కడప గడపలో అక్కాతమ్ముళ్ల పొలిటికల్ వార్.. వివేకా హత్యకేసుపై ముదిరిన మాటలు

కడప జిల్లాలో అక్కాతమ్ముళ్ల మధ్య మాటల యుద్ధం నడుస్తోంది. వైసీపీ నేత, ఎంపీ వైఎస్ అవినాష్ రెడ్డి.. కాంగ్రెస్ చీఫ్ వైఎస్ షర్మిల మధ్య పరస్పర విమర్శలు కొనసాగుతున్నాయి. కడప లోక్ సభ స్థానం నుంచి బరిలో ఉన్న షర్మిల.. ఎన్నికల ప్రచారంలో భాగంగా వైఎస్ వివేకా హత్యకేసును పదేపదే ప్రస్తావిస్తున్నారు. అలాగే హత్యకేసులో నిందితుడిగా ఉన్న అవినాష్ రెడ్డికి టికెట్ ఎలా ఇస్తారంటూ వాగ్భాణాలు సంధిస్తున్నారు. ఈ క్రమంలోనే షర్మిల ఆరోపణలపై వైఎస్ అవినాష్ రెడ్డి శనివారం స్పందించారు. మనిషి పుట్టుకే అయితే కొంచెమైనా విజ్ఞత, విచక్షణ ఉండాలంటూ షర్మిల పేరు ఎత్తకుండానే అవినాష్ రెడ్డి ఘాటు వ్యాఖ్యలు చేశారు.

ఈ నేపథ్యంలో వైఎస్ అవినాష్ రెడ్డి మీద తీవ్రస్థాయిలో విరుచుకుపడ్డారు షర్మిల." దొంగలు భుజాలు తడుముకున్నట్లుగాఉంది అవినాష్ తీరు. మీరు త్యాగమూర్తి అయితే హంతకులతో మీకు సంబంధాలు ఎలా ఉన్నాయి? మీ కాల్ రికార్డ్స్ ఎందుకు మ్యాచ్ అవుతున్నట్లు ? హత్య మీరు చేయించకపోతే సీబీఐ విచారణ ఎందుకు వద్దన్నారు?. నేను వైఎస్ షర్మిలా రెడ్డి కాదట...నేను వైఎస్ కి పుట్టలేదట. వివేకాను సునీతా రెడ్డి హత్య చేయించిందట. హంతకులను చట్టసభలకు పంపొద్దని నేను ఎంపీ గా పోటీ చేస్తున్నా" అని షర్మిల అన్నారు.

ఇక అవినాష్ రెడ్డి పెద్ద పెద్ద మాటలు మాట్లాడుతున్నారన్న షర్మిల.. మేము బురద జల్లుతున్నామని, విజ్ఞతకే వదిలేస్తున్నామని పెద్ద మాటలు చెప్తున్నారని విమర్శించారు. ఇన్ని మాటలు చెప్పే బదులు కేసులో సంబంధం లేదు అని చెప్పొచ్చు కదా అని ప్రశ్నించారు. గూగుల్ మ్యాప్స్‌కు మీకు సంబంధం లేదని చెప్పొచ్చు కదా అని ప్రశ్నించారు. ఇళ్లంతా రక్తం ఉంటే హార్ట్ ఎటాక్‌తో చనిపోయారని ఎందుకు అబద్ధం చెప్పారని ప్రశ్నించారు.ఇదే అవినాష్ రెడ్డి కోసం అప్పట్లో తాను ఎంపీ ఎన్నికల బరి నుంచి తప్పుకున్నానని పాత విషయాన్ని షర్మిల ప్రస్తావించారు. తనకు ఎంపీ సీట్ కావాలి అనుకుంటే ఆరోజే వచ్చేదన్నారు.

అప్పట్లో అవినాష్ రెడ్డి అభ్యర్థిత్వాన్ని బలపరిచానని.. జగన్ కోసం 3200 కిలోమీటర్లు పాదయాత్ర కూడా చేశానని షర్మిల అన్నారు. ఏ ఒక్కరోజు కూడా పదవి కావాలని అడగలేదన్న షర్మిల.. ఇవాళ ఎన్నెన్నో మాట్లాడుతున్నారని అన్నారు. సునీతను, తనను అవమానిస్తున్నారని.. కనికరం లేకుండా మాట్లాడుతున్నారని ఆవేదన వ్యక్తం చేశారు. అహంకారంతో మదమెక్కిన మాటలు మాట్లాడుతున్నారన్న షర్మిల.. ప్రజలే అన్నింటికి సమాధానం చెప్తారని అన్నారు. వైఎస్ వివేకా ముందు చూపుతోనే తనను కడప ఎంపీగా పోటీ చేయాలని అడిగారన్న షర్మిల.. వివేకా మాటను ఆరోజు నేను విని ఉంటే ఇన్ని అనర్థాలు జరిగేవి కావని అభిప్రాయపడ్డారు.