బాలికలతో బలవంతపు వ్యభిచారం.. డీఎస్పీ సహా 8 మంది ప్రభుత్వ ఉద్యోగులు అరెస్ట్

అంతర్ రాష్ట్ర వ్యభిచార ముఠా గుట్టురట్టు చేశారు అరుణాచల్ ప్రదేశ్ పోలీసులు. అయితే, ఈ రాకెట్‌‌లో స్వయంగా ఓ పోలీస్ ఉన్నతాధికారి, మరి కొందరు ప్రభుత్వ ఉద్యోగుల పాత్ర ఉండటం గమనార్హం. డీఎస్పీ, ప్రభుత్వ అధికారులతో సహా 21 మందిని పోలీసులు అరెస్టు చేశారు. ముఠా బారి నుంచి 10-15 ఏళ్లలోపు ఐదుగురు మైనర్ బాలికలను రక్షించినట్లు తెలిపారు. అరెస్టైనవారిలో డీఎస్పీ బులంద్ మారిక్, ఆరోగ్య విభాగం డిప్యూటీ డైరెక్టర్ డాక్టర్ సెన్లాయ్ రొనియా తదితరులు ఉన్నారని పేర్కొన్నారు. పది రోజుల పాటు వరుస దాడులు నిర్వహించి, నిందితులను అదుపులోకి తీసుకున్నారు.

పోలీసుల కథనం ప్రకారం.. రాజధాని ఇటానగర్‌లో బ్యూటీ పార్లర్‌ను నిర్వహిస్తోన్న అనియా, జమ్లో తగౌంగ్ అనే ఇద్దరు మహిళలు అసోంలోని ధేమాజీ, ఉదల్‌గురి నుంచి మైనర్ బాలికలను అరుణాచల్‌ ప్రదేశ్‌కు తీసుకొచ్చారని ఎస్పీ రోహిత్ రాజ్‌బీర్ సింగ్ పేర్కొన్నారు. చింపులో మైనర్ బాలికలతో వ్యభిచారం నిర్వహిస్తున్నట్టు మే 4న పక్కా సమాచారం రావడంతో పోలీసులు రంగంలోకి దిగారు. సోదాలు నిర్వహించి, పలువురిని అదుపులోకి తీసుకుని, ముగ్గురు మైనర్లను వారి చెర నుంచి రక్షించారు. ఉద్యోగాలని నమ్మబలికి ధేమాజీ నుంచి తీసుకొచ్చిన తర్వాత తమను బలవంతంగా వ్యభిచారం కూపంలోకి నెట్టారని బాధితులు వాపోయారు.

ఈ వ్యవహారంపై కేసు నమోదు చేసి దర్యాప్తు చేపట్టిన పోలీసులు.. చైల్డ్‌ వెల్ఫేర్‌ కమిషన్‌కు సమాచారం అందించారు. మరో ఇద్దరు మైనర్లు కూడా బ్యూటీపార్లర్ నడుపుతోన్న మహిళల అధీనంలో ఉన్నట్లు విచారణలో గుర్తించారు. మరో బాలికను వేరే ప్రాంతానికి తరలించినట్లు తెలుసుకున్నారు. ప్రస్తుతం వీరందరినీ రక్షించి వసతి గృహానికి తరలించారు. వ్యభిచార గృహ నిర్వహణతో సంబంధం ఉన్న మొత్తం 10 మంది పోలీసులకు చిక్కారు. ఐదుగురు ప్రభుత్వ అధికారులు సహా 11 మంది విటులను అరెస్టు చేశారు. బాధితులను 2020 నుంచి 2023 మధ్య ఉద్యోగం పేరుతో తీసుకొచ్చి బలవంతంగా వ్యభిచారం చేయిస్తున్నారని పోలీసులు పేర్కొన్నారు. వీరిలో ఒక బాలికను 8 ఏళ్ల వయసులో ఉన్నప్పుడు 2020లో తీసుకొచ్చారని చెప్పారు. ఆ చిన్నారి వారి నుంచి తప్పించుకున్నా.. మళ్లీ 2022లో వీరికి చిక్కిందని ఎస్పీ అన్నారు. బాధితుల వైద్య నివేదికల్లో దిగ్భ్రాంతికర వాస్తవాలు వెలుగులోకి వచ్చాయి.

ముగ్గురు మైనర్లలో లైంగిక సంపర్కం ద్వారా సంక్రమించే వ్యాధికారక వైరల్ లోడ్ తీవ్రంగా ఉందని వెల్లడయ్యింది. మరో ఇద్దరు బాలికలు తమను ధెమాజీ నుంచి పుష్పాంజలి మిలి అలియాస్ టుటు మిలి, పూర్ణిమ మిలి అనే ఇద్దరు అక్కాచెల్లెళ్లు తమను తీసుకొచ్చి బలవంతంగా వ్యభిచారంలోకి దింపారని కన్నీటిపర్యంతమయ్యారు. నిందితుల్లో కానిస్టేబుల్ తోయ్ బగ్రా, పబ్లిక్, గ్రామీణాభివృద్ధి విశాగం ఏఈ, జేఈలు ఉన్నారు.