున్నారు.