ఏపీలో పింఛన్లపై సెర్ప్ కీలక ఆదేశాలు.. ఆ పేపర్ తప్పనిసరి

ఆంధ్రప్రదేశ్‌లో పింఛన్ల పంపిణీకి సంబంధించి గ్రామీణ పేదరిక నిర్మూలన సంస్థ (సెర్ప్) కీలక ఉత్తర్వులు జారీ చేసింది. ఏపీలో మే13న ఎన్నికలు జరగనున్నాయి. ఈ ఎన్నికలకు సంబంధించి ఇప్పటికే షెడ్యూల్ వెల్లడైన నేపథ్యంలో ప్రస్తుతం రాష్ట్రవ్యాప్తంగా కోడ్ అమల్లో ఉంది. ఈ పరిస్థితుల్లో వచ్చే రెండు నెలలకు సంబంధించి పింఛన్ల పంపిణీపై సెర్ప్ సీఈవో సర్క్యులర్ జారీ చేశారు. ఏప్రిల్, మే నెలల్లో పింఛన్లు పంపిణీ చేసేందుకు వాలంటీర్లు, సచివాలయ సిబ్బంది తప్పనిసరిగా ఆథరైజేషన్ పేపర్లు తీసుకోవాలని సీఈవో సర్క్యులర్‌లో పేర్కొన్నారు.

  ప్రస్తుతం ఏపీలో ఎన్నికల కోడ్ అమల్లో ఉందని.. ఈ పరిస్థితుల్లో పింఛన్ల పంపిణీ కోసం డబ్బులు తీసుకెళ్లే గ్రామ, వార్డు సచివాలయ సిబ్బంది, వాలంటీర్లు తప్పనిసరిగా అథరైజేషన్ పత్రం కలిగి ఉండాలని సెర్ప్ సీఈవో స్పష్టం చేశారు. ఎంపీడీవోలు, మున్సిపల్ కమిషనర్లు, పంచాయితీ కార్యదర్శి, సంక్షేమ కార్యదర్శులు వీరికి ఆథరైజేషన్ పత్రాలు ఇవ్వాలని ఆదేశించారు. పింఛన్ల పంపిణీ కోసం బ్యాంకుల నుంచి నగదు తీసుకెళ్లే వాలంటీర్లకు ఈ ఆథరైజేషన్ పేపర్లు ఇవ్వాలని సూచించింది. అలాగే పింఛన్ పంపిణీ చేసేటప్పుడు ఫోటోలు, వీడియోలు తీయకూడదని సెర్ప్ స్పష్టం చేసింది. వాలంటీర్లు ఎలాంటి ఎన్నికల ప్రచారం చేయకూడదని స్పష్టం చేసింది.

ఇక నిబంధనలకు విరుద్ధంగా వాలంటీర్లు పింఛన్లు పంపిణీ చేసే సమయంలో ఎన్నికల ప్రచారం చేసినట్లు తేలితే చర్యలు తీవ్రంగా ఉంటాయని సెర్ప్ స్పష్టం చేసింది. ఎన్నికల కోడ్ ఉల్లంఘన జరిగితే సహించేది లేదని హెచ్చరించింది.బ్యాంకుల నుంచి నగదు తీసుకుని పెన్షన్ పంపిణీ చేసే వాలంటీర్లకు ఆథరైజేషన్ పేపర్లు జారీ చేయాలని సూచించింది. పెన్షన్ పంపిణీ సమయంలో వాలంటీర్లు ఎలాంటి ప్రచారం నిర్వహించకూడదని ఆదేశాలు జారీ చేసింది. పెన్షన్ పంపిణీ చేసినట్టుగా ఫోటోలు, వీడియోలు తీయవద్దని సెర్ప్‌ తేల్చి చెప్పింది. పెన్షన్ పంపిణీ సమయంలో ఎన్నికల కోడ్ ఉల్లంఘన జరిగినట్టుగా తేలితే చర్యలు తీవ్రంగా ఉంటాయని హెచ్చరికలు చేసింది.

మరోవైపు ఏపీలో ఏప్రిల్ నెల పింఛన్లు ఆలస్యం కానున్నాయి. ప్రతి నెల ఒకటో తేదీన ప్రభుత్వం పింఛన్లు పంపిణీ చేస్తోంది . అయితే ఈసారి మాత్రం ఆలస్యం అవుతున్నట్లు అధికారులు తెలిపారు. ఏప్రిల్ 1న కాకుండా ఏప్రిల్ 3న పింఛన్లు పంపిణీ చేస్తారని అధికారులు వెల్లడించారు.