తీహార్ జైలులో రామాయణం, భగవద్గీత పుస్తకాలు ఇవ్వండి.. కోర్టుకు కేజ్రీవాల్ విజ్ఞప్తి

ఢిల్లీ లిక్కర్ కేసులో అరెస్ట్ అయిన అరవింద్ కేజ్రీవాల్.. ఈడీ కస్టడీ ముగియడంతో ఢిల్లీ రౌస్ అవెన్యూ కోర్టు ఆయనకు 15 రోజుల జ్యుడీషియల్ కస్టడీ విధించింది. దీంతో అధికారులు కేజ్రీవాల్‌ను తీహార్ జైలుకు తరలించారు. ఈ క్రమంలోనే తనకు జ్యుడిషియల్ కస్టడీ విధించడంతో ఆయన కోర్టుకు కొన్ని అభ్యర్థనలు పెట్టుకున్నారు. పుస్తకాలతో పాటు తనకు కావాల్సిన మరికొన్ని వస్తువులను కూడా తన జైలు గదిలోకి అనుమతించాలని కోర్టును కేజ్రీవాల్ వేడుకున్నారు. ఈ మేరకు తన లాయర్ ద్వారా కోర్టుకు ప్రత్యేక అభ్యర్థన పెట్టుకున్నారు.

15 రోజులు జ్యుడీషియల్ కస్టడీ విధించడంతో ఆ సమయంలో తనకు ఏమేం కావాలి అనే వాటిని కేజ్రీవాల్ తన తరఫు లాయర్ ద్వారా ఢిల్లీ రౌస్ అవెన్యూ కోర్టుకు స్పెషల్ రిక్వెస్ట్ పెట్టుకున్నారు. రామాయణం, భగవద్గీత పుస్తకాలతోపాటు జర్నలిస్ట్ నీరజా ఛౌదరీ రాసిన "హౌ ప్రైమ్‌ మినిస్టర్స్‌ డిసైడ్‌" వంటి పుస్తకాలను జైలులో అందుబాటులో ఉంచాలని కోరారు. పుస్తకాలతోపాటు ఒక టేబుల్, చైర్, మెడిసిన్స్‌, డైట్‌ ప్రకారం ఆహారం అందించాలని విజ్ఞప్తి చేశారు. అంతేకాకుండా తన మెడలో ప్రస్తుతం ఉన్న లాకెట్‌ను కొనసాగించేందుకు అనుమతించాలని కోరారు.

ఢిల్లీ లిక్కర్ పాలసీ కేసులో గత నెల 21 వ తేదీన ఈడీ అధికారులు కేజ్రీవాల్‌ను అరెస్ట్ చేశారు. అనంతరం కోర్టులో హాజరుపరచగా మార్చి 28 వ తేదీ వరకు ఈడీ కస్టడీకి కేజ్రీవాల్‌ను ఇస్తూ ఢిల్లీ రౌస్ అవెన్యూ కోర్టు అనుమతి ఇచ్చింది. ఆ తర్వాత తిరిగి కోర్టులో హాజరపరచగా ఈడీ కస్టడీని ఏప్రిల్ 1 వ తేదీ వరకు పొడగించింది. అనంతరం సోమవారం మళ్లీ కోర్టులో హాజరుపరచగా.. ఈ నెల 15 వ తేదీ వరకు జ్యుడీషియల్ కస్టడీకి అనుమతి ఇస్తూ కోర్టు తీర్పును ఇచ్చింది. కోర్టు తీర్పు నేపథ్యంలో కేజ్రీవాల్‌ను తీహార్ జైలుకు అధికారులు పంపించనున్నారు. ఈ నేపథ్యంలోనే జైల్లో పుస్తకాలు చదివేందుకు అనుమతి ఇవ్వాలని అందుకు పుస్తకాలు ఇవ్వాలని ఆయన కోరారు.

ఇక తమ కస్టడీలో కేజ్రీవాల్ విచారణకు సహకరించలేదని ఈడీ అధికారులు ఢిల్లీ రౌస్ అవెన్యూ కోర్టుకు తెలిపారు. కేజ్రీవాల్ నివాసంలో స్వాధీనం చేసుకున్న ఫోన్, ఇతర డిజిటల్ పరికరాల పాస్‌వర్డ్‌లు కేజ్రీవాల్ చెప్పలేదని కోర్టుకు విన్నవించారు. కావాలనే కేజ్రీవాల్ విచారణను తప్పుదోవ పట్టిస్తున్నారని ఈడీ అధికారులు పేర్కొన్నారు. ప్రస్తుతానికి కేజ్రీవాల్‌ను జ్యుడీషియల్ కస్టడీలో ఉంచాలని.. మళ్లీ అవసరమైనప్పుడు రిమాండ్‌ను కోరుతామని ఈడీ అధికారులు కోర్టుకు వెల్లడించారు. ఇప్పటివరకు 10 రోజుల పాటు ఈడీ కస్టడీలో ఉన్న కేజ్రీవాల్‌ను ప్రతి రోజూ 5 గంటలకు పైగా మొత్తం 50 గంటల పాటు విచారించినట్లు ఈడీ అధికారులు కోర్టులో పేర్కొన్నారు.