అప్పట్లో వైఎస్ఆర్, జగన్ కోసం.. ఇప్పుడు చంద్రబాబు కోసం.. ఇదెక్కడి అభిమానం రా అయ్యా

అభిమానం వెర్రితలలు వేసిందనే సామెత ఎప్పుడైనా విన్నారా. వినకపోయినా పెద్ద ఇబ్బందేమీ లేదు కాని.. ఇతగాడి వ్యవహారం చూస్తే వినాల్సిన పనిలేదు. డైరెక్టుగా చూసేయొచ్చు. అభిమాన నేతల కోసం, అభిమాన హీరోల కోసం పొర్లుదండాలు పెట్టే ఫ్యాన్స్‌ను చూసుంటాం. గుడిలో వందలకొద్దీ టెంకాయలు కొట్టే కార్యకర్తలను చూసుంటాం. కానీ.. తన అభిమాన నేత హీరో కావాలని ఓ వ్యక్తి ఏకంగా నాలుక కోసేసుకున్నాడు. ఈ ఘటన హైదరాబాద్‌లోని శ్రీనగర్ కాలనీలో జరిగింది.

ఏపీ మొత్తం ఇప్పుడు ఎన్నికల ఫీవర్‌తో ఊగిపోతోంది. తాము అభిమానించే పార్టీలకు ఓటేయ్యడానికి పట్నం మొత్తం పల్లెకు కదిలిపోయింది. తమ ఓటు ద్వారా తమ అభిమాన నేతలకు మద్దతు తెలిపేందుకు ఓటర్లంతా నగరాన్ని వదిలి పల్లెలకు ప్రయాణం కట్టారు. ఇక ఈ ఎన్నికల్లో తమ పార్టీ గెలవాలని.. తమ నేత సీఎం కావాలని లీడర్ల, కార్యకర్తలు పూజలు కూడా షురూ చేశారు. ఈ క్రమంలోనే పశ్చిమగోదావరి జిల్లా పోలవరం మండలానికి చెందిన చెవల మహేష్ అనే వ్యక్తి సైతం ఆ దేవుడికి మొక్కుకున్నారు. అయితే అంతటితో ఊరుకోకుండా చంద్రబాబు సీఎం కావాలంటూ నాలుక కోసేసుకున్నాడు. ఈ ఘటన హైదరాబాద్ శ్రీనగర్ కాలనీలోని వేంకటేశ్వర స్వామి ఆలయం వద్ద జరిగింది. పోలీసులు వెంటనే అతన్ని ఆస్పత్రికి తరలించారు.

అయితే ఓ లేఖ ద్వారా తాను ఎందుకు నాలుక కోసుకుంది వివరించారు మహేష్. తనది పశ్చిమగోదావరి జిల్లా పోలవరం మండలం గూటల గ్రామమని చెప్పిన మహేష్.. గతంలో వైఎస్ఆర్, వైఎస్ జగన్ ముఖ్యమంత్రులు కావాలని ఇదే గుడిలో మొక్కుకున్నట్లు చెప్పారు. అప్పుడు కూడా నాలుక కోసుకుని మొక్కు తీర్చుకున్నట్లు చెప్పారు. అయితే ఇప్పుడు ఏపీలో టీడీపీ, బీజేపీ, జనసేన కూటమి అధికారంలోకి రావాలని.. చంద్రబాబు ముఖ్యమంత్రి కావాలని నాలుక కోసుకున్నట్లు లేఖలో రాసుకొచ్చారు. పవన్ కళ్యాణ్, లోకేష్ కూడా గెలవాలని నాలుక కోసుకున్నా.. అని లేఖలో మహేష్ రాసుకొచ్చారు.

అయితే మనోడి విపరీత చర్యను గమనించిన స్థానికులు వెంటనే పోలీసులకు సమాచారం అందించారు. దీంతో అక్కడకు చేరుకున్న పోలీసులు.. వెంటనే అతన్ని ఆస్పత్రికి తరలించారు. అయితే అభిమానం ఉంటే ఓటేసి గెలిపించుకోవాలి కానీ.. ఇలాంటి పిచ్చిపనులు చేస్తారా అని అక్కడున్న జనం అవాక్యయ్యారు. మొక్కులు తీర్చుకోవాలంటే టెంకాయలు కొట్టో, పొర్లుదండాలు పెట్టో తీర్చుకోవచ్చని.. ఇలాంటి చర్యలను ఏ దేవుడు కూడా కోరుకోడని అభిప్రాయపడుతున్నారు.