భార్యతో సిద్ధాంతపరమైన సమస్య.. ఎన్నికల వేళ ఇల్లు వీడిన లోక్‌సభ అభ్యర్థి

అన్నదమ్ములు ప్రత్యర్థులుగా బరిలో దిగడం.. తండ్రీకొడుకులు వేర్వేరు పార్టీలకు ప్రాతినిధ్యం వహించడం వంటివి నిత్యం ఎన్నికల్లో చూస్తూ ఉంటాం. సరిగ్గా ఇలాంటి పరిస్థితే ఏదురైంది ఓ మహిళా ఎమ్మెల్యేకు. ఆమె కాంగ్రెస్‌ పార్టీ ఎమ్మెల్యే కాగా.. భర్త వేరే పార్టీ నుంచి లోక్‌సభ ఎన్నికల్లో పోటీచేస్తున్నారు.. దీంతో పోలింగ్‌కు కొద్ది రోజుల ముందు ఆయన అనూహ్య నిర్ణయం తీసుకున్నారు. ఎన్నికలు ముగిసే వరకు భార్యభర్తలు ఒకే ఇంట్లో ఉండకూడదని భావించి... ఆయన బయటకొచ్చేశారు. విస్తుగొలిపే ఈ ఘటన మధ్యప్రదేశ్‌లో చోటుచేసుకుంది.

మధ్యప్రదేశ్‌లోని బాలాఘాట్‌ పార్లమెంట్ సీటు నుంచి బహుజన్‌ సమాజ్‌ పార్టీ (బీఎస్పీ) అభ్యర్థిగా మాజీ ఎంపీ కాంకర్ ముంజారే పోటీ చేస్తున్నారు. ఆయన సతీమణి అనుభ ముంజేరి గతేడాది జరిగిన మధ్యప్రదేశ్ అసెంబ్లీ ఎన్నికల్లో కాంగ్రెస్‌ నుంచి పోటీచేసి బీజేపీ అభ్యర్థిపై విజయం సాధించారు. అయితే, ఆయన బీఎస్పీ నుంచి పోటీచేయడంతో వేర్వేరు పార్టీలకు చెందిన వ్యక్తులు ఒకచోట ఉండటం సమంజసం కాదని కాంకర్ భావించారు. అందుకే శుక్రవారం తన కుటుంబానికి దూరంగా ఇంటి నుంచి బయటకొచ్చేశారు. ఓటర్లు మ్యాచ్‌ ఫిక్సింగ్‌ అనుకునే ప్రమాదం ఉందని, అందుకే డ్యామ్‌ దగ్గర్లో ఓ గుడిసెలో నివాసం ఉంటున్నట్లు ఆయన తెలిపారు.

మళ్లీ ఏప్రిల్‌ 19న పోలింగ్‌ రోజునే తిరిగి ఇంటికెళ్తానని చెప్పారు. అయితే, తన భర్త నిర్ణయంపై ఎమ్మెల్యే అనుభ అసంతృప్తి వ్యక్తంచేశారు. ఆయన గోండ్వానా గణతంత్ర పార్టీ అభ్యర్థిగా పరస్వాడాలో పోటీ చేసినప్పుడు.. తాను బాలాఘాట్‌లో కాంగ్రెస్‌ నుంచి పోటీ చేశానని గుర్తుచేశారు. తమ వైవాహిక జీవితం గత 33 ఏళ్లుగా ఎంతో సంతోషంగా సాగిందన్న ఆమె.. ఎన్నికల వేళ ఇలాంటి నిర్ణయం తీసుకోవడం తనకు నచ్చలేదని ఆవేదన వ్యక్తం చేశారు. పెళ్లి తర్వాత అత్తింటిలో అడుగుపెట్టిన మహిళ.. ప్రాణం ఉన్నంత వరకూ అక్కడ ఉంటుందని అన్నారు.

అయితే, మరి ఎన్నికల్లో ఎవరికి మద్దతిస్తారని అడిగితే ఆసక్తికర సమాధానం ఇచ్చారు. తాను, మొదటి నుంచీ కాంగ్రెస్‌ మద్దతుదారునని, లోక్‌సభ ఎన్నికల్లో బాలాఘాట్‌ నుంచి పోటీ చేస్తున్న తమ పార్టీ అభ్యర్థి సామ్రాట్‌ సారస్వత్‌ గెలుపునకే కృషి చేస్తానని స్పష్టం చేశారు. ప్రచారంలో మాత్రం ఎక్కడా తన భర్త గురించి తప్పుగా మాట్లాడబోనని మాత్రం చెప్పారు.