ఫ్రీ టికెట్‌ విషయంలో గొడవ.. బస్సులో మహిళా ప్రయాణికురాలిపై కండక్టర్ దాడి

మహిళలకు కొన్ని రాష్ట్రాల్లో ఉచిత బస్సు ప్రయాణం కల్పిస్తున్న విషయం తెలిసిందే. ఈ క్రమంలోనే బస్సుల్లో తరచూ జరుగుతున్న గొడవలు సోషల్ మీడియాలో వైరల్ అవుతూ ఉన్నాయి. తాజాగా మరో ఘటన చోటు చేసుకుంది. బస్సులో ప్రయాణిస్తున్న ఓ మహిళా ప్రయాణికురాలిపై కండక్టర్ దాడి చేయడం తీవ్ర కలకలం రేపుతోంది. ఫ్రీ టికెట్ విషయంలో వారిద్దరికీ మొదలైన గొడవ కొట్టుకోవడం వరకు వెళ్లింది. ఈ సంఘటన కర్ణాటక రాజధాని బెంగళూరులో చోటుచేసుకుంది. బెంగళూరు మెట్రోపాలిటన్ ట్రాన్స్‌పోర్ట్ కార్పొరేషన్‌కు చెందిన ఓ బస్సులో మంగళవారం మహిళ ప్రయాణించగా.. ఆ బస్సు కండక్టర్ ఆమెపై దాడి చేయడంతో పోలీసులు అతడిని అరెస్టు చేశారు.

మంగళవారం తెల్లవారుజామున బెంగళూరు నగరంలోని బిలేకహళ్లి నుంచి శివాజీనగర్‌ వెళ్తున్న బస్సులోకి తాంజులా అనే ఓ మహిళ ఎక్కింది. ఈ క్రమంలోనే ఫ్రీ టికెట్‌ విషయంలో తాంజులాకు, కండక్టర్‌ హొన్నప్పనాగప్పకు మధ్య తీవ్ర వాగ్వాదం జరిగింది. దీంతో సహనం కోల్పోయిన కండక్టర్‌ ఆమెపై విచక్షణరహితంగా దాడికి దిగాడు. దీంతో ఆ దాడికి సంబంధించిన వీడియో సోషల్ మీడియాల్లో వైరల్‌గా మారింది. దీనిపై స్పందించిన బీఎంటీసీ అధికారులు.. ఆ కండక్టర్‌ను సస్పెండ్‌ చేశారు.

అయితే టికెట్ ఇవ్వాలని కండక్టర్‌ హొన్నప్పనాగప్పను తాంజులా ఎన్నిసార్లు అడిగినా ఇవ్వలేదని ఆమె ఫిర్యాదు చేశారు. అయితే పోలీసులకు ఫిర్యాదు చేస్తానని పోలీస్‌ స్టేషన్‌ వద్ద బస్సును ఆపాలని డ్రైవర్‌ను అడగడంతో కండక్టర్‌ తనతో గొడవకు దిగినట్లు చెప్పింది. ఈ క్రమంలోనే తనను తిడుతూ మీద చేయి వేసేందుకు కండక్టర్ ప్రయత్నించాడని.. దీంతో తాను అతని చెంప పగులగొట్టినట్లు తెలిపింది. దీంతో అతడు ఆవేశంతో ఊగిపోతూ తనను తీవ్రంగా కొట్టాడని ఫిర్యాదులో తాంజుల పేర్కొంది. అయితే దీనిపై ఆ కండక్టర్ మాత్రం భిన్నమైన వాదన చెబుతున్నట్లు పోలీసులు వెల్లడించారు. ఫ్రీ టికెట్‌ ఇచ్చేందుకు ఆధార్‌ కార్డు అడిగితే.. ఆమె చూపించలేదని.. టికెట్‌ తీసుకోమంటే తనతో గొడవకు దిగిందని చెప్పాడు. ఆపై ఆమెనే తనను ముందుగా చెంపపై కొట్టిందని పేర్కొన్నాడు.

ఈ ఘటనపై కేసు నమోదు చేసుకున్న పోలీసులు బాధితురాలి ఫిర్యాదు ఆధారంగా దర్యాప్తు చేస్తున్నారు. ఇక మహిళను కొట్టిన వీడియో వైరల్ కావడంతో బీఎంటీసీ అధికారులు అతడిని సస్పెండ్‌ చేశారు. మహిళలకు భద్రత పట్ల బెంగళూరు మెట్రోపాలిటన్ ట్రాన్స్‌పోర్ట్ కార్పొరేషన్ అధిక ప్రాధాన్యం ఇస్తుందని తెలిపారు. బస్సుల్లో మహిళలకు ప్రత్యేక సీట్లు, ప్రత్యేక డోర్లు, ప్యానిక్ బటన్‌ల ఏర్పాటు, ప్రధాన బస్‌స్టేషన్లలో విశ్రాంతి గదులు, హెల్ప్‌లైన్‌ వంటి సౌకర్యాలు కల్పించినట్లు చెప్పారు. మహిళా ప్రయాణికులపై దాడులు చేసే వారిపై కఠిన చర్యలు తీసుకుంటామని పేర్కొన్నారు.