చాలెంజ్‌ నిలబెట్టుకున్న మాజీ డ్రైవర్‌
Andhra Pradesh Telugu | Suryaa Desk | Published : Sun, Mar 17, 2024, 01:24 PM
శ్రీసత్యసాయి జిల్లా పుట్టపర్తి ఎమ్మెల్యే శ్రీధర్‌ రెడ్డికి మళ్లీ వైసీపీ టికెట్‌ ఇవ్వడాన్ని నిరసిస్తూ.. ఆయన మాజీ డ్రైవర్‌ సజ్జల మహేశ్వర్‌ రెడ్డి అరగుండు, అర మీసం గీయించుకున్నారు. పుట్టపర్తిలోని సత్తెమ్మ ఆలయం ఎదుట.. నడిరోడ్డుపై శనివారం ఆయన నిరసన తెలిపారు. ప్రభుత్వ సలహాదారు సజ్జల రామకృష్ణారెడ్డి సమీప బంధువు, కడప జిల్లా తొండూరు మండలం టి.తుమ్మలపల్లికి చెందిన సజ్జల మహేశ్వర్‌ రెడ్డి గతంలో ఎమ్మెల్యే శ్రీధర్‌ రెడ్డి వద్ద వాహన డ్రైవర్‌గా పనిచేశారు. శ్రీధర్‌ రెడ్డికి మళ్లీ వైసీపీ టికెట్‌ వస్తే తాను అరగుండు గీయించుకుని, అర మీసం తీయించుకుంటానని నెల కిందట మహేశ్వరరెడ్డి చాలెంజ్‌ చేశారు. శనివారం వైసీపీ ప్రకటించిన జాబితాలో శ్రీధర్‌ రెడ్డి పేరు ఉండటంతో మహేశ్వరరెడ్డి.. సత్తెమ్మ ఆలయం వద్దకు వెళ్లి.. రోడ్డుపై కూర్చుని అరగుండు, అరమీసం గీయించుకున్నారు. ఈ సందర్భంగా మహేశ్వరరెడ్డి మాట్లాడుతూ.. ‘శ్రీధర్‌ రెడ్డికి టికెట్‌ ఇవ్వడాన్ని జీర్ణించుకోలేకపోతున్నా. ఆయనకు ఓటు వేస్తే ప్రజలకు ఒరిగేదేమీ లేదు. ఆయన డ్రైవర్‌గా 23 ఏళ్లపాటు పని చేసిన నేను.. పడిన అవమానాలు, ఇబ్బందులు అన్నీ ఇన్నీ కావు. శ్రీధర్‌రెడ్డికి మరోసారి ఎమ్మెల్యే అయితే నియోజకవర్గం అధోగతిపాలవుతుంది. ఆయన స్వార్థానికి అందరూ బలైపోయారు. ఇలాంటి వ్యక్తికి ఓట్లు వేయొద్దని ప్రజలు, వైసీపీ శ్రేణులకు విన్నవిస్తున్నా. సీఎం జగన్ 175కి 175 గెలవాలని అంటున్నారు. ఈ ఒక్కచోట ఓడిపోయినా ఏమీ కాదు. శ్రీధర్‌ రెడ్డిని ఓడించండి’ అని పిలుపునిచ్చారు.
|
|