తిరుమల శ్రీవారి భక్తులకు శుభవార్త.. దర్శనం, వసతి గదులు బుక్ చేస్కోండి

తిరుమల శ్రీవారి భక్తులకు ముఖ్యమైన గమనిక. జూన్ నెలకు సంబంధించిన దర్శనం టికెట్లు, వసతి గదుల్ని టీటీడీ విడుదల చేస్తోంది. ఈ నెల 23 (శనివారం)న ఉద‌యం 10 గంట‌లకు అంగ‌ప్ర‌ద‌క్షిణం టోకెన్లు అందుబాటులో ఉంటాయని టీటీడీ తెలిపింది. అంతేకాదు అదే రోజు (మార్చి 23)న ఉద‌యం 11 గంట‌లకు శ్రీ‌వాణి ట్ర‌స్టు దాత‌ల ద‌ర్శ‌నం, గ‌దుల కోటాను కూడా విడుదల చేస్తారు. శనివారం మధ్యాహ్నం 3 గంటలకు వృద్ధులు, దివ్యాంగుల ద‌ర్శ‌న‌టికెట్ల కోటాను విడుద‌ల చేస్తారు. ఈ విషయాన్ని గమనించాలని టీటీడీ సూచించింది.

 మరోవైపు మార్చి 25 (సోమవారం)న ఉద‌యం 10 గంట‌లకు తిరుమల శ్రీవారి రూ.300 ప్ర‌త్యేక ప్ర‌వేశ ద‌ర్శ‌న టికెట్లను ఆన్‌లైన్‌లో అందుబాటులో ఉంచుతారని టీటీడీ తెలిపింది. అదే రోజు (సోమవారం) మ‌ధ్యాహ్నం 3 గంట‌లకు తిరుమ‌ల‌, తిరుప‌తిలోని గ‌దుల కోటాను కూడా టీటీడీ విడుదల చేస్తుంది. ఈ నెల 27 (బుధవారం)న ఉద‌యం 11 గంట‌లకు తిరుమ‌ల‌, తిరుప‌తిలోని శ్రీ‌వారి సేవ కోటాను టీటీడీ అందుబాటులోకి తీసుకొస్తుంది. అదేరోజున మ‌ధ్యాహ్నం 12 గంట‌ల‌కు న‌వ‌నీత సేవ కోటాతో పాటుగా.. మ‌ధ్యాహ్నం 1 గంట‌ల‌కు ప‌ర‌కామ‌ణి సేవ కోటాను ఆన్‌లైన్‌లో విడుదల చేస్తామని టీటీడీ తెలిపింది. భక్తులు తమ టికెట్లను టీటీడీ వెబ్‌సైట్

https://ttdevasthanams.ap.gov.in ద్వారా బుక్ చేసుకోవాలని సూచించారు అధికారులు.

తిరుచానూరు ఆలయంలో క్యూకాంప్లెక్సు పనుల ప్రారంభం

తిరుమల శ్రీవారి దేవేరి పద్మావతీ దేవి కొలువైన తిరుచానూరులో అత్యాధునిక క్యూకాంప్లెక్సు పనులు ప్రారంభమయ్యాయి. తిరుచానూరు ఆలయానికి భక్తుల సంఖ్య పెరుగుతుండడంతో గతేడాది ఆగస్టులో టీడీపీ పాలకమండలి రూ.23కోట్ల వ్యయంతో తిరుమల తరహాలో అత్యాధునిక క్యూకాంప్లెక్సు నిర్మాణానికి ఆమోదం తెలిపిన విషయం తెలిసిందే.గత నెల క్యూకాంప్లెక్సు టెండర్‌ను దక్కించుకున్న కంపెనీ పనులు ప్రారంభించింది. పాత డిప్యూటీ ఈవో కార్యాలయ భవన సముదాయంలో ఈ క్యూకాంప్లెక్సును నిర్మించనున్నారు. ఇందులో భాగంగా మూడు రోజులుగా 0.75ఎకరాల విస్తీర్ణంలో ఉన్న పాత డిప్యూటీ ఈవో కార్యాలయం, కల్యాణమండపం సముదాయాన్ని తొలగిస్తున్నారు.

క్యూకాంప్లెక్సు నిర్మాణానికి సుమారు ఏడాదికి పైగా పడుతుందని టీటీడీ ఇంజనీరింగ్‌శాఖ అధికారులు తెలిపారు. తిరుమల తరహాలో క్యూకాంప్లెక్సులో ప్రవేశించిన భక్తులు అన్ని సేవలూ అక్కడే పొంది ప్రత్యేక క్యూలైను ద్వారా అమ్మవారి దర్శనం చేసుకుని బయటకు వచ్చేలా క్యూకాంప్లెక్సు నిర్మాణం జరుగుతుందని తెలిపారు.మూడంతస్తులతో క్యూకాంప్లెక్సు నిర్మాణం జరగనుంది. సెల్లార్‌లో లాకర్లు, మొబైల్స్, పాదరక్షల కౌంటర్లు, ప్రథమ చికిత్స కేంద్రాలతో పాటు అమ్మవారి దర్శనానికి వెళ్లే భక్తులకు టికెట్‌ కౌంటర్లు, సెక్యూరిటీ పాయింట్‌ అందుబాటులోకి వస్తాయి. గ్రౌండ్‌ ఫ్లోర్‌లో వెయిటింగ్‌ హాల్‌, కల్యాణకట్ట రానున్నాయి. ఇంకో అంతస్తులో క్యూలైన్‌, వెయిటింగ్‌ హాల్‌ వస్తాయి.

నాలుగో గేట్‌ దగ్గర నిర్మించనున్న ఈ క్యూకాంప్లెక్సులోకి భక్తులు ప్రవేశించిన తర్వాత లగేజీలను అక్కడే భద్రపరచుకుని ప్రత్యేక క్యూలైన్ల ద్వారా దర్శనానికి వెళతారు. ఇక తిరుమల మాడ వీధుల్లో ఉండే మూవింగ్‌ బ్రిడ్జి తరహాలో కదిలే వంతెనను కూడా పాత పోలీస్ స్టేషన్ దగ్గర నిర్మించనున్నారు. అమ్మవారి ఉత్సవాల సమయంలో వాహనసేవలకు ఎలాంటి ఇబ్బంది లేకుండా భక్తులు నూతన క్యూకాంప్లెక్సు నుంచి కదిలే వంతెన ద్వారా పుష్కరిణి పక్కనే ఏర్పాటు చేయనున్న క్యూలైను ద్వారా ఆలయం వెలుపల ఉన్న ప్రాకారం గుండా ఇపుడున్న క్యూలైన్‌లోకి ప్రవేశించనున్నారు.