ప్రపంచ రికార్డు సృష్టించిన నెల్లూరు ఆవు.. రూ.40 కోట్లకు విక్రయం

మన దేశంలో ఆవులు చాలా రకాలు ఉంటాయి. వ్యవసాయ పనులకే కాకుండా పాలు ఇచ్చేందుకు కూడా మనం ఆవులను పెంచుకుంటాం. అయితే మేలు రకాల ఆవుల ధర చాలా ఖరీదుతో కూడుకున్నది. అంత ధర పెట్టి కొనుగోలు చేస్తే.. దానికి తగ్గట్టే పాల దిగుబడి కూడా ఉంటుంది. ఈ క్రమంలోనే మన దేశంలో ఎన్నో మేలు రకపు ఆవులు చాలా ప్రసిద్ధి చెందాయి. అందులో మన తెలుగు రాష్ట్రాల్లోని ఒంగోలు, నెల్లూరు ప్రాంతాలకు సంబంధించిన కొన్ని ఆవులకు ఫుల్ డిమాండ్ ఉంటుంది. ఈ క్రమంలోనే మన దేశానికి చెందిన ఒక నెల్లూరు ఆవు ప్రపంచంలోనే అత్యంత ధరకు విక్రయించారు. భారత సంతతితో సంబంధం ఉన్న ఆ ఆవు ఏకంగా రూ. 40 కోట్లకు అమ్ముడు పోవడంతో ప్రపంచ వ్యాప్తంగా వార్తల్లో నిలిచింది.

బ్రెజిల్ దేశంలో నిర్వహించిన ఓ వేలంలో నెల్లూరు జాతికి చెందిన ఓ ఆవు అత్యధిక ధర పలికింది. వయాటినా-19 ఎఫ్ఐవి మారా ఇమోవిస్ జాతికి చెందిన నెల్లూరు ఆవు.. ఏకంగా 4.8 మిలియన్ డాలర్లు అంటే మన భారత కరెన్సీలో ఏకంగా రూ.40 కోట్లకు విక్రయించారు. దీంతో ప్రపంచంలోనే అత్యంత ఖరీదైన ఆవుగా ఈ నెల్లూరు జాతి ఆవు రికార్డు సృష్టించింది. అయితే ఈ ఆవును మాత్రం ఇప్పుడు మన దేశం నుంచి బ్రెజిల్‌కు తీసుకెళ్లలేదు.

ఈ నెల్లూరు రకానికి చెందిన ఆవును 1868 లోనే బ్రెజిల్‌కు తరలించారు. అయితే ఆ తర్వాత బ్రెజిల్‌లో ఈ నెల్లూరు జాతి ఆవులు బాగా ఫేమస్ అయ్యాయి. దీంతో అక్కడే కాకుండా ప్రపంచ వ్యాప్తంగా కూడా నెల్లూరు జాతికి చెందిన ఆవులు ఎంతో ఫేమస్ అయ్యాయి. ఈ జాతి ఆవు శాస్త్రీయ నామం బోస్ ఇండికస్. దీంతో బ్రెజిల్‌లో ఈ నెల్లూరు రకం ఆవులు భారీగా సంతానోత్పత్తి చేశాయి.

ప్రస్తుతం బ్రెజిల్‌లో కేవలం ఈ నెల్లూరు జాతికి చెందిన ఆవులే 1.6 కోట్లు ఉన్నాయంటే వీటికి అక్కడ ఎంతటి డిమాండ్ ఉందో అర్థం చేసుకోవచ్చు. చూడడానికి తెల్లగా కనిపించే ఈ నెల్లూరు జాతి ఆవులు.. వాటి భుజాలపై పెద్దగా ఉబ్బెత్తుగా మూపురాలను కలిగి ఉంటాయి. ఈ నెల్లూరు జాతి ఆవులు వేడి ప్రాంతాల్లో కూడా సులభంగా జీవించగలుగుతాయి. వీటికి వ్యాధి నిరోధక శక్తి కూడా ఎక్కువగా ఉండటంతో రకరకాల వ్యాధుల బారి నుంచి తప్పించుకోగలుగుతాయి. ఇక మన నెల్లూరుకు చెందిన ఆవు బ్రెజిల్‌లో భారీ ధరకు విక్రయించడం విశేషం.