సోమిరెడ్డి తమ్ముడు నా మొదటి భర్త.. అత్తగారింటి అనుమతితో రెండో పెళ్లి.. వేమిరెడ్డి ప్రశాంతి రెడ్డి ఎమోషనల్

వేమిరెడ్డి ప్రభాకర్ రెడ్డి దంపతులు మార్చి నెలారంభంలో వైఎస్సార్సీపీని వీడి టీడీపీలో చేరిన సంగతి తెలిసిందే. పార్టీలో చేరగానే వారిద్దరికీ ఎన్నికల్లో పోటీ చేసే అవకాశాన్ని చంద్రబాబు నాయుడు కల్పించారు. వేమిరెడ్డి ప్రభాకర్ రెడ్డికి నెల్లూరు ఎంపీ టికెట్ ఇచ్చిన టీడీపీ.. ఆయన సతీమణి ప్రశాంతి రెడ్డికి కోవూరు ఎమ్మెల్యే టికెట్ కేటాయించింది. ఇదే సమయంలో ప్రత్యర్థి పార్టీ ప్రశాంతి రెడ్డిపై ట్రోలింగ్స్ మొదలయ్యాయి.

తన గురించి తప్పుడు ప్రచారం జరుగుతోందని భావించిన వేమిరెడ్డి ప్రశాంతి రెడ్డి.. కోవూరులో నిర్వహించిన బహిరంగ సభలో తన గతం గురించి చెప్పుకొచ్చారు. ‘మీ ఆడపడుచుగా మీ ముందుకు వస్తున్నాను. ఈ సమయంలోనే నేను ఎవరో మీకు చెప్పాలని అనుకుంటున్నాను. మా తల్లిదండ్రులది చిత్తూరు జిల్లా. నా చదువంతా తిరుపతిలో సాగింది. అక్కడి నుంచి నెల్లూరు జిల్లాలోని నల్లపురెడ్డి శ్రీనివాసులు రెడ్డి చెల్లెలు ఏ ఇంటికి కోడలిగా వెళ్లారో.. నేను కూడా అదే ఇంటికి కోడలిగా వెళ్లారు. అంటే సోమిరెడ్డి చంద్రమోహన్ రెడ్డి తమ్ముడు హర్షవర్దన్ రెడ్డిని నేను పెళ్ళాడాను. కానీ ఆయన చనిపోవడంతో.. తర్వాత నా కుటుంబ సభ్యులు, అత్తగారింటి, పిల్లల అనుమతితో.. ఎంతో మందికి నిలువ నీడనిచ్చే వేమిరెడ్డి ప్రభాకర్ రెడ్డిని రెండో వివాహం చేసుకున్నాను. నేను ఆడపడుచుగా మీ దగ్గరకు వస్తున్నాను కాబట్టి.. నేనెవరో మీకు పరిచయం చేసుకోవాల్సిన బాధ్యత నాకు ఉంది కాబట్టి.. మీకు ఈ విషయాలు చెబుతున్నా. కోవూరు అభ్యర్థిగా నన్ను ఆశీర్వదించమని మిమ్మల్ని అడుగుతున్నాను’ అని వేమిరెడ్డి ప్రశాంతి రెడ్డి ఎమోషనల్‌గా మాట్లాడారు.

తాను, తన భర్త ప్రజాసేవ కోసమే రాజకీయాల్లోకి వచ్చామన్న ప్రశాంతి రెడ్డి.. ప్రజా నాయకుడిగా మరింత సేవ చేయడం కోసమే తాము రాజకీయాల్లోకి అడుగుపెట్టామన్నారు. తనను మీ కుటుంబ సభ్యురాలిగా చూడాలని కోరుకుంటున్నానన్నారు. మీకు ఎటువంటి సమస్య ఉన్నా.. ఎప్పుడైనా మా ఇంటికి రావొచ్చు. మన సమస్యలు తీరాలంటే.. చంద్రబాబు నాయుణ్ని సీఎం చేసుకోవాలి అని ప్రశాంతి రెడ్డి ప్రజలను కోరారు. నల్లపురెడ్డి శ్రీనివాసులు రెడ్డి చెల్లెలి ప్రస్తావన తీసుకురావడం ద్వారా నల్లపురెడ్డి ప్రసన్నకుమార్ రెడ్డి చేసిన వ్యాఖ్యలకు కౌంటర్‌గానే ప్రశాంతి రెడ్డి ఈ వ్యాఖ్యలు చేశారని భావిస్తున్నారు.