మెగా ఫ్యామిలీపై పిఠాపురం వైసీపీ అభ్యర్థి వంగా గీత కీలక వ్యాఖ్యలు

ఏపీ ఎన్నికల్లో అందరి దృష్టిని ఆకర్షించిన నియోజకవర్గం పిఠాపురం అసెంబ్లీ నియోజకవర్గం. ఏపీ ఎన్నికల్లో చాలామంది ప్రముఖులు పోటీచేసినప్పటికీ.. పిఠాపురం సీటు మీద ఉన్నంత ఆసక్తి మరే ఇతర నియోజకవర్గంపైనా లేకపోయింది. మీడియా నుంచి రాజకీయ విశ్లేషకుల వరకూ అందరి చూపూ పిఠాపురంపైనే. జనసేన అధినేత పవన్ కళ్యాణ్ పోటీచేస్తూ ఉండటం ఒకెత్తయితే.. పవన్ కళ్యాణ్‌ను ఓడించేందుకు వైసీపీ వంగా గీతను బరిలోకి నిలపడం మరో ఎత్తు. అందుకే నామినేషన్ వేసిన దగ్గర నుంచి ప్రచారం ముగిసే వరకూ పిఠాపురం పేరు మార్మోగిపోయింది. ఇక ప్రచారంలో చివరి రోజున పిఠాపురంలో వంగా గీత గెలిస్తే డిప్యూటీ సీఎం చేస్తానంటూ వైఎస్ జగన్ హామీ ఇవ్వడం.. పిఠాపురంలో పొలిటికల్ హీట్‌ను మరింత పెంచింది.

అయితే పిఠాపురం ఎన్నికల సందర్బంగా ఇటు జనసేన తరుఫున పవన్ కళ్యాణ్, వైసీపీ నుంచి వంగా గీత హోరాహోరీగా తలపడ్డారు. ప్రచారం దగ్గర నుంచి పోల్ మేనేజ్‌మెంట్ వరకూ ఒకరికొకరు ఏమాత్రం తగ్గకుండా చేశారు. దీంతో పిఠాపురంలో రికార్డు స్థాయిలో పోలింగ్ నమోదైంది. అయితే పిఠాపురం ఓటర్లు ఎవరి వైపు మొగ్గు చూపారనేదీ జూన్ నాలుగో తేదీన వెల్లడయ్యే ఫలితాల్లో తేలనుంది. ఇప్పటికే పవన్ కళ్యాణ్‌కు భారీ మెజారిటీ ఖాయమని కూటమి నేతలు ప్రచారం చేస్తుంటే.. వంగా గీతదే విజయమంటూ వైసీపీ కూడా సోషల్ మీడియాలో ప్రచారం షురూ చేసింది.

ఈ పరిణామాల నేపథ్యంలోనే వంగా గీత పవన్ కళ్యాణ్ గురించి కీలక వ్యాఖ్యలు చేశారు. రాజకీయాలకి అతీతంగా తమకు మెగా కుటుంబం అంటే ఎప్పటికీ అభిమానమేనని వంగా గీత చెప్పుకొచ్చారు. పవన్ కళ్యాణ్‌పై వ్యక్తిగత విమర్శలు ఎప్పుడు చేయలేదని., మా నియోజకవర్గంలో ఎవరైనా చేసినా కూడా ఒప్పుకోనని చెప్పుకొచ్చారు. దీనికి సంబంధించి ఆడియో సోషల్ మీడియాలో వైరల్ అవుతోంది. "రాజకీయాలకు అతీతంగా అన్నయ్యగారంటే (మెగాస్టార్ చిరంజీవి) మాకు అభిమానం. వాళ్లు ఎవరన్నా మాకు గౌరవం ఎక్కువ. వాళ్లకు కూడా నా గురించి తెలుసు. రాజకీయం వేరు, మిగతావి వేరు. నాకు అన్నయ్యగారంటే చాలా గౌరవం. మెగాస్టార్ ఫ్యామిలీ అందరి మీద కూడా అంతే గౌరవం. నాగబాబు గారైనా, ఎవరైనా సరే. ఎన్నికలప్పుడు కూడా మా నియోజకవర్గంలో వ్యక్తిగత విమర్శలు లేవు. మేము వ్యక్తిగత విమర్శలు చేయం, చేస్తే ఒప్పుకోం" అని వంగా గీత చెప్పారు.

మరోవైపు వంగా గీత గతంలోనూ పిఠాపురం అసెంబ్లీ నియోజవర్గం నుంచి ఎమ్మెల్యేగా గెలుపొందారు. తెలుగుదేశం పార్టీలో రాజకీయ జీవితం ప్రారంభించిన వంగా గీత.. చిరంజీవి స్థాపించిన ప్రజారాజ్యం పార్టీలో చేరారు. అనంతరం 2009 ఎన్నికల్లో పిఠాపురం నుంచి ప్రజారాజ్యం పార్టీ తరుఫున ఎమ్మెల్యేగా గెలుపొందారు. ఆ తర్వాత ప్రజారాజ్యం పార్టీ కాంగ్రెస్‌లో విలీనమైనప్పుడు.. వంగా గీత కూడా కాంగ్రెస్ పార్టీలో చేరిపోయారు.2019లో వైసీపీలో చేరిన వంగా గీత.. 2024 అసెంబ్లీ ఎన్నికల్లో పిఠాపురం నుంచి ఆ పార్టీ తరుఫున బరిలోకి దిగారు.