ఏపీకి వాతావరణశాఖ హెచ్చరిక.. ఈ జిల్లాల్లో భారీ వర్షాలు, పిడుగులు పడే అవకాశం

ఆంధ్రప్రదేశ్ ప్రజల్ని విపత్తుల నిర్వహణ సంస్థ అప్రమత్తం చేసింది. రాష్ట్రవ్యాప్తంగా రెండు రోజుల పాటూ భారీ వర్షాలు కురిసే అవకాశం ఉందని అంచనా వేస్తోంది. ‘దక్షిణ తమిళనాడు నుంచి అంతర్గత కర్ణాటక మీదుగా.. పశ్చిమ విదర్భ, పొరుగు ప్రాంతాలపై ఉన్న ఉపరితల ఆవర్తనం వరకు ఒక ద్రోణి విస్తరించి ఉంది. ఝార్ఖండ్‌ నుంచి ఒడిశా మీదుగా రాష్ట్రంలోని ఉత్తర కోస్తా వరకు మరో ద్రోణి వ్యాపించింది. ఈ ప్రభావంతో కోస్తాంధ్రలో వర్షాలు పడే అవకాశం ఉందని ఏపీ విపత్తుల నిర్వహణ సంస్థ వెల్లడించింది.

ద్రోణి ప్రభావంతో ఇవాళ, రేపు అల్లూరి సీతారామరాజు, కోనసీమ, తూర్పుగోదావరి, ఏలూరు, కృష్ణా, గుంటూరు, బాపట్ల, పల్నాడు, ప్రకాశం జిల్లాల్లో అక్కడక్కడ పిడుగులతో కూడిన మోస్తరు వర్షాలు అలాగే మిగిలినచోట్ల తేలికపాటి వర్షం పడే అవకాశం ఉందని తెలిపింది. బుధవారం (మార్చి 20న) కోస్తాంధ్ర ప్రాంతంలో భారీ వర్షాలు పడే అవకాశం ఉందని ఐఎండీ పేర్కొంది. కోస్తాంధ్ర జిల్లాల్లో 6 నుంచి 12 సెం.మీ. వర్షం పడే అవకాశం ఉన్నట్లు అంచనా వేస్తున్నారు.

మరోవైపు శ్రీకాకుళం, విజయనగరం, పార్వతీపురంమన్యం, విశాఖపట్నం, అనకాపల్లి, కాకినాడ, పశ్చిమగోదావరి, ఎన్టీఆర్, నెల్లూరు మరియు తిరుపతి జిల్లాల్లో అక్కడక్కడ పిడుగులతో కూడిన తేలికపాటి నుంచి మోస్తరు వర్షాలు పడే అవకాశం ఉందన్నారు. ప్రజలు, రైతులు అప్రమత్తంగా ఉండాలని.. దయచేసి వ్యవసాయ పనుల్లో తగు జాగ్రత్తలు తీసుకోవాలని సూచించారు. ఉరుములు మెరుపులతో కూడిన వర్షం పడేటప్పుడు చెట్లు, టవర్స్, పోల్స్ క్రింద ఉండొద్దని.. పొలాలు ,ఇతర బహిరంగ ప్రదేశాల్లో ఉండరాదన్నారు. సురక్షితమైన భవనాల్లో ఆశ్రయం పొందాలన్నారు.

ఫిబ్రవరి నెల నుంచే ఏపీలో ఎండలు మండిపోతున్నాయి. ఎండ తీవ్రతతో జనాలు ఇళ్లలో నుంచి బయటకు వెళ్లాలంటే భయపడే పరిస్థితులు కనిపించాయి. రాబోయే రోజుల్లో ఎండలు, వేడి గాలుల తీవ్రత దారుణంగా ఉంటుందని వాతావరణశాఖ అంచనా వేసింది. ఇంతలో ఎండల తీవ్రత నుంచి కాస్త ఉపశమనం ఇస్తూ ఇలా వర్షాలు కురుస్తాయని వాతావరణశాఖ శుభవార్త చెప్పింది. కోస్తాతో పాటూ ఉత్తరాంధ్రలో మాత్రమే వర్షాలకు అవకాశం ఉందని.. రాయలసీమలో వాతావరణం దాదాపు పొడిగానే ఉంటుందని అంచనా వేస్తున్నారు.

మరోవైపు తెలంగాణలో కూడా వర్షాలు పడతాయని వాతావరణశాఖ అంచనా వేస్తోంది. రాష్ట్రంలో ఓ మోస్తరు వర్షాలు కురుస్తాయని .. పలు జిల్లాల్లో ఉరుములు, మెరుపులతోపాటు ఈదురుగాలులతో కూడిన వర్షాలు కురిసే అవకాశాలు ఉన్నట్లు తెలిపారు. కొన్ని జిల్లాల్లో గంటకు 30 నుంచి 40 కిలోమీటర్ల వేగంతో గాలులు వీస్తాయని తెలిపింది. హైదరాబాద్‌, రంగారెడ్డి, మేడ్చల్‌, మల్కాజ్‌గిరి, మెదక్‌, సంగారెడ్డి, కామారెడ్డి, ఆదిలాబాద్‌, కుమ్రంభీం ఆసిఫాబాద్‌, మంచిర్యాల, నిర్మల్‌, జగిత్యాల, రాజన్న సిరిసిల్ల, పెద్దపల్లి, జయశంకర్‌ భూపాలపల్లి, ములుగు, నల్లగొండ, వికారాబాద్‌, వనపర్తి, నాగర్‌ కర్నూల్‌, జోగులాంబ గద్వాల, నారాయణపేట జిల్లాల్లో వానలు కురుస్తాయని వాతావరణ శాఖ తెలిపింది. సోమవారం పలు జిల్లాలతో పాటూ హైదరాబాద్‌లోని పలు ప్రాంతాల్లో ఓ మోస్తరు వర్షాలు పడిన సంగతి తెలిసిందే.