ఆమ్ ఆద్మీ పార్టీకి సునీతా కేజ్రీవాల్ బెస్ట్ పర్సన్.. ఢిల్లీ మంత్రి ఆసక్తికర వ్యాఖ్యలు

సునీతా కేజ్రీవాల్. ఢిల్లీ సీఎం అరవింద్ కేజ్రీవాల్‌ భార్య. ఢిల్లీ లిక్కర్ కేసులో కేజ్రీవాల్‌ను ఈడీ అధికారులు అరెస్ట్ చేసేవరకు ఆమె చాలా తక్కువ మందికి మాత్రమే తెలుసు. రిటైర్డ్ ఐఆర్ఎస్ అధికారిణి అయిన సునీతా కేజ్రీవాల్.. పార్టీ కార్యక్రమాల్లో గానీ.. ప్రభుత్వ కార్యక్రమాల్లో గానీ ఎక్కువగా కనిపించేవారు కాదు. అయితే కేజ్రీవాల్ అరెస్ట్.. ఆ తర్వాత జైలుకు వెళ్లడంతో ఆమె బయటికి వచ్చారు. జైలు నుంచి కేజ్రీవాల్ అందించిన సందేశాన్ని ఆప్ కార్యకర్తలతోపాటు దేశ ప్రజలకు వినిపిస్తున్నారు. ఈ క్రమంలోనే ఒకవేళ ఢిల్లీ ముఖ్యమంత్రి పదవికి అరవింద్ కేజ్రీవాల్ రాజీనామా చేస్తే ఆ బాధ్యతలను ఆమె చేపడతారు అనే స్థాయికి చేరుకున్నారు. ఈ క్రమంలోనే ఢిల్లీ మంత్రి, ఆప్ సీనియర్ నేత సౌరభ్ భరద్వాజ్ ఆసక్తికరమైన వ్యాఖ్యలు చేశారు. ఇక సునీతా కేజ్రీవాల్ ప్రస్తుత లోక్‌సభ ఎన్నికల్లో ప్రచారం చేస్తారా అని అడిగిన ప్రశ్నకు ఆయన సమాధానం ఇచ్చారు.

అరవింద్ కేజ్రీవాల్ అరెస్ట్ అయిన తర్వాత జైలు నుంచే ఢిల్లీ ప్రభుత్వ పరిపాలనను కొనసాగిస్తున్నారు. ఈ క్రమంలోనే జైలు నుంచి ఆయన పంపిస్తున్న సందేశాలను సునీతా కేజ్రీవాల్ ప్రజలకు చేరవేస్తూ ఉన్నారు. ఈ పరిస్థితుల్లోనే ఆప్‌ను నడిపించడానికి సునీతా కేజ్రీవాల్ సరైన వ్యక్తి అని సౌరభ్ భరద్వాజ్ పేర్కొన్నారు. అరవింద్ కేజ్రీవాల్‌కు తాను దూత అని సునీతా కేజ్రీవాల్ ఎప్పుడూ చెబుతుంటారని ఆయన తెలిపారు. ఆమ్ ఆద్మీ పార్టీ రాజకీయాలు దాని మేనిఫెస్టో చుట్టూ మాత్రమే తిరుగుతాయని.. ప్రస్తుత పరిస్థితుల్లో పార్టీకి సునీతా కేజ్రీవాల్ చాలా కీలకమైన వ్యక్తి అని సౌరభ్ భరద్వాజ్ వెల్లడించారు.

ఇక లోక్‌సభ ఎన్నికల్లో ఆమ్ ఆద్మీ పార్టీ తరపున సునీతా కేజ్రీవాల్‌ ప్రచారం చేస్తారా అని అడిగిన ప్రశ్నకు సమాధానం ఇచ్చిన సౌరభ్ భరద్వాజ్.. అది జరిగితే తాము కూడా చాలా సంతోషిస్తామని చెప్పారు. అయితే ఆ నిర్ణయం పూర్తిగా సునీతా కేజ్రీవాల్ వ్యక్తిగత నిర్ణయమని వెల్లడించారు. ఇక సౌరభ్ భరద్వాజ్ చేసిన వ్యాఖ్యలు చూస్తుంటే.. కేజ్రీవాల్ తర్వాత పార్టీకి, ఢిల్లీ ప్రభుత్వానికి సునీతా కేజ్రీవాల్‌ బెస్ట్ పర్సన్ అని అర్థం అవుతోంది. ఇక ఢిల్లీ లిక్కర్ కేసులో కేజ్రీవాల్‌ను ఈడీ అధికారులు అరెస్ట్ చేసిన తర్వాత.. ఢిల్లీ ముఖ్యమంత్రి పదవి రేసులో సునీతా కేజ్రీవాల్ పేరు ప్రముఖంగా వినిపించింది. ఆమెతో పాటు ఢిల్లీ మంత్రులు అతిషి మార్లేనా, సౌరభ్‌ భరద్వాజ్ పేర్లు కూడా వినిపించాయి.