చర్యలకు సిద్ధంగా ఉండండి.... బాబా రామ్‌దేవ్‌కు సుప్రీంకోర్టు హెచ్చరిక

పతంజలి తప్పుదోవ పట్టించే ప్రకటనల కేసులో యోగా గురువు బాబా రామ్‌దేవ్, ఆ సంస్థ మేనేజింగ్ డైరెక్టర్ ఆచార్య బాలక్రిష్ణ మంగళవారం సుప్రీంకోర్టు విచారణకు హాజరయ్యారు. ఈ సందర్భంగా తమ ఆదేశాలను పాటించడంలో విఫలమైనందుకు బాబా రామ్‌దేవ్‌పై న్యాయస్థానం తీవ్ర అసహనం వ్యక్తం చేసింది. కోర్టు చర్యలకు సిద్ధంగా ఉండాలని ఇరువుర్నీ హెచ్చరించింది. క్షమాపణలు కోరుతూ పతంజలి సంస్థ ఇటీవల దాఖలు చేసిన అఫిడవిట్‌పై స్పందిస్తూ.. ‘మీ క్షమాపణల పట్ల మేం సంతృప్తి చెందలేదు’ అని వ్యాఖ్యానించింది. ఈ సందర్భంగా బాబా రామ్‌దేవ్‌ కోర్టుకు బేషరతుగా క్షమాపణలు చెప్పారు.

కానీ, వివరణపై అసంతృప్తి వ్యక్తం చేసిన కోర్టు.. వారం రోజుల్లోగా మళ్లీ కొత్తగా అఫిడ్‌విడ్ దాఖలు చేయాలని పేర్కొంది. ఏప్రిల్‌ 10న మరోసారి న్యాయస్థానం ఎదుట వ్యక్తిగతంగా హాజరుకావాలని జస్టిస్ హిమా కోహ్లి, జస్టిస్ అహ్సానుద్దీన్ అమానుల్లా ధర్మాసనం ఆదేశించింది. అంతేకాదు, కేంద్ర ప్రభుత్వం చర్యలు తీసుకోకపోవడాన్ని తప్పుబట్టింది. ‘మేము ఇంతలా ఆందోళన వ్యక్తం చేస్తుంటే.. కేంద్రం కళ్లుమూసుకుని ఉండిపోయింది’ అని ధర్మాసనం తీవ్ర వ్యాఖ్యలు చేసింది. అనంతరం తదుపరి విచారణను వాయిదా వేసింది.

ఆధునిక వైద్యవిధానాలపై తప్పుడు ప్రచారం చేస్తున్నారంటూ పతంజలి సంస్థపై సుప్రీంకోర్టులో ఇండియన్‌ మెడికల్ అసోసియేషన్‌ పరువు నష్టం దావా వేసింది. దీనిపై విచారణ చేపట్టిన కోర్టు.. గతేడాది నవంబర్‌లో ఆ సంస్థను మందలించింది. పతంజలి ఉత్పత్తులు వివిధ రకాల వ్యాధులను నయం చేస్తాయంటూ ‘అసత్య’, ‘తప్పుదోవ’ పట్టించే ప్రకటనలు ఇవ్వొద్దని, లేదంటే కోర్టు తీవ్రంగా పరిగణించాల్సి ఉంటుందని హెచ్చరించింది. ఇకపై ఎలాంటి ఉల్లంఘనలూ జరగవంటూ అప్పట్లో ఆ సంస్థ న్యాయవాది కోర్టుకు వెల్లడించారు.

అయితే, ఆ హామీని ఉల్లంఘించడంతో న్యాయస్థానం ఆగ్రహం వ్యక్తం చేసింది. వారిపై ఎందుకు చర్యలు తీసుకోకూడదో తెలియజేయాలని బాబా రామ్‌దేవ్‌, పతంజలి ఎండీ ఆచార్య బాలకృష్ణకు నోటీసులు జారీ చేసింది. ఇతర వైద్య విధానాలపై ప్రభావం చూపేలా ప్రింట్‌ లేదా ఎలక్ట్రానిక్‌ మీడియాలో ఎలాంటి ప్రకటనలు ఇవ్వొద్దని హెచ్చరించినా ఆ నోటీసులకు పతంజలి స్పందించలేదు. దీంతో వ్యక్తిగతంగా విచారణకు హాజరుకావాలని జస్టిస్‌ హిమా కోహ్లీ, జస్టిస్‌ అమానుల్లా ధర్మాసనం ఆదేశించింది.