హనీట్రాప్‌లోకి లాగి.. దారుణంగా చంపి.. బంగ్లాదేశ్ ఎంపీ కేసులో వెలుగులోకి షాకింగ్ విషయాలు

వైద్యం కోసం వచ్చి అదృశ్యమైన.. ఆపై హత్యకు గురైన బంగ్లాదేశ్‌ ఎంపీ మహమ్మద్‌ అన్వర్‌ ఉల్‌ అనర్‌ కేసు దర్యాప్తులో భయానక విషయాలు వెలుగులోకి వస్తున్నాయి. ఆయన్ను హానీట్రాప్‌‌లోకి లాగి.. హత్య చేసినట్లు దర్యాప్తు అధికారులు అనుమానిస్తున్నారు ఈ కేసులో బంగ్లాదేశ్ నుంచి వచ్చిన అక్రమ వలసదారుడ్ని బెంగాల్ పోలీసులు అరెస్టు చేశారు. ఎంపీని హత్యచేసిన అనంతరం మృతదేహాం ఆనవాళ్లు దొరక్కుండా ఉండేందుకు నిందితులు దారుణంగా ప్రవర్తించారని తెలుస్తోంది. ఆయన చర్మాన్ని ఒలిచి.. ముక్కలుగా నరికినట్లు పోలీసులు అనుమానిస్తున్నారు.

అన్వర్‌ను హత్యచేసినట్టు భావిస్తున్న ఇంటి వద్ద సీసీటీవీ దృశ్యాలను పోలీసులు పరిశీలించారు. అమెరికాలో ఉంటోన్న తన స్నేహితుడు అద్దెకు తీసుకున్న న్యూటౌన్‌ హాల్‌ ప్రాంతంలోని అపార్ట్‌మెంట్‌లోకి ఇద్దరు పురుషులు, ఒక మహిళతో కలిసి వెళ్లిన బంగ్లా ఎంపీ.. ఆ తర్వాత బయటకు రాలేదని గుర్తించారు. ‘బంగ్లాదేశ్ ఎంపీ అన్వర్ ఉల్ అనర్‌ను మహిళతో వలపువల విసిరి అపార్ట్‌మెంట్‌లోకి రప్పించి ఉంటారని ప్రాథమికంగా నిర్దారించాం.... అన్వర్ ఫ్రెండ్‌కి ఆ మహిళ సన్నిహితురాలే.. ఫ్లాట్‌లోకి వెళ్లగానే ఆయనను హత్య చేసి ఉంటారని అనుమానిస్తున్నాం’ అని బెంగాల్‌ సీఐడీ అధికారి ఒకరు వెల్లడించారు.

ఇప్పటి వరకు లభ్యమైన సాక్ష్యాలను పరిశీలిస్తే ఎంపీని తొలుత గొంతునులిమి చంపి, తర్వాత ఆయన మృతదేహాన్ని ముక్కలుగా నరికి ఉంటారని భావిస్తున్నామని పోలీసులు తెలిపారు. ‘ఆయన చర్మాన్ని ఒలిచారు... ఎముకలను విరిచేశారు.. దుర్మాసన రాకుండా ఉండేందుకు వాటికి పసుపు పూసినట్లుగా అనిపిస్తోంది.. కొన్ని శరీర భాగాలను ఫ్రిజ్‌లో దాచిపెట్టినట్లు ప్రాథమికంగా నిర్ధరించాం.. అక్కడి నుంచి నమూనాలను సేకరించాం.. ప్లాస్టిక్‌ బ్యాగుల్లో శరీర భాగాలను తీసుకుని వివిధ ప్రదేశాల్లో విసిరేసి ఉంటారు’ అని పోలీసులు పేర్కొన్నారు.

మరోవైపు, బంగ్లాదేశ్‌ నుంచి వచ్చిన అక్రమ వలసదారుడు జిహాద్‌ హవల్దార్‌ను పోలీసులు ముంబయిలో అరెస్ట్ చేశారు. ఈ హత్యలో అతడు కీలక పాత్ర పోషించినట్టు పోలీసులు చెప్పారు. ‘‘ఎంపీని హత్య చేసి ఆయన మృతదేహాన్ని గుర్తించే వీల్లేకుండా ముక్కలుగా చేసినట్టు నిందితుడు హవల్దార్‌ అంగీకరించాడు.. ఈ ఘటన వెనుక ప్రధాన సూత్రధారి ఎంపీ పాత స్నేహితుడు బంగ్లా సంతతికి చెందిన అమెరికన్ అఖ్తరుజ్దమాన్‌ అని చెప్పాడు.. సుపారీగా రూ. 4 కోట్లు ఇచ్చాడని, అతడి సూచనలతో తాను ఈ పనిచేసినట్లు విచారణలో నిందితుడు బయటపెట్టాడు ’’ అని సీఐడీ వర్గాలు వివరించాయి. జెనైదాలోని కొట్‌చంద్‌పూర్ మునిసిపాలిటీ మేయర్‌ తమ్ముడే ఈ అఖ్తరుజ్దమాన్‌ అని పోలీసులు పేర్కొన్నారు.

మే 12న సాయంత్రం బంగ్లాదేశ్ నుంచి కోల్‌కతాకు వచ్చిన మహమ్మద్‌ అనర్‌.. తన స్నేహితుడు గోపాల్ బిశ్వాస్ ఇంట్లో బస చేశారు. ఆ మర్నాడు హాస్పిటల్ పని ఉందని చెప్పి బయటకు వెళ్లిన ఆయన తిరిగి రాలేదు. ఆ తర్వాత నుంచి తన ఫోన్‌కు అన్వర్ స్పందించకపోవడంతో గోపాల్ ఆందోళనకు గురయ్యాడు. దీంతో పోలీసులకు ఫిర్యాదు చేయగా.. మిస్సింగ్ కేసు నమోదయ్యింది. బంగ్లా ఎంపీ కోసం పోలీసులు విస్తృతంగా గాలించడంతో హత్య ఉదంతం వెలుగులోకి వచ్చింది.