'చంద్రబాబు చుట్టూ జగన్ కోవర్టులు'.. టీడీపీ లీడర్ సంచలన వ్యాఖ్యలు

అభ్యర్థుల ప్రకటనతో టీడీపీలో చెలరేగిన అసమ్మతి చల్లారడం లేదు. టికెట్లు దక్కని నేతలు అధిష్టానం తీరుపై మండిపడుతున్నారు. తమ నేతలకు మద్దతుగా వారి అనుచరులు సైతం రోడ్డెక్కుతున్నారు. జెండాలు, ఫ్లెక్సీలు తగలబెడుతూ నానా బీభత్సం సృష్టిస్తున్నారు. కర్నూలు జిల్లా మంత్రాలయం టీడీపీలోనూ ఇలాంటి పరిస్థితే నెలకొంది. టికెట్ తనకు ఇవ్వకపోవటంతో మంత్రాలయం టీడీపీ ఇంఛార్జి తిక్కారెడ్డి భగ్గుమన్నారు. ఆయన మద్దతుదారులు మంత్రాలయంలో నిరసనకు దిగారు. పార్టీ కోసం ఇన్నిరోజులుగా కష్టపడుతున్న ఆయనకు కాకుండా రాఘవేంద్రరెడ్డికి టికెట్ ఇవ్వటంపై మండిపడుతున్నారు. అధినేత తన నిర్ణయాన్ని పునరాలోచించుకోవాలని కోరుతున్నారు.

ఈ క్రమంలోనే తిక్కారెడ్డి అనుచరులు, కార్యకర్తలతో శుక్రవారంఆత్మీయ సమావేశం నిర్వహించారు. ఈ సందర్భంగా చంద్రబాబుపై సంచలన వ్యాఖ్యలు చేశారు. చంద్రబాబు చుట్టూ జగన్ కోవర్టులు చేరారని తిక్కారెడ్డి ఆరోపించారు. వారి కారణంగానే తనకు టికెట్ రాలేదని ఆవేదన్ వ్యక్తం చేశారు. మంత్రాలయం టికెట్ విషయంలో చంద్రబాబు మరోసారి ఆలోచించుకోవాలని.. తనకు టికెట్ ఇవ్వకపోతే ఇండిపెండెంట్‌గా బరిలోకి దిగుతానని స్పష్టం చేశారు.

" చంద్రబాబు కార్యాలయంలో వైసీపీ ఎమ్మెల్యే బాలనాగిరెడ్డి బ్రోకర్లు ఉన్నారు. చంద్రబాబు చుట్టూ ఉన్నోళ్లు డబ్బులకు అమ్ముడుపోయారు. అంతా వైఎస్ జగన్‍‌కు కోవర్టులుగా పనిచేస్తున్నారు. లేకపోతే మూడు నెలల క్రితమే మంత్రాలయం టీడీపీ టికెట్ బీసీకి వస్తుందని బాలనాగిరెడ్డి ఎలా చెప్పగలిగారు?. బాలనాగిరెడ్డికి కోవర్టుగా రాఘవేంద్రరెడ్డి పనిచేస్తున్నారు. రాఘవేంద్రరెడ్డికి ఓటువేస్తే బాలనాగిరెడ్డికి వేసినట్లే. టికెట్ విషయంలో చంద్రబాబు పునరాలోచించుకోవాలి. లేకుంటే ఇండిపెండెంట్‌గా పోటీ చేస్తా. ఐదొందల వాహనాలతో చంద్రబాబు ఎదుట బలప్రదర్శన చేస్తా" అని తిక్కారెడ్డి అన్నారు.

మరోవైపు తిక్కారెడ్డి 2019 ఎన్నికల్లో మంత్రాలయం నుంచి టీడీపీ అభ్యర్థిగా పోటీ చేసి ఓడిపోయారు. వైసీపీ అభ్యర్థి బాలనాగిరెడ్డి.. తిక్కారెడ్డి మీద గెలుపొందారు. అయితే 2014 ఎన్నికల్లో బాలనాగిరెడ్డి టీడీపీ నుంచి ఎమ్మెల్యేగా గెలుపొందడం విశేషం. అయితే 2019 ఎన్నికల్లో ఓడిపోయిన తిక్కారెడ్డికి టీడీపీ టికెట్ నిరాకరించింది. ఆయన స్థానంలో ఈసారి రాఘవేంద్రరెడ్డికి అవకాశం కల్పించింది. ఈ నేపథ్యంలోనే టికెట్ విషయంలో అధిష్టానం మరోసారి ఆలోచించాలని తిక్కారెడ్డి హెచ్చరిస్తున్నారు.