చరిత్రలోనే తొలిసారి.. 60 ఏళ్లకు మిస్ యూనివర్స్ బ్యూనస్ ఎయిర్స్ కిరీటం

అందాల పోటీల్లో పాల్గొనడం అంటే సాధారణమైన విషయం కాదు. ఎన్నో దశలు దాటి అక్కడికి చేరుకోవాల్సి ఉంటుంది. 20 ఏళ్ల వయసు ఉన్న యువతులు.. తమ అందచందాలతో ర్యాంప్ వాక్ చేయడమే కాకుండా రకరకాల విభాగాల్లో పోటీ పడి అందాల కిరీటాన్ని దక్కించుకుంటారు. ఇవన్నీ తెలిసిన విషయాలే కదా.. ఇప్పుడు మళ్లీ ఎందుకు అనుకుంటున్నారా.. దానికి ఒక కారణం ఉంది. ఎందుకంటే ఓ 60 ఏళ్ల బామ్మ తాజాగా అందాల కిరీటం దక్కించుకోవడం ప్రాధాన్యం సంతరించుకుంది. మిస్ యూనివర్స్ బ్యూనస్‌ ఎయిర్స్ కిరీటాన్ని గెలుచుకున్న ఆ వృద్ధురాలు.. ఈ ఏడాది మిస్ యూనివర్స్ పోటీల్లో కూడా పాల్గొనేందుకు సిద్ధం అవుతున్నారు.

అర్జెంటీనాకు చెందిన అలెజాండ్రా మరీసా రొడ్రిగోజ్‌ అనే 60 ఏళ్ల వృద్ధురాలు.. టీనేజీ యువతులతో పోటీ పడి విజయం సాధించారు. 60 ఏళ్ల వయసులో తన అందంతో కుర్రకారు మతిపోగొడుతున్న ఈ వృద్ధురాలు.. తాజాగా మిస్‌ యూనివర్స్‌ ప్రాతినిధ్యం కోసం జరుగుతున్న పోటీల్లో కిరీటం దక్కించుకున్నారు. అర్జెంటీనాలోని బ్యూనస్‌ ఎయిర్స్‌లో ఇటీవల అందాల పోటీలు జరిగాయి. ఆ పోటీల్లో లా ప్లాటా నగరానికి చెందిన 60 ఏళ్ల అలెజాండ్రా మిస్‌ యూనివర్స్‌ బ్యూనస్‌ ఎయిర్స్‌ టైటిల్‌ను గెలుచుకుని అందర్నీ ఆశ్చర్యానికి గురి చేశారు.

దీంతో అందాల పోటీల్లో అత్యంత పెద్ద వయసులో కిరీటం పొందిన తొలి మహిళగా అలెజాండ్రా రికార్డు సృష్టించారు. లాయర్, జర్నలిస్ట్ అయిన అలెజాండ్రా.. అందాల పోటీల్లో పాల్గొనాలనే సంకల్పం ఉంటే.. దానికి వయసు అడ్డు కాదని నిరూపించారు. అంతేకాకుండా ఈ ఏడాది మే నెలలో జరగనున్న ‘మిస్‌ యూనివర్స్‌ అర్జెంటీనా’ పోటీల్లో.. అలెజాండ్రా బ్యూనస్‌ ఎయిర్స్‌ తరఫున ప్రాతినిధ్యం వహించనున్నారు. ఇక ఆ పోటీల్లో గెలిస్తే సెప్టెంబరులో మెక్సికో వేదికగా జరిగే మిస్ యూనివర్స్ 2024 పోటీల్లో అర్జెంటీనా తరఫున అలెజాండ్రా పాల్గొననున్నారు. మిస్ యూనివర్స్ బ్యూనస్ ఎయిర్స్ టైటిల్ గెలుచుకోవడంతో అలెజాండ్రా ఫోటోలు, వీడియోలు ప్రస్తుతం సోషల్ మీడియాలో తెగ వైరల్ అవుతున్నాయి.

అయితే మిస్ యూనివర్స్ పోటీల్లో గతంలో కేవలం 18 నుంచి 28 ఏళ్ల వయసు ఉన్న యువతులకు మాత్రమే అవకాశం ఉండేది. కానీ గతేడాది మిస్ యూనివర్స్ ఆర్గనైజేషన్ ఒక సంచలన నిర్ణయం తీసుకుంది. అందాల పాల్గొనే వారికి వయోపరిమితిని తొలగించింది. 18 ఏళ్లు దాటిన యువతులు, మహిళలు, వృద్ధులు ఎవరైనా సరే ఈ పోటీల్లో పాల్గొనేందుకు అవకాశం కల్పిస్తున్నారు. ఈ క్రమంలోనే ఇటీవల డొమినికన్‌ రిపబ్లికన్‌కు చెందిన 47 ఏళ్ల హైదీ క్రూజ్‌.. ఆ దేశ అందాల కిరీటం గెల్చుకున్నారు. ఇక ఈ ఏడాది మిస్ యూనివర్స్ పోటీల్లో డొమినికన్‌ రిపబ్లికన్‌ తరఫున ప్రాతినిధ్యం వహించనున్నారు.