ప్రశాంతి రెడ్డి గురించి మాట్లాడితే తాట తీస్తా.. కోవూరు వస్తా, దమ్ముంటే ఆపండి: జబర్దస్త్ ఆర్పీ

వేమిరెడ్డి ప్రభాకర్ రెడ్డి కుటుంబంపై ఇష్టం వచ్చినట్లు మాట్లాడితే తాట తీస్తానని హెచ్చరించారు జబర్దస్త్ కమెడియన్, నెల్లూరు పెద్దారెడ్డి చేపల పులుసు యజమాని కిరాక్ ఆర్పీ. వేమిరెడ్డి కుటుంబం అంటే తనకు ఎంతో అభిమానం అన్నారు. వీపీఆర్ సంస్థ పేరుతో నెల్లూరు జిల్లాలో ఎన్నో సేవా కార్యక్రమాలు నిర్వహిస్తున్నారని.. చదువుకోలేని పిల్లల కోసం ఆయన చేస్తున్న కృషి గురించి ప్రత్యేకంగా చెప్పాలన్నారు ఆర్పీ. వేమిరెడ్డి 238మంది 6 నుంచి 10 వరకు ఖరీదైన స్థలంలో భవనం నిర్మించి చదివిస్తున్నారని.. వారికి అన్ని సౌకర్యాలు ఉచితంగా కల్పిస్తున్నారన్నారు. వైద్య సేవలు కూడా ఉచితంగా అందిస్తున్నారని.. రక్షిత మంచినీటి పథకాలు, వాటర్ ప్లాంట్లు ఏర్పాటు చేశారని.. ఇలా చెప్పుకుంటూ పోతే ఎన్నో మంచి పనులు చేశారన్నారు. వేమిరెడ్డి ప్రభాకర్ రెడ్డి హుందాతనం ఉన్న వ్యక్తి.. వైఎస్సార్‌సీపీ ఆయన్ను పొగోట్టుకున్న దౌర్భాగ్యం అన్నారు. వేమిరెడ్డి వంటి గొప్ప వ్యక్తిని పార్టీలో చేర్చుకుని టీడీపీ విలువ పెంచుకుందన్నారు. వేమిరెడ్డిని పార్టీల చేర్చుకోవడం కోసం చంద్రబాబు స్వయంగా నెల్లూరు వచ్చారని.. అది ప్రభాకర్ రెడ్డి గొప్పతనం అన్నారు.

మాజీ మంత్రి అనిల్ కుమార్ నోటికొచ్చినట్లు మాట్లాడొద్దని.. 'నీకెంత దమ్ముందో.. కిరాక్ ఆర్పీకి అంతే దమ్ముంది' అన్నారు. రోజూ లైవ్‌‌లో మాట్లాడేందుకు తాను సిద్ధమని.. అనిల్ కుమార్ చర్చకు వస్తారా అంటూ సవాల్ చేశారు. తాను ఎప్పుడూ వేమిరెడ్డితోనే ఉంటానని.. ఆయన టీడీపీతో ఉన్నారు కాబట్టి నేను కూడా టీడీపీతోనే ఉంటానన్నారు. ప్రభాకర్ రెడ్డి, ఆయన సతీమణి ప్రశాంతిరెడ్డిని గెలిపించుకుంటామన్నారు. ఇలా తాను వారి గురించి మాట్లాడినందుకు వచ్చేదేమీ లేదని.. వైఎస్సార్‌సీపీ కచ్చితంగా తనను కూడా టార్గెట్ టార్గెట్ చేస్తుందని.. దానికి కూడా తాను సిద్ధమన్నారు. వేమిరెడ్డి కుటుంబం గురించి తప్పుగా మాట్లాడటం తనకు బాధగా ఉందని.. ఈ విషయం తెలిసిన వెంటనే.. తన భార్య స్పందించమని ప్రెస్‌మీట్‌‌కు పంపించినట్లు ఆర్పీ చెప్పుకొచ్చారు. తాను కోవూరులో వేమిరెడ్డి ప్రశాంతిరెడ్డి తరఫున ప్రచారం చేస్తానని చెప్పారు ఆర్పీ. తాను జీవితంలో బాగా సెటిలయ్యానని.. తాను ఏమీ ఆశించి ఇలా చేయడం లేదన్నారు.

