నమ్ముకున్నోడికి సీటు ఇప్పించలేదు.. మిమ్మల్ని ఎలా నమ్ముతారు: రఘురామ

నరసాపురం ఎంపీ రఘురామకృష్ణరాజు పొలిటికల్ జర్నీ ఇప్పుడు జంక్షన్‌లో ఉంది. ఆయన ఎటువైపు అడుగులు వేస్తారు, ఏ పార్టీలో చేరతారు, ఎక్కడ నుంచి పోటీ చేస్తారనేది ప్రస్తుతం ఆసక్తికరంగా మారింది. అసలు పోటీలా ఉంటారా, ఉండరా అనే ప్రశ్నలు కూడా వస్తున్నాయి. మొన్నటిదాకా బీజేపీ పెద్దలతో టచ్‌లో ఉన్న రఘురామకు నరసాపురం ఎంపీ టికెట్ ఖాయమని ప్రచారం జరిగింది. బీజేపీ తరుఫున ఆ టికెట్ ఆయనదేనన్న వార్తలు వచ్చాయి. బీజేపీ కాకుంటే టీడీపీ, జనసేనలో ఏదో ఒక పార్టీ తరుఫున నరసాపురం నుంచి రఘురామ పోటీ పక్కా అని పొలిటికల్ సర్కిళ్లలో చర్చలు నడిచాయి. అయితే ఊహించని విధంగా ఈసారి నరసాపురం ఎంపీ టికెట్‌ను భూపతిరాజు శ్రీనివాసవర్మకు బీజేపీ కేటాయించింది.

ఈ పరిస్థితుల్లో రఘురామకృష్ణంరాజు టీడీపీలో చేరతారని, ఆయనకు విజయనగరం ఎంపీ టికెట్ ఇస్తారనే వార్తలు వస్తున్నాయి. ఈ క్రమంలోనే రఘురామకృష్ణరాజుకు సంబంధించిన ఓ వీడియో సోషల్ మీడియాలో వైరల్ అవుతోంది. ఓ ఛానెల్‌కు సంబంధించిన డిబేట్ కార్యక్రమంలో పాల్గొన్న రఘురామకృష్ణరాజు.. తన సీటు గురించి ఆసక్తికర వ్యాఖ్యలు చేశారు. నమ్ముకున్న వాడికి ఒక్క సీటు తెచ్చుకోలేకపోయావ్.. కేంద్రంతో కొట్లాడతా, పోలవరం కడతానంటే ప్రజలు నమ్ముతారా అంటూ ఇంట్రెస్టింగ్ కామెంట్స్ చేశారు. టీడీపీ తనకు సీటు ఇవ్వాలని వీడియోలో డిమాండ్ చేశారు.

" నాకు సీటు ఇవ్వాలియ విజయనగరం వదిలేయండి. టీడీపీ నాకు సీటు ఇవ్వాలి. ఎందుకివ్వరు? వీళ్లు అడిగారు. అవతలి వాళ్లు మోసం చేశారు. మోసం చేస్తే పోరాడాలి.ఆడిన మాట తప్పిన నాకు సీటు ఎగ్గొట్టారు. నాకు సీటు ఇవ్వలేనివారు కేంద్రంతో పోరాడిపోలవరం కడతారంటే నమ్ముతారా? రాష్ట్రానికి ఏదైనా తీసుకువస్తారంటే నమ్ముతారా? నమ్ముకున్నవాడికి, ప్రజల కోసం పోరాడిన వాడికి, చావు దాకా వెళ్లి వెనక్కి వచ్చినవాడికి సీటే తెచ్చుకోలేకపోయావ్ కదా అని.. ఎవరైనా నమ్ముతారా? నమ్మరు. కానీ అలాంటి పరిస్థితి రాదు. బీజేపీ అధిష్టానం పొరబాటును తెలుసుకుంటుందని ఆశిస్తున్నా: అని రఘురామకృష్ణంరాజు వీడియోలో చెప్పారు. మరోవైపు రఘురామను విజయనగరం ఎంపీ సీటు నుంచి కాకుండా పశ్చిమగోదావరి జిల్లాలో ఏదో ఒక అసెంబ్లీ స్థానం నుంచి టీడీపీ బరిలోకి దింపుతుందని ప్రచారం జరుగుతోంది. పశ్చిమ గోదావరి జిల్లాలో ఎవరినైనా ఒకర్ని పోటీకి ఆపి.. ఆ స్థానాన్ని రఘురామకు ఇస్తారనే వార్తలు వస్తున్నాయి. మరి రాజుగారి పొలిటికల్ జర్నీ ఏ మలుపులు తిరుగుతుందనేదీ కాలమే నిర్ణయించాలి మరి.