అంబానీ వారింట పెళ్లికి.. విశాఖ నుంచి అరుదైన బహుమతి

రిలయన్స్ ఇండస్ట్రీస్ అధినేత ముకేష్ అంబానీ చిన్న కుమారుడు అనంత్ అంబానీ మరికొన్ని రోజుల్లో పెళ్లి పీటలు ఎక్కనున్నారు. ఇప్పటికే ప్రీ వెడ్డింగ్ షూట్ జరగ్గా.. ఇప్పుడు రెండోసారి కూడా ప్రీ వెడ్డింగ్ షూట్ నిర్వహించేందుకు ఏర్పాట్లు జరుగుతున్నాయి. మే 28 నుంచి 30 వరకు అనంత్ అంబానీ, రాధిక మర్చంట్‌ల ప్రీవెడ్డింగ్ షూట్ విదేశాల్లో జరగనుంది. అయితే అనంత్ అంబానీ పెళ్లిని పురస్కరించుకుని విశాఖపట్నానికి చెందిన ఓ కళాకారుడు అరుదైన బహుమతిని సిద్ధం చేశారు. వివాహం సందర్భంగా ఈ గిఫ్టును వారికి పంపేందుకు ఏర్పాట్లు చేసుకుంటున్నారు.

విశాఖపట్నానికి చెందిన మోకా విజయ్ కుమార్ అనే కళాకారుడు చిరుధాన్యాలతో అనంత్ అంబానీ, రాధికా మర్చంట్‌ల చిత్రపటాన్ని రూపొందించారు. పూర్తిగా చిరుధాన్యాలను ఉపయోగించి సుమారు పదిరోజుల పాటు శ్రమించి ఈ ఫోటోను ఆయన తయారు చేశారు. అనంత్ అంబానీ పెళ్లి సందర్భంగా త్వరలోనే ఈ అరుదైన కానుకను ఆయనకు పంపనున్నట్లు మోకా విజయ్ కుమార్ చెప్తున్నారు. అయితే మోకా విజయ్ కుమార్ ఇలాంటి కళాకృతి తయారు చేయడం ఇదే మొదటిసారి కాదు. జొన్నలు, గంట్లు, అరికలు, రాగులు, నల్ల నువ్వులు వంటి వాటితో ఇప్పటికే పలు చిత్రాలను ఆయన రూపొందించారు.

భారతీయ రైల్వేలో టెక్నీషియన్‌‌గా పనిచేస్తున్న మోకా విజయ్ కుమార్..చిరుధాన్యాలతో దేశం గర్వించే నాయకులు, పారిశ్రామికవేత్తల చిత్రాలను తయారు చేశారు. విశాఖపట్నం వేదికగా గతేడాది గ్లోబల్ ఇన్వెస్టర్ సమ్మిట్ జరిగింది. ఈ సదస్సులో చిరుధాన్యాలతో మోకా విజయ్ కుమార్ రూపొందించిన పలు ఛాయాచిత్రాలను ప్రదర్శించారు. ప్రధాని నరేంద్ర మోదీ, ముఖ్యమంత్రి వైఎస్ జగన్ మోహన్ రెడ్డి సహా పలువురు ప్రముఖుల చిత్రాలను చిరుధాన్యాల సాయంతో మోకా విజయ్ కుమార్ రూపొందించిన వైనం అందరి చేత శెభాష్ అనిపించుకుంది.