కాలేజీ విద్యార్ధికి రూ.46 కోట్ల ఐటీ నోటీసు.. ఖంగుతిన్న యువకుడు

ఓ కాలేజీ విద్యార్ధికి రూ.46 కోట్ల మేర పన్ను చెల్లించాలని ఐటీ అధికారులు నోటీసులు పంపడంతో యువకుడు షాకయ్యాడు. విస్తుగొలిపే ఈ ఘటన మధ్యప్రదేశ్‌‌లో చోటుచేసుకుంది. గ్వాలియర్‌‌కు చెందిన ప్రమోద్‌ కుమార్‌ దండోటియా (25) విద్యార్థి స్థానిక కాలేజీలో చదువుతున్నాడు. అతడి బ్యాంకు ఖాతా నుంచి రూ.46 కోట్ల లావాదేవీలు జరిగాయని, ఈ మొత్తానికి ఐటీ, జీఎస్టీ చెల్లించాలని ఇటీవల నోటీసులు ఇచ్చారు. దీంతో లబోదిబోమన్న బాధిత యువకుడు.. ఐటీ అధికారులను సంప్రదించి తన గోడును వెళ్లబోసుకున్నాడు. విచారణ జరిపిన అధికారులు అతడి పాన్‌ కార్డుపై ఓ కంపెనీ రిజిస్టర్‌ అయినట్లు గుర్తించారు.

ఆ కంపెనీ 2021 నుంచి ముంబయి, ఢిల్లీ వేదికగా కార్యకలాపాలు సాగించిందని తేలింది. దీంతో పోలీసులకు ఫిర్యాదు చేసిన యువకుడు.. ఆ లావాదేవీలకు తనకు ఎలాంటి సంబంధం లేదని, కంపెనీ గురించి తనకు తెలియదని తెలిపాడు. దీనిపై కేసు నమోదు చేసిన పోలీసులు దర్యాప్తు చేపట్టారు. ‘ఆ విద్యార్థి పాన్‌ కార్డును గుర్తుతెలియని వ్యక్తులు దుర్వినియోగం చేసి కంపెనీని రిజిస్టర్‌ చేశారు.. ఆ తర్వాతే అతడి బ్యాంకు ఖాతా నుంచి రూ.కోట్లలో లావాదేవీలు జరిగాయి. దీనిపై దర్యాప్తు కొనసాగుతోంది’ అని పోలీసులు వెల్లడించారు.

‘నేను గ్వాలియర్‌లో కాలేజీ విద్యార్థిని.. ఆదాయపు పన్ను, జీఎస్టీ నుంచి నోటీసు తర్వాత.. ముంబయి, ఢిల్లీలో నా పాన్ కార్డ్ ద్వారా ఒక కంపెనీ రిజిస్టర్ అయిందని నేను తెలుసుకున్నాను. నా పాన్ కార్డ్ ఎలా దుర్వినియోగం చేశారో.. లావాదేవీలు ఎలా జరిగాయో నాకు తెలియదు. ’ అని వాపోయాడు. ఆదాయపు పన్ను శాఖ నుంచి సమాచారం అందిన వెంటనే సంబంధిత అధికారులతో మాట్లాడినట్లు తెలిపారు. ఆ తర్వాత పలుమార్లు పోలీసులకు ఫిర్యాదు చేసేందుకు ప్రయత్నించినా ఎలాంటి చర్యలు తీసుకోలేదు. శుక్రవారం మరోసారి ఏఎస్పీకి ఫిర్యాదు చేశారు.