దళితుడ్ని చంపిన నీకు ఆ అర్హత లేదు.. వైసీపీ ఎమ్మెల్సీ అనంతబాబుపై తిరుగుబాటు

కాకినాడ జిల్లా ప్రత్తిపాడు మండలం ధర్మవరం గ్రామంలో వైఎస్సార్‌సీపీ ఎమ్మెల్సీ అనంతబాబుకు చేదు అనుభవం ఎదురైంది. 'దళిత డ్రైవర్ని చంపి.. డోర్‌ డెలివరీ చేసిన నువ్వు ఇప్పుడు ఓట్ల కోసం అంబేద్కర్ విగ్రహానికి పూలమాల వేయడానికి వస్తావా.. మా దళిత వాడల్లోకి అడుగు పెట్టొద్దు'.. అంటూ దళితులు అనంతబాబుపై తీవ్ర ఆగ్రహం వ్యక్తంచేశారు. అనంతబాబుతో పాటు ప్రచారానికి వచ్చిన కాకినాడ జిల్లా ప్రత్తిపాడు నియోజకవర్గ వైఎస్సార్‌సీపీ అభ్యర్థి వరుపుల సుబ్బారావు, కాకినాడ లోక్‌సభ నియోజకవర్గ అభ్యర్థి చలమలశెట్టి సునీల్‌ను సైతం చుట్టుముట్టారు. దీంతో చేసేదేమీ లేక వారు ముగ్గురు అక్కడి నుంచి వెనుదిరిగారు.

ఎన్నికల ప్రచారంలో భాగంగా ప్రత్తిపాడు వైఎస్సార్‌సీపీ అభ్యర్థి వరుపుల సుబ్బారావుకు మద్దతుగా ఎమ్మెల్సీ అనంతబాబు కొద్దిరోజులుగా ప్రచారం చేస్తున్నారు. సోమవారం రాత్రి ప్రత్తిపాడు మండలం ధర్మవరం గ్రామంలో వారు పర్యటించారు. ఈ ప్రచారంలో కాకినాడ లోక్‌సభ అభ్యర్థి సునీల్‌ కూడా పాల్గొన్నారు. ధర్మవరం గ్రామంలో ఇంటింటికీ తిరుగుతూ ఓట్లు అభ్యర్థించారు. ఈ క్రమంలో అనంతబాబు దళితవాడలో వైసీపీలోని ఓ వర్గంతో కలిసి అంబేడ్కర్‌ విగ్రహానికి పూలమాల వేసి.. అదే ప్రాంగణం నుంచి తమ పార్టీ అభ్యర్థులను గెలిపించాలని కోరడం వివాదస్పదమైంది.

దీంతో దళితులంతా నినాదాలు చేసుకుంటూ అంబేద్కర్ విగ్రహం వద్దకు చేరారు. 'దళితుడ్ని చంపిన నువ్వు అంబేద్కర్‌కు దండేయడానికి సిగ్గులేదా అంటూ అనంతబాబును అంటూ నిలదీశారు. ఇక్కడినుంచి వెళ్లకపోతే పరిస్థితి తీవ్రంగా ఉంటుందని స్థానికులు హెచ్చరించారు.దీంతో వరుపుల సుబ్బారావు, చలమశెట్టి సునీల్ కలిసి అనంతబాబును కారులో ఎక్కించుకుని వెళ్లిపోయారు. అనంతబాబు దండవేయడంతో అంబేద్కర్ విగ్రహం అపవిత్రం అయ్యిందంటూ స్థానికులు అంబేడ్కర్‌ విగ్రహానికి సోమవారం రాత్రి క్షీరాభిషేకం చేశారు.