ఏప్రిల్ 17 నుంచి ఒంటిమిట్ట కోదండరామస్వామి బ్రహ్మోత్సవాలు.. ఆ రోజే సీతారాముల కళ్యాణం

రామభక్తులకు శుభవార్త. వైఎస్ఆర్ జిల్లా ఒంటిమిట్టలోని శ్రీకోదండరామస్వామి ఆలయంలో ఏప్రిల్ నెలలో బ్రహ్మోత్సవాలు నిర్వహించనున్నారు. ఏప్రిల్ 17 నుంచి 25వ తేదీ వరకూ ఒంటిమిట్ట కోదండరామస్వామి బ్రహ్మోత్సవాలు జరగనున్నాయి. బ్రహ్మోత్సవాల్లో భాగంగా ఏప్రిల్ 22వ తేదీ సాయంత్రం 6.30 నుంచి రాత్రి 8.30 గంట‌ల వ‌ర‌కు శ్రీ సీతారాముల క‌ల్యాణం అత్యంత వైభ‌వంగా నిర్వహించనున్నారు. ఈ విషయాన్ని టీటీడీ జేఈవో వీర‌బ్రహ్మం వెల్లడించారు. బ్రహ్మోత్సవాల ఏర్పాట్లపై టీటీడీ జేఈవో సోమవారం ఒంటిమిట్టలో వైఎస్ఆర్ జిల్లా కలెక్టర్ విజయరామరాజు, జిల్లా ఎస్పీ సిద్ధార్థ్ కౌశిల్, జిల్లా యంత్రాంగంతో సమీక్ష నిర్వహించారు.

టీటీడీలోని అన్ని విభాగాలు, జిల్లా యంత్రాంగం, పోలీసులు స‌మష్టిగా పనిచేసి కోదండరామస్వామి బ్రహ్మోత్సవాలను విజయవంతం చేయాలని జేఈవో వీరబ్రహ్మం కోరారు. గతంలో ఏవైనా పొరపాట్లు, లోటుపాట్లు జరిగి ఉంటే వాటిని సవరించుకుని, అన్ని విభాగాలు సమన్వయంతో పనిచేసి స్వామివారి కళ్యాణాన్ని ఘనంగా నిర్వహించాలని సూచించారు. కోదండరామస్వామి బ్రహ్మోత్సవాలకు ఏప్రిల్ 16న అంకురార్పణ జరగనుంది. ఏప్రిల్ 17న శ్రీరామనవమి రోజు స్వామివారి బ్రహ్మోత్సవాలు ప్రారంభం అవుతాయి. ఏప్రిల్ 20న హనుమంత వాహనం, ఏప్రిల్ 21న గరుడ వాహనం, ఏప్రిల్ 22న సీతారాముల కళ్యాణం, ఏప్రిల్ 23న రథోత్సవం, ఏప్రిల్ 25న చక్రస్నానం, ఏప్రిల్ 26న పుష్పయాగం నిర్వహిస్తారు.

మరోవైపు శ్రీ సీతారాముల కల్యాణానికి వచ్చే భక్తులకు ఎలాంటి అసౌకర్యం కలగకుండా టీటీడీ , జిల్లా యంత్రాంగం ఏర్పాట్లు చేస్తున్నట్లు వైఎస్ఆర్‌ జిల్లా కలెక్టర్ విజయరామరాజు తెలిపారు. భద్రత, పార్కింగ్, అన్నప్రసాదాల పంపిణీ, తాత్కాలిక మరుగుదొడ్లతో పాటుగా.. నిరంతర విద్యుత్ సరఫరా, ప్రథమ చికిత్స కేంద్రాలు, ఆర్టీసీ బస్సులు, సైన్ బోర్డులు, పారిశుధ్యం, పబ్లిక్ అడ్రస్ సిస్టం అంశాలపై సిబ్బందికి సూచనలు చేసినట్లు తెలిపారు. అలాగే బ్రహ్మోత్సవాల కోసం టీటీడీ విజిలెన్స్‌ సిబ్బంది, జిల్లా పోలీసు యంత్రాంగం కలిసి కట్టుదిట్టమైన భద్రతా ఏర్పాట్లు చేస్తున్నాయి. సీసీ కెమెరాలు, కంట్రోల్ రూం ఏర్పాటు చేసి భద్రతా ఏర్పాట్లు పర్యవేక్షించనున్నారు.