యువకులే టార్గెట్.. రూ.లక్షల్లో జీతాలంటూ వల.. ఆపై విదేశాలకు తీసుకెళ్లి దారుణాలు

సైబర్ నేరగాళ్లు రోజురోజుకూ రెచ్చిపోతున్నారు. నిరుద్యోగులకు ఉద్యోగాల పేరిట వలవేసి దారుణాలకు పాల్పడుతున్నారు. విదేశాల్లో ఉద్యోగాలని చెప్పి.. యువకులను విదేశాలకు అక్రమంగా రవాణా చేస్తున్న వైనం తాజాగా వెలుగుచూసింది. విదేశాల్లో ఉద్యోగాలని చెప్పి.. కాంబోడియాకు మనుషులను విక్రయిస్తున్న ముఠాను విశాఖపట్నం పోలీసులు అదుపులోకి తీసుకున్నారు. దీనికి సంబంధించిన వివరాలను విశాఖపట్నం పోలీసు కమిషనర్‌ రవిశంకర్‌ వెల్లడించారు.

విశాఖ పోలీసులు తెలిపిన వివరాల ప్రకారం.. గాజువాకకు చెందిన చుక్క రాజేష్ అనే వ్యక్తి గతంలో కొన్నిరోజులు గల్ఫ్‌లో ఫైర్ అండ్ సేఫ్టీ మేనేజర్‌గా పనిచేశారు. ఆ అనుభవంతోనే ఫైర్ సేఫ్టీ చదివిన యువకులను విదేశాలకు పంపేవాడు. అయితే 2023లో సంతోష్ అనే వ్యక్తి రాజేష్‌కు పరిచయమయ్యాడు. కాంబోడియాలో ఉద్యోగాలు ఉన్నాయని చెప్పి నిరుద్యోగులను అక్కడికి పంపుదామని రాజేష్‌తో చర్చించాడు. ఒక్కొక్కరి నుంచి రూ.90 వేలు తీసుకుని.. తాను చెప్పే వ్యక్తికి రూ.70 వేలు ఇచ్చి మిగతా రూ.20 వేలు నువ్వు తీసుకో అంటూ రాజేష్‌కు సలహా ఇచ్చాడు.

ఆ ప్రకారం సంతోష్, రాజేష్ ఇద్దరూ పరస్పర అవగాహనతో 27 మందిని కాంబోడియా పంపించారు. ఆ తర్వాత ఆర్య, హబీబ్ అనే మరో ఇద్దరు ఏజెంట్లు రాజేష్‌కు పరిచయమయ్యారు. వారు ఇంకా ఎక్కువ మొత్తంలో కమిషన్ ఆశచూపించడంతో.. రాజేష్ మరో 150 మందిని కాంబోడియాకు పంపించారు. కాంబోడియాలో ఉద్యోగాలు ఉన్నాయని చెప్పి.. ఒక్కొక్కరి దగ్గర రూ.1.50 లక్షలు తీసుకుని వీరందరినీ కాంబోడియాకు పంపించాడు రాజేష్. అయితే ఇలా ఉద్యోగం మీద ఆశతో కాంబోడియా వెళ్లిన వారిని అక్కడి ఏజెంట్లు.. కంపెనీలకు అమ్మేస్తూ వచ్చారు.

ఇక్కడి నుంచి కాంబోడియా వెళ్లినవారితో సైబర్ నేరాలు చేయిస్తూ వచ్చారు. ఈ విషయం తెలిసినప్పటికీ.. నిరుద్యోగ యువతకు చెప్పకుండా ఉద్యోగాలు ఉన్నాయని చెప్పి రాజేష్.. కాంబోడియాకు పంపించాడు. అక్కడికి చేరుకోగానే అక్కడి ఏజెంట్లు వీరిని కాంబోడియా కంపెనీలకు అమ్మేస్తూ వచ్చారు. ఆ తర్వాత వీరిని చైనా కంపెనీలు తమ అదుపులోకి తీసుకుని, వ్యసనాలకు బానిసలను చేశారు. వీరితో సైబర్ నేరాలు చేయిస్తూ వచ్చారు. అయితే విశాఖకు చెందిన ఓ బాధితుడు వీరి బారి నుంచి తప్పించుకుని ఏపీ పోలీసులకు ఫోన్ చేయడంతో అసలు బాగోతం బయటకు వచ్చింది. బాధితుడి నుంచి సమాచారం అందుకున్న పోలీసులు.. దర్యాప్తు జరిపి ముగ్గురు ఏజెంట్లను అదుపులోకి తీసుకున్నారు.

అయితే ఉద్యోగాల పేరు చెప్పి విశాఖపట్నం, రాజమండ్రి, శ్రీకాకుళం నుంచి గత రెండేళ్లలో వందలమందిని కాంబోడియా పంపినట్లు దర్యాప్తులో తేలిందని విశాఖ పోలీస్ కమిషనర్ రవిశంకర్ తెలిపారు. ఈ మనుషుల అక్రమ రవాణా వ్యవహారాన్ని కాంబోడియాలోని భారతీయ రాయబార కార్యాలయం దృష్టికి తీసుకెళ్తామని శనివారం వెల్లడించారు.

అయితే ఆంధ్రప్రదేశ్‌లో మనుషుల అక్రమ రవాణా జరుగుతోందని..తమ పార్టీ అధినేత పవన్ కళ్యాణ్ గతంలోనే చెప్పారని జనసేన శ్రేణులు ట్వీట్లు చేస్తున్నాయి. నాడు నిజం చెప్తే నిష్టూరమైందని.. అదే నిజమని నేడు రుజువైందని ట్వీట్లు చేస్తున్నారు. పవన్ కళ్యాణ్ మనుషుల అక్రమ రవాణా గురించి చెప్తే.. కేంద్ర నిఘా సంస్థల సమాచారం అని వెటకారం చేశారంటూ కామెంట్లు పెడుతున్నారు.