సింహాచలం వెళ్లే భక్తులకు గుడ్‌న్యూస్.. తిరుమల తరహాలోనే ఇక్కడ, ఇక హ్యాపీగా
Andhra Pradesh Telugu | Suryaa Desk | Published : Sat, May 18, 2024, 07:51 PM
సింహాచలం అప్పన్న ఆలయానికి వెళ్లే భక్తులకు శుభవార్త. కొండపైకి వెళ్లేందుకు రెండు నూతన ఎలక్ట్రిక్ బస్సులు ప్రారంభమయ్యాయి. ఆలయ అనువంశిక ధర్మకర్త పూసపాటి అశోక్ గజపతిరాజు, ఈవో శ్రీనివాసమూర్తిల చేతుల మీదుగా బస్సులు ప్రారంభించారు. భక్తుల సౌకర్యార్ధం ప్రకృతి వనరులను సోలార్ పవర్ ద్వారా విద్యుత్‌తో నడిచే వాహనాలు అవసరం అన్నారు అశోక్‌గజపతిరాజు. అందుకోసమే రెండు బస్సులను కొనుగోలు చేసి భక్తులకు అందుబాటులోకి తీసుకొచ్చామని.. ప్రస్తుతం బస్సు టికెట్ పెంచే యోచన లేదన్నారు.
గతంలో సాధారణ బస్సు టికెట్ రూ.15 ఉందని.. ఇప్పుడు అదే టికెట్ రేటుతో ఏసీ బస్సుల్లో భక్తుల్ని సింహగిరికి చేరుస్తున్నామన్నారు అశోక్ గజపతిరాజు. ఈ బస్సు సాధ్యాసాధ్యాలను పరిశీలించి.. కాలుష్యం లేని మరిన్ని వాహనాలను కొనుగోలు చేస్తామన్నారు. ఈ ఎలక్ట్రిక్ బస్సు ఖరీదు ఒక్కొక్కటి రూ.కోటి 65 లక్షలు కాగా.. ఛార్జింగ్ సమయం 2.30 గంటలు. ఈ బస్సులకు ఒకసారి ఛార్జింగ్ చేస్తే 225 కిలోమీటర్లు ప్రయాణం చేయొచ్చు. ఈ రెండు బస్సులను కొద్దిరోజులు పర్యవేక్షించి.. అనంతరం మరిన్ని బస్సుల కొనుగోలుపై నిర్ణయం తీసుకోనున్నారు.
|
|