కాసేపట్లో ప్రచారం.. పవన్ కళ్యాణ్‌కు బిగ్ షాక్.. ఆఖర్లో పోలీసుల ట్విస్ట్

జనసేన అధినేత పవన్ కళ్యాణ్‌కు పోలీసులు షాకిచ్చారు. పిఠాపురం నుంచి ఎన్నికల ప్రచారం ప్రారంభించాలని అనుకున్న పవన్ కళ్యాణ్‌‍కు ఊహించని షాక్ తగిలింది. జనసేనాని ప్రచారానికి పిఠాపురం నేతలు అన్ని ఏర్పాట్లు చేశారు. అయితే మరికాసేపట్లో పవన్ కళ్యాణ్ ప్రచారం ప్రారంభమవుతుంది అనే సమయంలో పోలీసులు ట్విస్ట్ ఇచ్చారు. పవన్ కళ్యా్ణ్ ప్రచార రథం వారాహికి అనుమతి లేదని పోలీసులు తెలిపారు. వారాహికి అనుమతి తీసుకోలేదని.. ప్రచారంలో చిన్న వాహనానికి మాత్రమే అనుమతి ఇస్తామని స్పష్టం చేశారు.ఈ నేపథ్యంలో పాదగయ క్షేత్రం శక్తిపీఠంలో వారాహి వాహనానికి పూజ కూడా వాయిదా పడింది.

మరోవైపు వారాహి వాహనానికి పోలీసుల అనుమతి నిరాకరణ నేపథ్యంలో పవన్ కళ్యాణ్ రోడ్ షో లేకుండా చేబ్రోలు వెళ్లనున్నారు. షెడ్యూల్ ప్రకారం హోటల్ నుంచి చేబ్రోలు వరకూ పవన్ కళ్యాణ్ రోడ్ షో నిర్వహించాల్సి ఉంది. అయితే వారాహి వాహనానికి పోలీసులు అనుమతి నిరాకరించడంతో రోడ్ షో లేకుండానే పవన్ చేబ్రోలు వెళ్లనున్నారు. అక్కడ జరిగే విజయభేరి సభలో పవన్ కళ్యాణ్ పాల్గొంటారు. వేరే వాహనంపై నుంచి పవన్ కళ్యాణ్ ప్రసంగించనున్నట్లు తెలిసింది.

మరోవైపు పోలీసుల తీరుపై జనసైనికులు మండిపడుతున్నారు. పవన్ కళ్యాణ్ ప్రచారాన్ని అడ్డుకునే ప్రయత్నం చేస్తున్నారని ఆరోపిస్తున్నారు. పవన్ కళ్యాణ్ వారాహికి ఎందుకు అనుమతి ఇవ్వలేదని ప్రశ్నిస్తున్నారు. అయితే నిర్ణీత సమయంలోగా అనుమతి చేసుకోకపోవటంతోనే వారాహికి పర్మిషన్ రాలేదని పోలీసులు చెప్తున్నారు. ఏదేమైనా పవన్ ఎన్నికల ప్రచారానికి ఆదిలోనే హంసపాదు అన్నట్లుగా వారాహికి అనుమతి నిరాకరించడం ప్రాధాన్యం సంతరించుకుంది.

ఎస్వీఎస్‌ఎన్ వర్మ ఇంటికి పవన్ కళ్యాణ్..

అంతకుముందు పిఠాపురం చేరుకున్న పవన్ కళ్యాణ్.. టీడీపీ మాజీ ఎమ్మెల్యే ఎస్వీఎస్ఎన్ వర్మ ఇంటికి వెళ్లారు. వర్మ తల్లి దగ్గర నుంచి ఆశీస్సులు తీసుకున్నారు. వచ్చే ఎన్నికల్లో పిఠాపురం సీటును వర్మ కూడా ఆశించారు. అయితే పొత్తులో భాగంగా ఈ స్థానం నుంచి జనసేనాని పోటీ చేస్తున్నట్లు ప్రకటించారు. దీంతో వర్మ అసంతృప్తికి గురికాగా.. చంద్రబాబు పిలిపించి సముదాయించారు. అధికారంలోకి రాగానే ఎమ్మెల్సీ ఇస్తామని హామీ ఇచ్చారు. దీంతో పవన్ కళ్యాణ్ తరుఫున ఎన్నికల ప్రచారం నిర్వహించేందుకు వర్మ అంగీకరించారు. ఈ క్రమంలోనే వర్మ ఇంటికి వెళ్లిన పవన్ కళ్యాణ్.. కూటమి అధికారంలోకి వచ్చిన తర్వాత న్యాయం చేస్తామని వర్మకు హామీ ఇచ్చారు. తన కోసం వర్మ త్యాగం చేశారని చెప్పుకొచ్చారు.