ఎంపీగా యూసఫ్ పఠాన్ గెలుపు ఖాయమేనా..? కాంగ్రెస్ అగ్ర నేతపై టీఎంసీ అదిరిపోయే వ్యూహం

టీమిండియా మాజీ క్రికెటర్ యూసఫ్ పఠాన్ (Yusuf Pathan) లోక్ సభ ఎన్నికల బరిలో తన అదృష్టాన్ని పరీక్షించుకుంటున్నారు. బెంగాల్‌లో బహరంపూర్ నియోజకవర్గం నుంచి పోటీ చేస్తున్న ఆయన.. కాంగ్రెస్ కీలక నేత అధిర్ రంజన్ చౌధురిపై పోటీ చేస్తున్నారు. నాలుగో దశ లోక్ సభ ఎన్నికల్లో బెంగాల్‌లోని 8 నియోజకవర్గాల్లో ఎన్నికలు జరుగుతుండగా.. అందులో బహరంపూర్ కూడా ఒకటి. ముర్షీదాబాద్ జిల్లాలోని బహరంపూర్ నియోజకవర్గం నుంచి అధీర్ రంజన్ చౌధరి 1999 నుంచి వరుసగా ఐదుసార్లు ఎంపీగా విజయం సాధించారు. బెంగాల్‌లో కాంగ్రెస్‌కు పెద్ద దిక్కుగా ఉన్న ఆయన ఈసారి గట్టి పోటీని ఎదుర్కొంటున్నారు. టీఎంసీ నుంచి యూసఫ్ పఠాన్ బరిలో ఉండగా.. బీజేపీ నుంచి ప్రముఖ డాక్టర్ నిర్మల్ చంద్ర సాహా బరిలో ఉన్నారు.

ముస్లింల కోటలో పాగా కోసం టీఎంసీ స్కెచ్..

బహరంపూర్‌లో ముస్లింల జనాభా 50 శాతానికిపైనే ఉంటుంది. నియోజకవర్గంలో ముస్లింల జనాభా ఎక్కువ అయినప్పటికీ.. 1952 నుంచి ఇప్పటి వరకూ ప్రధాన పార్టీలేవీ ముస్లింలకు ఇక్కడ టికెట్ కేటాయించలేదు. దీంతో ముస్లిం మెజార్టీ నియోజకవర్గమైన బహరంపూర్ నుంచి ఇప్పటి దాకా ముస్లింలెవరూ ఎంపీలుగా ఎన్నిక కాలేదు. దీంతో టీఎంసీ అధినేత్రి మమతా బెనర్జీ ఈసారి వ్యూహాత్మకంగా యూసఫ్ పఠాన్‌ను బరిలోకి దించారు. ఇప్పటి వరకూ బహరంపూర్‌లో కాంగ్రెస్ పార్టీకి ఓటేస్తూ వచ్చిన ముస్లింలు ఈసారి తమ పార్టీ వైపు మొగ్గుతారని తృణముల్ కాంగ్రెస్ భావిస్తోంది.

కేకేఆర్ తరఫున ఆడిన పఠాన్..

యూసఫ్ పఠాన్‌ స్వస్థలం గుజరాత్‌లోని బరోడా. అయితే పఠాన్ గతంలో ఐపీఎల్‌లో కోల్‌కతా నైట్ రైడర్స్‌కు ప్రాతినిధ్యం వహించారు. దీంతో బెంగాల్ ప్రజలకు కూడా ఆయన చేరువయ్యారు. యూసఫ్ పఠాన్ తరఫున ఆయన తమ్ముడు, టీమిండియా మాజీ ఆల్‌రౌండర్ ఇర్ఫాన్ పఠాన్ సైతం ఎన్నికల ప్రచారంలో పాల్గొన్నారు.

గెలుపు ధీమాలో యూసఫ్..

పోలింగ్ రోజున యూసఫ్ పఠాన్ మాట్లాడుతూ.. యువత, మహిళలు పెద్ద సంఖ్యలో ఓటేయడానికి రావడం తనకు సంతోషం కలిగించిందన్నారు. ఇక్కడ సానుకూల వాతావరణం ఉందన్న ఆయన.. తాను భారీ మెజార్టీతో విజయం సాధిస్తాననే నమ్మకం ఉందన్నారు. ప్రజల కోసం త్యాగాలు చేయడానికి తాను సిద్ధమేనన్న యూసఫ్.. ప్రజలకు సేవ చేయడానికే తాను ఇక్కడికి వచ్చానన్నారు. ఇక్కడి ప్రజలు తనకు ఎంతో మద్దతుగా నిలిచారన్న సీనియర్ పఠాన్.. బహరంపురం ప్రజలు మార్పు కోరుకుంటున్నారన్నారు. ఓటింగ్ సమయంలో పోలింగ్ బూత్‌లను సందర్శించిన యూసఫ్ పఠాన్.. అక్కడి అధికారులు, ప్రజలతో ముచ్చటించారు.