టీడీపీలో అసమ్మతి సెగలు, రాజీనామాల దిశగా నేతలు
Andhra Pradesh Telugu | Suryaa Desk | Published : Sat, Mar 30, 2024, 12:45 PM
టీడీపీ టికెట్ల కేటాయింపు ఆ పార్టీలో చిచ్చురేపింది. చీపురుపల్లి టికెట్ ఇవ్వనందుకు నిరసనగా విజయనగరం జిల్లా టీడీపీ అధ్యక్షుడు కిమిడి నాగార్జున పార్టీ పదవులకు రాజీనామా చేశారు. తూర్పుగోదావరి జిల్లా అనపర్తి టికెట్ కోసం మాజీ ఎమ్మెల్యే నల్లమిల్లి రామకృష్ణారెడ్డి కుటుంబ సభ్యులతో సహా రోడ్డెక్కారు. అనంతపురం జిల్లాలో అనంత అర్బన్, గుంతకల్లు మాజీ ఎమ్మెల్యేలు వైకుంఠం ప్రభాకర్ చౌదరి, జితేంద్రగౌడ్కు టికెట్లు దక్కకపోవడంతో వారి వర్గీయులు ఆందోళనలకు దిగారు. శుక్రవారం అనంతపురం అర్బన్ టీడీపీ కార్యాలయం ఎదుట ప్రభాకర్ చౌదరి వర్గీయులు పార్టీ జెండాలు, ఫ్లెక్సీలు, కరపత్రాలను దహనం చేశారు. అనంతరం రాంనగర్లోని టీడీపీ జిల్లా కార్యాలయం వద్దకు చేరుకుని తాళాలను బద్దలుకొట్టి లోనికి ప్రవేశించారు. కార్యాలయంలోని కంప్యూటర్లు, ఫర్నీచర్, ఇతర సామగ్రిని ధ్వంసం చేశారు. సామగ్రిని బయటకు తీసుకొచ్చి దహనం చేశారు. చంద్రబాబు, లోకేశ్కు వ్యతిరేకంగా నినాదాలు చేశారు. పార్టీ జిల్లా అధ్యక్షుడు కాలవ శ్రీనివాసులు ఇంటి ఎదుట తెలుగు మహిళలు పార్టీ జెండాలు, ఫ్లెక్సీలను దహనం చేసి నిరసన తెలిపారు. ఆ సమయంలో ఒక మహిళ సొమ్మసిల్లి పడిపోయారు. ప్రభాకర్ చౌదరికి టికెట్ రాలేదని మనస్తాపానికి గురైన ఇద్దరు కార్యకర్తలు విషం తాగి ఆత్మహత్యాయత్నం చేశారు. అక్కడే ఉన్న పార్టీ శ్రేణులు వారిని అనంతపురం ప్రభుత్వాస్పత్రికి తరలించారు.
|
|