ఎన్నికల్లో ఓటు వేసేవారికి గుడ్‌న్యూస్.. ఓటర్ ఐడీ కార్డు లేకున్నా ఓటు వేయొచ్చు

ప్రస్తుతం దేశవ్యాప్తంగా సార్వత్రిక ఎన్నికల సమరం నడుస్తోంది. లోక్‌సభతోపాటు కొన్ని రాష్ట్రాల్లో అసెంబ్లీ ఎన్నికలు కూడా జరుగుతున్నాయి. మొత్తం 7 దశల్లో ఈసారి సార్వత్రిక ఎన్నికల పోలింగ్ జరగనుంది. ఇందులో భాగంగానే తొలి విడత పోలింగ్ ఏప్రిల్ 19 వ తేదీన కొనసాగుతోంది. ఈ నేపథ్యంలోనే ఓటు వేసేందుకు జనం పోలింగ్ స్టేషన్‌లకు తరలి వెళ్తున్నారు. అయితే ఓటు వేసేందుకు ఓటర్ ఐడీ కార్డు తప్పనిసరిగా అవసరం ఉంటుంది. కానీ కొందరికి ఓటర్ లిస్ట్‌లో పేరు వచ్చినా.. ఓటర్ ఐడీ కార్డు మాత్రం జారీ కాదు. దీంతో వారు తమకు ఓటు హక్కు లేదని భావించి ఓటు వేయకుండా ఉంటారు. దీంతో ఓటింగ్ శాతం తగ్గుతుంది. అయితే ఓటర్ లిస్ట్‌లో పేరు చెక్ చేసుకుని.. ఒక వేళ అందులో పేరు ఉంటే ఓటర్ ఐడీ కార్డు లేకున్నా ఓటు వేసేందుకు అవకాశం ఉంటుంది.

ఈ నేపథ్యంలోనే ఓటరు జాబితాలో పేరు ఉండి.. ఓటర్ ఐడీ కార్డు లేని వారు ఓటు వేసేందుకు అర్హులే అని కేంద్ర ఎన్నికల సంఘం ఏప్రిల్ 2 వ తేదీన విడుదల చేసిన నోటిఫికేషన్‌లో పేర్కొంది. దీని ప్రకారం కొన్ని ప్రభుత్వం తరఫు నుంచి, ప్రభుత్వ సంస్థల తరఫు నుంచి జారీ చేసిన గుర్తింపు కార్డులను ఉపయోగించి.. ఓటరు లిస్ట్‌లో పేరు ఉన్నవారు ఓటు వేయవచ్చని తెలిపింది. అవి ఏ ఏ కార్డులో ఇప్పుడు తెలుసుకుందాం.

ఓటరు కార్డు లేకున్నా ఈ కార్డులు ఉంటే ఓటు వేయొచ్చు!

ఆధార్ కార్డు

డ్రైవింగ్ లైసెన్స్

పాన్ కార్డు

మహాత్మాగాంధీ జాతీయ ఉపాధి హామీ పథకం జాబ్ కార్డు

ఏదైనా బ్యాంకు గానీ, పోస్టాఫీస్ గానీ జారీ చేసిన పాస్‌బుక్(ఆ పాస్‌బుక్‌పై అభ్యర్థి ఫోటో తప్పకుండా ఉండాలి)

కేంద్ర కార్మిక శాఖ జారీ చేసిన హెల్త్ ఇన్సూరెన్స్ స్మార్ట్ కార్డు

నేషనల్ పాపులేషన్ రిజిస్టర్(జాతీయ పౌర పట్టిక) కింద రిజిస్ట్రార్ జనరల్ అండ్ సెన్సెస్ కమిషనర్ ఆఫ్ ఇండియా(ఆర్‌జీఐ) జారీ చేసిన స్మార్ట్ కార్డు

భారత పాస్‌పోర్టు

ఫోటోగ్రాఫ్‌తో కూడిన పెన్షన్ డాక్యుమెంట్

ప్రభుత్వ అధికారులకు సంబంధించి ఫోటోగ్రాఫ్‌తో కూడిన సర్వీస్ గుర్తింపు కార్డులు (కేంద్ర, రాష్ట్ర, ప్రభుత్వ రంగ సంస్థలు, పబ్లిక్ లిమిటెడ్ కంపెనీల ఉద్యోగులు)

ఎంపీ, ఎమ్మెల్యే, ఎమ్మెల్సీలకు ఇచ్చిన అధికారిక గుర్తింపు కార్డులు

కేంద్ర సామాజిక న్యాయ, సాధికారిక మంత్రిత్వ శాఖ నుంచి జారీ చేసిన యూనిక్ డిజేబులిటి గుర్తింపు కార్డు

ఓటరు జాబితాలో పేరు ఉంటే పైన పేర్కొన్న కార్డుల్లో ఏదైనా ఒక కార్డును చూపించి ఓటు వేయవచ్చని కేంద్ర ఎన్నికల సంఘం స్పష్టం చేసింది. ఇందుకోసం ముందుగా ఓటరు లిస్ట్‌లో పేరు ఉందా లేదా చూసుకోవాలి.

ఓటరు జాబితాలో పేరు చెక్ చేసుకోవడం ఎలా?

గూగుల్‌లో https://electoralsearch.eci.gov.in వెబ్‌సైట్ ఓపెన్ చేసి అందులో వివరాలు నమోదు చేసి మన పేరు ఓటరు జాబితాలో ఉందో లేదో చెక్ చేసుకోవాలి. ఇక ఓటర్ హెల్ప్‌లైన్ నంబర్ 1950 కు ఫోన్ చేసి కూడా మన పేరు ఓటర్ లిస్ట్‌లో పేరు ఉందో లేదో చూసుకోవచ్చు.

మెసేజ్ రూపంలో కూడా మన పేరు ఓటరు జాబితాలో ఉందో లేదో చెక్ చేసుకునే అవకాశం కూడా ఉంది. ECI అని టైప్ చేసి స్పేస్ ఇచ్చి ఓటర్ ఐడీ కార్డు నెంబర్ ఎంటర్ చేసి.. ఆ మెసేజ్‌ను 1950 కు పంపిస్తే.. మీ పేరు ఓటరు లిస్ట్‌లో ఉంటే చూపిస్తుంది. లేకపోతే లేదని చూపిస్తుంది.