పోలింగ్ కేంద్రంలో ఎర్రకండువా.. ఆగ్రహంతో ఊగిపోయిన వంగా గీత.. జనసేన స్ట్రాంగ్ కౌంటర్

ఏపీలో ఎన్నికల పోలింగ్ జోరుగా సాగుతోంది. ఉదయం నుంచే ఓటర్లు పోలింగ్ కేంద్రాలకు క్యూ కడుతున్నారు. ఇక పోలింగ్ కేంద్రాల వద్ద ఉద్రిక్త పరిస్థితులు తలెత్తకుండా ఎన్నికల సంఘం కూడా ముందస్తు జాగ్రత్తలు తీసుకుంటోంది. పటిష్ఠ బందోబస్తు ఏర్పాట్లు చేస్తున్నారు. మరోవైపు రాష్ట్రవ్యాప్తంగా అందరి దృష్టి నెలకొన్న పిఠాపురం అసెంబ్లీ నియోజకవర్గంలో ఏ పరిణామం జరిగినా.. అది వెంటనే సోషల్ మీడియాలో వైరల్ అవుతోంది. తాజాగా పిఠాపురం ఎన్నికలకు సంబంధించి సోషల్ మీడియాలో ఓ వీడియో వైరల్ అవుతోంది.

పిఠాపురంలో పోలింగ్ సమయంలో ఓ వ్యక్తి.. ఎర్ర కండువ మెడలో వేసుకుని ఓటేసేందుకు పోలింగ్ కేంద్రానికి వచ్చాడు. అయితే అప్పుడే పోలింగ్ కేంద్రానికి వచ్చిన వైసీపీ అభ్యర్థి వంగా గీత.. ఈ విషయాన్ని గమనించారు. వెంటనే అతని కండువా తీసేయాలని సూచించారు. అయితే ఇది గుడ్డ మాత్రమేనంటూ.. ఆ వ్యక్తి తీసేసేందుకు నిరాకరించాడు. దీంతో కోప్పడిన వంగా గీత.. ఎర్ర కండువా తీసేయకపోతే.. తాము కూడా వైసీపీ కండువాలు మెడలో వేసుకుని పోలింగ్ కేంద్రానికి వస్తామని హెచ్చరించారు. పక్కనే ఉన్న అనుచరులకు వైసీపీ కండువాలు తీసుకురావాలంటూ ఆర్డర్ వేశారు.

అయితే ఇంతలో వారి వాగ్వాదాన్ని గమనించిన ఎన్నికల అధికారులు.. పోలింగ్ కేంద్రం లోపల నుంచి బయటకు వచ్చారు. ఆ వ్యక్తి మెడలో ఉన్న కండువాను తీసివేయించి.. అక్కడి నుంచి బయటకు పంపించివేశారు. దీంతో వివాదం సద్దుమణిగింది. అయితే వంగాగీత వార్నింగ్ ఇవ్వడాన్ని.. నెటిజన్లు వైరల్ చేస్తున్నారు. జనసైనిక్స్‌కు ఇచ్చిపడేసిందంటూ కామెంట్లు పెడుతున్నారు.

 మరోవైపు ఈ ఘటనపై జనసేన సైతం స్పందించింది. "అధికార అహంకారం తగ్గించుకోవాలి వంగా గీత గారూ.. ఎర్ర కండువా మా పార్టీ గుర్తు కాదు, అది సామాన్య శ్రామికులు చెమట తుడుచుకునే కండువా... దాన్ని చూసి ఎందుకు అంత భయపడుతున్నారు? ఎరుపు రంగు కండువా చూస్తేనే ఇంత భయం దేనికి? అంతలా కండువా భయపెడుతుందా? వారు దయచేసి ఇలాంటి బెదిరింపులు అడ్డుకోవాలని మనవి" అంటూ ట్వీట్ చేశారు. పిఠాపురం అసెంబ్లీ నియోజకవర్గంలో కూటమి తరుఫున జనసేన అధినేత పవన్ కళ్యాణ్, వైసీపీ తరుఫున వంగా గీత పోటీచేస్తున్నారు. ఇరుపార్టీలు ఎన్నికలను ప్రతిష్టాత్మకంగా తీసుకోవటంతో పిఠాపురం నియోజకవర్గంపై అందరి దృష్టి నెలకొంది.