ఏపీ ప్రభుత్వానికి మరో రెండు నెలలే ఛాన్స్.. ఆ తర్వాత తెలంగాణకు అద్దె కట్టాల్సిందే

ఆంధ్రప్రదేశ్, తెలంగాణల మధ్య అధికారికంగా ఉన్న బంధానికి మరో రెండు నెలల్లో తెర పడబోతోంది. ఏపీకి హైదరాబాద్‌లో కేటాయించిన భవనాలు తిరిగి తెలంగాణ ప్రభుత్వం ఆదీనంలోకి వెళ్లబోతున్నాయి. హైదరాబాద్‌లోని లేక్ వ్యూ అతిథి గృహంతో పాటుగా మరికొన్ని భవనాలకు సంబంధించి.. జూన్ 2 నుంచి ఉపయోగించుకుంటే అద్దె చెల్లించాల్సి ఉంటుంది. అంటే జూన్ 2 నుంచి ఉమ్మడి రాజధానిగా హైదరాబాద్‌ ఉండదు. అది కూడా సరిగ్గా లోక్‌సభ ఎన్నికల ఫలితాలు విడుదలయ్యే రెండు రోజుల ముందు (జూన్ 4న ఎన్నికల ఫలితాలు) కావడం విశేషం.

ఆంధ్రప్రదేశ్ విభజన చట్టం 2014 ప్రకారం.. పదేళ్ల తర్వాత ఉమ్మడి రాజధానిగా ఉన్న హైదరాబాద్‌లో ఏపీ ప్రభుత్వ ఆధీనంలో ఉన్న లేక్ వ్యూ గెస్ట్ హౌస్‌తో పాటూ మిగిలిన భవనాలను ఖాళీ చేయాల్సి ఉంటుంది.. తిరిగి వాటిని తెలంగాణ ప్రభుత్వానికి అప్పగించాల్సి ఉంటుంది. అయితే ఏపీ ప్రభుత్వం మరో ఏడాది పాటూ భవనాలు ఉచితంగా ఉపయోగించుకునేలా అవకాశం ఇవ్వాలని తెలంగాణ ప్రభుత్వాన్ని కోరగా.. తిరస్కరించినట్లు తెలుస్తోంది. అయితే హైదరాబాద్‌లోని ఓ గెస్ట్ హౌస్, మరో రెండు భవనాలను మరో ఏడాది ఏపీ ఉపయోగించేకునేలా.. దానికి ప్రభుత్వం అద్దె చెల్లించే అంశంపై తెలంగాణ కేబినెట్ నిర్ణయం తీసుకోవాల్సి ఉందని ఓ అధికారి తెలిపారు. అంటే ఉచితంగా మాత్రం ఈ అవకాశాన్ని ఇవ్వకూడదని భావిస్తున్నారట.

ఏపీ ప్రభుత్వం ఆదర్శ్ నగర్‌లో ఉన్న హెర్మిటేజ్ భవనం, లక్డీకపూల్‌లో ఉన్న సీఐడీ భవనం, లేక్ వ్యూ గెస్ట్‌హౌస్‌లను తీసుకుని అద్దె చెల్లించాలని భావిస్తున్నట్లు తెలుస్తోంది. అయితే రాష్ట్రంలో అసెంబ్లీ ఎన్నికలు జరుగుతున్నందున, తెలంగాణ ప్రభుత్వం ఏదైనా నిర్ణయం తీసుకోవడానికి ఒక నెల లేదా రెండు నెలలు వేచి ఉండవచ్చు అంటున్నారు. ఏపీ విభజన చట్టంలో సెక్షన్ 5 ప్రకారం అపాయింటెడ్ డే నుంచి (2014 జూన్ 2న) నుంచి GHMC పరిధిలోని ప్రాంతం ఏపీ, తెలంగాణలకు ఉమ్మడి రాజధానిగా ఉంటుంది.

ఆంధ్రప్రదేశ్‌ నూతన రాజధాని అమరావతికి వెళ్లే ముందు.. ఏపీ ప్రభుత్వ కార్యాలయాలన్నీ హైదరాబాద్ నుంచి పనిచేశాయి.. పాత సెక్రటేరియట్‌లోని కొన్ని బ్లాకులు కూడా ఏపీకి కేటాయించారు. ఆ తర్వాత అప్పటి ముఖ్యమంత్రి చంద్రబాబు.. 2016లో తెలంగాణ నుంచి అమరావతికి రాజధాని తరలింపు మొదలు పెట్టారు.. 2017నాటికి ఆ ప్రక్రియను పూర్తి చేశారు. 2019 జూన్‌లో ఏపీ ప్రభుత్వం కొన్నింటిని మినహాయించి భవనాలను అప్పగించింది. ఆ తర్వాత రెండు రాష్ట్రాలకు ఉమ్మడి గవర్నర్‌గా ఉన్న గవర్నర్‌ ఉత్తర్వులు జారీ చేసి ఈ భవనాలపై ఆస్తిపన్ను మాఫీ చేయాలని తెలంగాణ ప్రభుత్వాన్ని కోరారు.

ఏపీ ప్రభుత్వం సీఐడీ, హెర్మిటేజ్ భవనాలను పరిపాలనా అవసరాల కోసం.. అలాగే అత్యవసర అవసరాల కోసం కొనసాగించాలని భావిస్తోంది. అలాగే రాష్ట్ర మంత్రులు, ఎమ్మెల్యేలు రాజ్ భవన్ రోడ్‌లోని లేక్ వ్యూ గెస్ట్‌హౌస్‌కి వచ్చి విలేకరుల సమావేశాలు నిర్వహించుకునేందుకు వీలుగా ఉపయోగించుకోవాలని భావిస్తున్నారు. ఢిల్లీలోని ఆంధ్ర భవన్‌లా.. తెలుగు రాష్ట్రాల సీఎంలు, మంత్రులు ఏ పని నిమిత్తం ఢిల్లీ వెళ్లినా.. అవసరమైతే వారు అక్కడే ఉండి అధికారుల సమావేశాలు నిర్వహిస్తారు. హైదరాబాద్ విషయానికొస్తే.. దాదాపు ఏపీకి చెందిన అగ్ర నేతలు, మంత్రులు, ఎమ్మెల్యేలందరికీ ఇక్కడ సొంత ఇళ్లు ఉన్నాయని ఏపీ అధికారి ఒకరు అంటున్నారు.