బహిరంగసభలో భావోద్వేగానికి గురైన మోదీ.. ప్రసంగాన్ని ఆపి మరీ ఎమోషనల్

సార్వత్రిక ఎన్నికల్లో బీజేపీ ప్రచార బాధ్యతలు తన భుజాలపైకి ఎత్తుకున్న ప్రధాని నరేంద్ర మోదీ.. దేశవ్యాప్తంగా విస్తృత పర్యటనలు చేస్తూ ర్యాలీలు, బహిరంగ సభలు, సమావేశాలు నిర్వహిస్తున్నారు. ఈ క్రమంలోనే ఒక్కోరోజు 2, 3 రాష్ట్రాల్లో సుడిగాలి పర్యటనలు చేస్తూ ఉన్నారు. ఈ నేపథ్యంలోనే తాజాగా తమిళనాడులోని సేలంలో నిర్వహించిన భారీ బహిరంగ సభలో పాల్గొన్న ప్రధాని మోదీ.. తమిళ ప్రజలను ఉద్దేశించి ప్రసంగించారు. ఈ సందర్భంలోనే ప్రధాని తీవ్ర భావోద్వేగానికి గురయ్యారు. ప్రసంగం చేస్తున్న ప్రధాని దాన్ని ఆపి మరీ ఎమోషనల్ అయ్యారు. దానికి కారణం గతంలో తమిళనాడు బీజేపీ నేత హత్యకు గురికాగా.. ఆ విషయాన్ని గుర్తు చేసుకుని ప్రధాని భావోద్వేగానికి గురయ్యారు. ఈ సందర్భంగా ఆయన చేసిన సేవలను కొనియాడారు.

తమిళనాడులోని సేలం జిల్లాలో మంగళవారం నిర్వహించిన బహిరంగ సభలో మాట్లాడుతూ ప్రధాని భావోద్వేగం చెందారు. 11 ఏళ్ల క్రితం సేలం జిల్లాలో హత్యకు గురైన బీజేపీ నేత వి.రమేశ్‌ను గుర్తుచేసుకున్నారు. ఈ సందర్భంగానే వి. రమేశ్ గురించి చెబుతూ ఎమోషనల్ అయి.. తన ప్రసంగాన్ని ఆపేశారు. దీంతో ఆ బహిరంగసభలో కొన్ని సెకన్ల పాటు నిశ్శబ్దం అలుముకుంది. అనంతరం కొద్దిసేపు తర్వాత తన ప్రసంగాన్ని తిరిగి ప్రారంభించారు. దీనికి సంబంధించిన వీడియో ప్రస్తుతం సోషల్ మీడియాలో తెగ వైరల్ అవుతోంది. బీజేపీ కార్యకర్తల సేవలను నరేంద్ర మోదీ గుర్తుంచుకుంటారు అనడానికి ఇదే పెద్ద ఉదాహరణ.

  ఆడిటర్‌ రమేశ్‌ను తాను ఎప్పటికీ మర్చిపోలేనని ప్రధాని మోదీ తెలిపారు. ప్రస్తుతం రమేశ్ మనతో లేరని.. కానీ ఆయన ఒక గొప్ప వక్త అని కొనియాడారు. రాత్రి పగలు పార్టీ కోసం ఎంతో కష్టపడి పని చేసేవారని గుర్తు చేసుకున్నారు. కానీ రమేశ్ హత్యకు గురి కావడం జీర్ణించుకోలేకపోతున్నానని భావోద్వేగానికి గురయ్యారు. ఈ సందర్భంగా బహిరంగ సభ సాక్షిగా వి.రమేశ్‌కు తాను నివాళి అర్పిస్తున్నానని ప్రధాని మోదీ చెప్పారు. దీంతో ప్రధాని చేసిన పనికి అక్కడ హర్షాతిరేకాలు వ్యక్తం అయ్యాయి. సభలో పాల్గొన్న కార్యకర్తలు, అభిమానులు మోదీ మోదీ నినాదాలతో హోరెత్తించారు.

ఆడిటర్‌గా పనిచేసే వి.రమేశ్‌ గతంలో తమిళనాడు రాష్ట్ర బీజేపీ ప్రధాన కార్యదర్శిగా పని చేశారు. 2013 జులై నెలలో రమేశ్‌ను ఆయన ఇంట్లోనే గుర్తు తెలియని వ్యక్తులు అతి దారుణంగా హత్య చేశారు. ఈ ఘటన అప్పట్లో తమిళనాడు రాజకీయాల్లో తీవ్ర చర్చనీయాంశంగా మారింది. ఇక ఇదే సేలం సభలో మరో బీజేపీ నాయకుడు కేఎన్‌ లక్ష్మణన్‌ సేవలను కూడా ప్రధాని నరేంద్ర మోదీ గుర్తు చేసుకున్నారు. తమిళనాడులో బీజేపీ బలపడేందుకు కేఎన్ లక్ష్మణన్ ఎంతో కృషి చేశారని ప్రశంసలు గుప్పించారు. ఇక తమిళనాడులో అధికారంలో ఉన్న డీఎంకేతోపాటు కాంగ్రెస్‌ పార్టీలపై ప్రధాని మోదీ తీవ్ర విమర్శలు చేశారు. ఇండియా కూటమి పార్టీలు మహిళలు, హిందుత్వాన్ని అవమానిస్తున్నాయని ఆరోపించారు. తమిళనాడు సహా దేశవ్యాప్తంగా ఆ కూటమిని ప్రజలు ఓడిస్తారని ప్రధాని నరేంద్ర మోదీ అన్నారు.