వైజాగ్‌లో 25 వేల కిలోల డ్రగ్స్ కేసు .. కాకినాడ జిల్లాతో లింకులు.. సీబీఐ తనిఖీలు

ఎన్నికల వేళ ఆంధ్రప్రదేశ్ వ్యాప్తంగా సంచలనం సృష్టించిన విశాఖ డ్రగ్స్ వ్యవహారంలో సీబీఐ అధికారులు దూకుడు పెంచారు. కాకినాడ జిల్లాలో తనిఖీలు చేపట్టారు. బ్రెజిల్ నుంచి విశాఖకు వచ్చిన ఓ కంటైనర్‌లో సుమారు 25 వేల కేజీల డ్రగ్స్‌ను సీబీఐ అధికారులు స్వాధీనం చేసుకున్నారు. ఇంటర్ పోల్ అధికారుల సమాచారంతో దాడి చేసిన సీబీఐ అధికారులు.. 25 వేల కేజీల డ్రగ్స్‌ను స్వాధీనం చేసుకున్నారు. ఈ కంటైనర్ సంధ్య ఆక్వా ఎక్స్‌పోర్ట్స్ ప్రైవేట్ లిమిటెడ్ పేరుతో బుక్ అయినట్లు సీబీఐ అధికారులు గుర్తించారు. ఈ నేపథ్యంలోనే సంధ్య ఆక్వా ఎక్స్‌పోర్ట్స్‌కు సంబంధించి పలుచోట్ల తనిఖీలు నిర్వహిస్తున్నారు. ఈ క్రమంలోనే కాకినాడ జిల్లా యు. కొత్తపల్లి మండలం మూలపేటలో ఉన్న సంధ్య ఆక్వా ఎక్స్‌పోర్ట్స్ కంపెనీలో సీబీఐ బృందం తనిఖీలు చేపట్టింది.

శుక్రవారం ఉదయం నుంచి ఏడుగురు సీబీఐ అధికారులు సంధ్య ఆక్వా ఎక్స్‌పోర్ట్స్ పరిశ్రమలో తనిఖీలు చేపట్టారు. కంపెనీ సిబ్బందిని, కూలీలను అడిగి వివరాలు తెలుసుకున్నారు. అలాగే వైజాగ్ నుంచి ఫోరెన్సిక్‌ బృందాన్ని రప్పించారు. ల్యాబ్‌లో ఉన్న వివిధ శాంపిల్స్ సేకరించి విశాఖపట్నానికి తీసుకెళ్లినట్లు సమాచారం. కాకినాడతో పాటుగా ఒంగోలు, నెల్లూరు, ప్రకాశం, పశ్చిమగోదావరి జిల్లాలలో ఉన్న సంధ్య ఆక్వా కంపెనీల్లో సోదాలు జరుగుతున్నట్లు తెలుస్తోంది. మరోవైపు వైజాగ్‌లో దొరికి 25 వేల కిలోల డ్రగ్స్ వ్యవహారం రాజకీయ రంగు పులుముకుంది. ఈ డ్రగ్స్‌తో మీకంటే మీకు సంబంధం ఉందని వైసీపీ, టీడీపీ పరస్పర ఆరోపణలు గుప్పించుకుంటున్నాయి. ఎన్నికల వేళ ఇంతమొత్తంలో డ్రగ్స్ కంటైనర్ పట్టుబడటం ఇప్పుడు ఏపీ అంతటా హాట్ టాపిక్‍‌గా మారింది. ఎన్నికల్లో డబ్బు కోసమే డ్రగ్స్ తరలిస్తున్నారంటూ పార్టీలు ఆరోపించుకుంటున్నాయి.