తీహార్ జైలులో కేజ్రీవాల్.. రాత్రంతా జాగారమే, పడిపోయిన షుగర్ లెవల్స్

ఢిల్లీ లిక్కర్ కేసులో ఈడీ కస్టడీ ముగియడంతో ముఖ్యమంత్రి కేజ్రీవాల్‌కు ఢిల్లీ రౌస్ అవెన్యూ కోర్టు జ్యుడిషియల్ కస్టడీ విధించింది. దీంతో అధికారులు కేజ్రీవాల్‌ను సోమవారం తీహార్ జైలుకు తరలించారు. 15 రోజుల జ్యుడీషియల్ కస్టడీలో భాగంగా మొదటి రోజు కేజ్రీవాల్‌ జైలులో చాలా ఇబ్బంది పడినట్లు జైలు అధికారులు పేర్కొన్నారు. ఇక తొలిరోజు రాత్రి కొద్దిసేపు మాత్రమే నిద్రపోయినట్లు చెప్పారు. రాత్రంతా సెల్‌లో అటూ ఇటూ తిరుగుతూ ఉన్నట్లు జైలు సిబ్బంది వెల్లడించారు. ఈ క్రమంలోనే మంగళవారం ఉదయం కేజ్రీవాల్ చాలా నీరసంగా కనిపించారని.. ఆయన షుగర్ లెవల్స్ కూడా పడిపోయినట్లు తెలిపారు.

తీహార్ జైలు జైల్ నెంబర్-2 లో అరవింద్ కేజ్రీవాల్‌ను ఒక్కరినే ఉంచారు. ఈ క్రమంలోనే ఆయనను 14 x 8 విస్తీర్ణం ఉన్న సెల్‌ కేటాయించారు. సోమవారం సాయంత్రం 4 గంటలకు కేజ్రీవాల్‌ను అధికారులు తీహార్ జైలుకు తరలించారు. జైలులోకి వెళ్లిన తర్వాత సెల్‌లోకి పంపించే ముందు కేజ్రీవాల్‌కు డాక్టర్లు మెడికల్ టెస్ట్‌లు చేశారు. ఆ సమయంలో ఆయన రక్తంలో షుగర్ లెవల్స్ 50 కంటే తక్కువ ఉన్నట్లు గుర్తించారు. దీంతో డాక్టర్ల సూచన మేరకు మందులు అందించినట్లు జైలు అధికారులు తెలిపారు. ఈ క్రమంలోనే జైలులో కేజ్రీవాల్‌కు ఒక పరుపు, దుప్పట్లు, రెండు దిండ్లు ఏర్పాటు చేసినట్లు తెలుస్తోంది. ఇక నిన్న మధ్యాహ్నం టీ, రాత్రి డిన్నర్.. ఆయన ఇంటి నుంచి తీసుకువచ్చిన ఆహారాన్ని అందించినట్లు జైలు సిబ్బంది తెలిపారు.

 ఇక సోమవారం రాత్రి కొద్దిసేపు కేజ్రీవాల్ నేలపైనే పడుకున్నారని.. ఇక నిద్ర పోకుండా సెల్‌లో అటు, ఇటు తిరుగుతూ కనిపించినట్లు జైలు వర్గాలు తెలిపాయి. మంగళవారం ఉదయం ధ్యానంతో కేజ్రీవాల్‌ తన రోజును ప్రారంభించారని పేర్కొన్నాయి. ఆ తర్వాత కేజ్రీవాల్‌కు జైలు అధికారులు టీ, రెండు బిస్కట్లు అందించారు. ఆ తర్వాత మరోసారి మెడికల్ టెస్ట్‌లు నిర్వహించగా.. షుగర్‌ లెవల్స్‌ తక్కువగా ఉన్నాయని గుర్తించారు. ప్రస్తుతం ఆయన జైలులో డాక్టర్ల పర్యవేక్షణలో ఉన్నట్లు అధికారులు వెల్లడించారు. కేజ్రీవాల్‌కు బ్లడ్ షుగర్ అదుపులోకి వచ్చే వరకు ఇంటి నుంచి తెచ్చిన ఆహారాన్ని అనుమతిస్తామని.. జైలు అధికారులు తెలిపారు.

మరోవైపు.. కేజ్రీవాల్ ఉంటున్న సెల్‌ ముందు పటిష్ఠ బందోబస్తు ఏర్పాటు చేసినట్లు జైలు అధికారులు వెల్లడించారు. కేజ్రీవాల్ సెల్ బయట జైలు వార్డర్‌తోపాటు ఇద్దరు సెక్యూరిటీ సిబ్బందిని నియమించారు. ఎమర్జెన్సీ కోసం మెడికల్ సిబ్బందిని కూడా అందుబాటులో ఉంచారు. సీసీ కెమెరాల ద్వారా కేజ్రీవాల్‌ను ఎప్పటికప్పుడు జైలు అధికారులు గమనిస్తున్నారు. ఇక కేజ్రీవాల్ చేసిన విజ్ఞప్తి మేరకు రామాయణం, భగవద్గీత, హౌ ప్రైమ్‌ మినిస్టర్స్‌ డిసైడ్‌ అనే పుస్తకాలను ఆయనకు అందించారు. దీంతోపాటు ఆయన మెడలో ఉన్న లాకెట్‌ను కూడా అనుమతించారు. ఇక కేజ్రీవాల్‌ను కలిసేందుకు ఆరుగురు వ్యక్తులకు అవకాశం కల్పించారు. కేజ్రీవాల్ భార్య సునీత, ఇద్దరు పిల్లలు, ఆయన పర్సనల్ సెక్రటరీ భిభావ్‌ కుమార్‌, ఆప్‌ జనరల్‌ సెక్రటరీ సందీప్‌ పాఠక్‌ల పేర్లను కేజ్రీవాల్‌ జైలు అధికారులకు ఇచ్చారు.