30 ఏళ్ల కిందట చనిపోయిన చిన్నారికి పెళ్లి.. వరుడి కోసం పేపర్లో ప్రకటన

పెళ్లి సంబంధాల కోసం మాట్రిమోనియల్ వెబ్‌సైట్‌లలోనే కాదు వార్తా పత్రికల్లో ప్రకటనలు ఇస్తుంటారు. కానీ, ఓ కుటుంబం ఇచ్చిన విచిత్రమైన ప్రకటన చూసి జనం అవాక్కవుతున్నారు. మూడు దశాబ్దాల కిందట చనిపోయిన తమ కుమార్తెకు తగిన వరుడి ‘ఆత్మ’ కావాలని ప్రకటన ఇచ్చింది. దక్షిణ కన్నడలోని పుత్తూరుకు చెందిన ఒక కుటుంబం స్థానిక దినపత్రికలో ఇచ్చిన ఈ ప్రత్యేకమైన ప్రకటన చర్చనీయాంశంగా మారింది. సంప్రదాయ ‘కులే మదిమే’ లేదా ‘ప్రేత మదువే (ప్రేతాత్మల వివాహం)’ వేడుక నిర్వహించడం కోసం 30 ఏళ్ల మరణించిన తమ చిన్నారికి తగిన వరుడ్ని కోరుతూ కన్నడలో ప్రకటన వెలువడింది.

కర్ణాటక లోని తుళునాడులో (దక్షిణ కన్నడ, ఉడుపి జిల్లాలు) ఓ విచిత్రమైన సాంప్రదాయం ఉంది. ఆ ప్రాంతంలో చాలా మంది ప్రేతాత్మలకు వివాహాలు జరిపిస్తుంటారు. ప్రత్యేకంగా తుళు మాసంలోనే ఇలాంటి కార్యక్రమాలు జరిపిస్తారు. ఈ మాసంలో ఇవి తప్ప మరే శుభకార్యాలను నిర్వహించరు. ఈ నేపథ్యంలో వారం రోజుల కిందట ఓ కుటుంబం ప్రకటన ఇచ్చింది.

‘బంగేరా గోత్రం, కులూల్ సామాజిక వర్గానికి చెందిన అమ్మాయికి వరుడు కావాలి.. 30 ఏళ్ల కిందట ఆమె చనిపోయింది.. 30 సంవత్సరాల కిందట మరణించిన అదే కులం, వేరే గోత్రం అబ్బాయి ఉంటే.. ఆ కుటుంబం ప్రేతాత్మ పెళ్లి నిర్వహించడానికి సిద్ధంగా ఉంటే సంప్రదించవచ్చు’ అని ఫోన్ నంబర్‌తో ప్రకటన ఇచ్చింది. ప్రకటన ఇచ్చిన కుటుంబసభ్యుడు ఒకరు టైమ్స్ ఆఫ్ ఇండియాతో మాట్లాడుతూ.. గత సోమవారం ఈ ప్రకటన ఇచ్చినట్టు తెలిపాడు. అయితే, పేపర్లో వచ్చిన ఈ యాడ్‌ను సోషల్ మీడియాలో కొందరు షేర్ చేశారని చెప్పాడు.

ప్రకటనకు స్పందించి 50 మంది వరకూ తమను సంప్రదించారని, ఈ కార్యక్రమం నిర్వహించేందుకు త్వరలోనే తేదీని నిర్ణయిస్తామని పేర్కొన్నారు. అంతేకాదు, గత ఐదేళ్లుగా సరైన సంబంధం కోసం ప్రయత్నిస్తున్నట్టు వివరించారు. ‘సోషల్ మీడియాలో మా యాడ్‌ను పెట్టడంతో మమ్మల్ని ట్రోల్ చేస్తారేమోనని భయపడ్డాం కానీ ఆశ్చర్యకరంగా ఈ ఆచారంపై చాలా అవగాహనకు కారణమైంది... ఆసక్తికరమైన విషయం ఏంటంటే వివిధ కులాలకు చెందిన చాలా మంది మమ్మల్ని సంప్రదించి దీని గురించి మరింత సమాచారం తెలుసుకున్నారు’ అని తెలిపాడు.