కోవూరు ఎమ్మెల్యే ప్రసన్నకుమార్ రెడ్డి వేమిరెడ్డిలా హుందాగా మాట్లాడాలని హితవు పలికారు ఆర్పీ. పెద్దారెడ్డి అంటే పెత్తనం చేసేవాళ్లు కాదు.. సేవ చేసేవాళ్లన్నారు. ఆడవాళ్లపై అడ్డదిడ్డంగా మాట్లాడితే ఊరుకునేది లేదని.. ఇలా మాట్లాడినంత మాత్రాన వేమిరెడ్డిని ఏమీ చేయలేరన్నారు. ప్రశాంతిరెడ్డి కోవూరులో గెలవడం ఖాయమని.. వేమిరెడ్డి ప్రభాకర్ రెడ్డి 2 లక్షలకు పైగా మెజార్టీతో గెలుస్తారని ధీమాను వ్యక్తం చేశారు. నెల్లూరు రాజకీయాల్లో ఎప్పుడూ లేని విధంగా ఆడవాళ్లను ఎందుకు టార్గెట్ చేస్తున్నారని.. పెళ్లిళ్ల గురించి ఎందుకు మాట్లాడుతున్నారని ప్రశ్నించారు.

ప్రసన్నకుమార్ రెడ్డి వేమిరెడ్డికి డయాబెటిస్ ఉందంటూ చీప్‌గా మాట్లాడుతున్నారని మండిపడ్డారు. ఆయనకు డయాబెటిస్ ఉంటే తప్పేముందని.. ఇటీవల కాలంలో చిన్న పిల్లలకు కూడా వస్తుందని.. ఆరోగ్యపరమైన సమస్యల గురించి ఇలా మాట్లాడటం దారుణమన్నారు. వేమిరెడ్డి ప్రభాకర్ రెడ్డి ఇష్టపడి ప్రశాంతిరెడ్డిని పెళ్లి చేసుకున్నారని.. అందులో తప్పేముందని ప్రశ్నించారు. ఎంతో హుందాగా ఉండే ప్రశాంతి రెడ్డితో.. తన పరిస్థితి ఇది అని చెప్పుకునే స్థాయికి తీసుకొచ్చిన వీళ్లు రాజకీయ నేతలా అంటూ ఆగ్రహం వ్యక్తం చేశారు. ఇలా మాట్లాడిన వారి ఇళ్లలో ఆడవాళ్లు లేరా.. ఇంకా ఇలాగే వేమిరెడ్డి కుటుంబంపై మాట్లాడితే ఊరుకునేది లేదని హెచ్చరించారు. రాబోయే రోజుల్లో తాను కూడా రంగంలోకి దిగి కొవ్వు తీస్తానంటూ వార్నింగ్ ఇచ్చారు ఆర్పీ.

ప్రశాంతిరెడ్డి రెండో పెళ్లి గురించి ఎందుకు.. ఎవరు జీవితాలు ఎవరు నిర్ణయించగలరని ప్రశ్నించారు ఆర్పీ. ఎవరు ఎప్పుడు పెళ్లి చేసుకోవాలి.. ఎవర్ని చేసుకోవాలో ప్రసన్నకుమార్ రెడ్డి నిర్ణయిస్తారా అంటూ ప్రశ్నించారు. ఇష్టపడి పెళ్లి చేసుకున్నారు తప్పేముంది.. వేమిరెడ్డి ప్రభాకర్ రెడ్డి ఏదైనా తప్పు చేస్తే మాట్లాడాలన్నారు. అంతేకాని వ్యక్తిగత విషయాల గురించి ఎందుకు మాట్లాడుతున్నారన్నారు. తాను కోవూరు వస్తా.. ఎవడో ఆపండి అంటూ ఆర్పీ సవాల్ చేశారు. వేమిరెడ్డి ప్రభాకర్‌ రెడ్డిని చూసి అందరూ భయపడుతున్నారని.. తనకు వీపీఆర్ అంటే ఎంత అభిమానమని.. తాను అందుకే వీపీఆర్ టాటూ వేసుకున్నట్లు చెప్పారు. జబర్దస్త్ మానేసిన తర్వాత టాటూ వేయించుకున్నానని.. అందుకే ఆయనకు అభిమానిగా ఉన్నానన్నారు.