మళ్లీ బీజేపీలోకి మైనింగ్ కింగ్.. పార్టీని విలీనం చేసిన గాలి జనార్ధన్ రెడ్డి

గతేడాది జరిగిన కర్ణాటక అసెంబ్లీ ఎన్నికల్లో అధికారాన్ని కోల్పోయిన బీజేపీ.. ఈ లోక్‌సభ ఎన్నికల్లో ఎక్కువ ఎంపీ సీట్లను సాధించాలని లక్ష్యంగా పెట్టుకుంది. ఈ క్రమంలోనే ఇప్పటికే జనతా దళ్ సెక్యూలర్ పార్టీని ఎన్డీఏలో చేర్చుకున్న కమలం పార్టీ తాజాగా గాలి జనార్ధన్ రెడ్డికి చెందిన కల్యాణ రాజ్య ప్రగతి పక్ష-కేఆర్‌పీపీని.. తమలో విలీనం చేసుకుంది. గాలి జనార్ధన్ రెడ్డితోపాటు ఆయన భార్య గాలి అరుణ లక్ష్మీ కమలం పార్టీ కండువా కప్పుకున్నారు. కర్ణాటక బీజేపీ అధ్యక్షుడు బీవై విజయేంద్ర, కర్ణాటక మాజీ సీఎం యడియూరప్ప సమక్షంలో బెంగళూరులోని బీజేపీ కార్యాలయంలో గాలి తన పార్టీని బీజేపీలో కలిపేశారు.

తాను స్థాపించిన కేఆర్‌పీపీ పార్టీని బీజేపీలో విలీనం చేసినట్లు గాలి జనార్ధన్ రెడ్డి స్పష్టం చేశారు. ఈ క్రమంలోనే నరేంద్ర మోదీని మూడోసారి ప్రధానమంత్రిని చేసేందుకు ఒక బీజేపీ కార్యకర్తగా తాను పని చేస్తానని తేల్చి చెప్పారు. ఈ క్రమంలో తన పార్టీని బీజేపీలో కలిపేందుకు ఎలాంటి షరతులు విధించలేదని.. అంతేకాకుండా తనకు ఎలాంటి పదవులు అవసరం లేదని పేర్కొన్నారు. గత వారం కేంద్ర హోంమంత్రి అమిత్ షాతో ఢిల్లీలో భేటీ అయిన గాలి జనార్ధన్ రెడ్డి.. అనంతరం తన పార్టీని బీజేపీలో విలీనం చేస్తానని ప్రకటించారు. ఇక దేశ ప్రయోజనాల కోసమే మళ్లీ తాను బీజేపీలో చేరినట్లు గాలి చెప్పారు. పార్టీ ఏ బాధ్యతలు అప్పగించినా అంకితభావంతో పనిచేస్తానని పేర్కొన్నారు.

ఇక గతేడాది జరిగిన కర్ణాటక అసెంబ్లీ ఎన్నికల్లో గాలి జనార్ధన్ రెడ్డి బీజేపీకి గట్టి షాక్ ఇచ్చారు. కొన్ని స్థానాల్లో బీజేపీ ఓటమికి ఆయన పార్టీ కారణం అయింది. హరపనహళ్లి, బళ్లారి సిటీ నుంచి బీజేపీ తరఫున పోటీచేసిన గాలి జనార్ధన్ రెడ్డి ఇద్దరు సోదరులు.. జి.కరుణాకర రెడ్డి, జి.సోమశేఖర రెడ్డిలను ఓడించడంలో కల్యాణ రాజ్య ప్రగతి పక్ష కీలక పాత్ర పోషించింది. బళ్లారి సిటీలో జి.సోమశేఖర రెడ్డిపై గాలి జనార్థన్ రెడ్డి భార్య అరుణ లక్ష్మిని బరిలో ఉంచిన గాలి జనార్ధన్ రెడ్డి.. ఓట్లను చీల్చడంతో.. అక్కడ కాంగ్రెస్ పార్టీ అభ్యర్థి నారా భరత్ రెడ్డి విజయం సాధించారు. ఇక ఇటీవల జరిగిన రాజ్యసభ ఎన్నికల్లోనూ గాలి జనార్ధన్ రెడ్డి కర్ణాటకలో అధికారంలో ఉన్న కాంగ్రెస్‌ పార్టీకి మద్దతు పలికారు.

ఈ క్రమంలోనే గాలి జనార్ధన్ రెడ్డిని తమ వైపు తిప్పుకోవాలని ప్రయత్నాలు చేసిన బీజేపీ హైకమాండ్.. స్వయంగా కేంద్ర హోంమంత్రి అమిత్‌ షా రంగంలోకి దిగారు. దీంతో గాలి పార్టీని తమ పార్టీలో కలుపుకున్నారు. ఒకప్పుడు గాలి జనార్ధన్ రెడ్డికి కీలక అనుచరుడిగా ఉన్న శ్రీరాములు ఈసారి బీజేపీ నుంచి బళ్లారి లోక్‌సభ స్థానంలో పోటీ చేస్తున్నారు. గాలి జనార్ధన్ రెడ్డి చేరికతో బళ్లారి, కొప్పళ, విజయనగరం, రాయచూరు జిల్లాల్లో బీజేపీకి లాభం చేకూరుతుందని కమలం పార్టీ భావిస్తోంది.

కర్ణాటక అసెంబ్లీ ఎన్నికల్లో ఒంటరిగా పోటీ చేసి ఘోర పరాజయాన్ని చవిచూసిన బీజేపీ.. లోక్‌సభ ఎన్నికలకు వచ్చేసరికి మిత్రపక్షాలతో చేతులు కలుపుతోంది. ఈ క్రమంలోనే జనతాదళ్ సెక్యులర్ పార్టీతో సీట్లను సర్దుబాటు చేసుకున్న బీజేపీ.. కర్ణాటక రాష్ట్రంలోని కల్యాణ కర్ణాటక ప్రాంతంపై మంచి పట్టు కలిగిన గాలి జనార్ధన్ రెడ్డి పార్టీని విలీనం చేసుకోవడంతో ఆ ప్రాంతంలో భారీగా ఉన్న రెడ్డి, ఎస్సీ, ఎస్టీ ఓట్లను దక్కించుకోవచ్చని బీజేపీ భావిస్తోంది.