ఏపీ ఎన్నికలకు ఐపీఎల్‌కు లింక్,,,2014 సెంటిమెంట్ ఇప్పుడు తెరపైకి

ఐపీఎల్ అంటే ఇండియన్ ప్రీమియర్ లీగ్.. అదే రాజకీయాల్లో అయితే ఇండియన్ పొలిటికల్ లీగ్ అని కొందరు ప్రస్తావిస్తుంటారు. ఇండియన్ ప్రీమియర్ లీగ్‌లో కోల్‌కతా నైట్ రైడర్స్ ట్రోఫీని దక్కించుకుంటే.. ఇండియన్ పొలిటికల్ లీగ్‌ (సార్వత్రిక ఎన్నికల్లో)లో గెలుపు ఎవరదనే ఉత్కంఠ ఉంది.. ఈ పొలిటికల్ లీగ్‌లో గెలుపెవరిదో తేలాలంటే జూన్ 4 వరకు ఆగాలి.. ముఖ్యంగా దేశవ్యాప్తంగా అందరి కళ్లు ఆంధ్రప్రదేశ్ ఎన్నికల ఫలితాలపైనే ఉంది.

ఇలాంటి సమయంలో ఒక ఆసక్తికర చర్చకు సోషల్ మీడియా వేదికైంది. కోల్‌కతా విజయానికి, ఏపీ ఎన్నికల ఫలితాలకు ముడిపెడుతూ కొందరు ఆసక్తికర విశ్లేషణ చేస్తున్నారు. ఐపీఎల్‌లో కోల్‌కతా కప్పు గెలుచుకోవడానికి.. ఆంధ్రప్రదేశ్‌ ఎన్నికల ఫలితాలకు సంబంధం ఏంటనే కదా మీ అనుమానం. అవును సోషల్ మీడియాలో తెరపైకి కొత్త లెక్కల్ని తీసుకొస్తున్నారు. గత చరిత్రను గమనించాలంటూ కొత్త లాజిక్ చెబుతున్నారు.. ఐపీఎల్ ఫైనల్ మ్యాచ్ తర్వాత సోషల్ మీడియాలో కొందరు నెటిజన్ల ట్వీట్‌లు, పోస్ట్‌లు వైరల్ అవుతున్నాయి.

ప్రస్తుతం కోల్‌కతా నైట్ రైడర్స్ విజయం గురించి మాట్లాడుకోవడానికి ముందు.. 2014 ఐపీఎల్ ఫైనల్‌ను ఒకసారి గుర్తుచేసుకోవాలి. 2014‌లో ఐపీఎల్ పూర్తయిన తర్వాత ఏపీ ఎన్నికల ఫలితాలు విడుదలయ్యాయి. 2014లో ఐపీఎల్ ట్రోఫీని కోల్‌కతా నైట్ రైడర్స్ గెలుచుకుంది. గౌతమ్ గంభీర్ సారథ్యంలోని KKR.. ఫైనల్ మ్యాచ్‌లో కింగ్స్ ఎలవెన్ పంజాబ్‌పై ఘన విజయం సాధించి కప్పు కైవసం చేసుకుంది. ఆ తర్వాత అదే ఏడాది జరిగిన ఆంధ్రప్రదేశ్ ఎన్నికల్లో టీడీపీ విజయం సాధించి అధికారంలోకి వచ్చింది. అంటే, కోల్‌కతా గెలిచింది.. టీడీపీ అధికారంలోకి వచ్చింది. ఇదే విషయాన్ని గుర్తుచేస్తూ.. 2024 ఎన్నికల ఫలితాలకు ముడిపెడుతున్నారు.

2014లో కోల్‌కతా ఐపీఎల్ ట్రోఫీని గెలవగా.. ఏపీ ఎన్నికల్లో టీడీపీ విజయాన్ని అందుకుంది. 2024లో కూడా అదే రిపీట్ అవుతుందనే లాజిక్‌ను తెరపైకి తెస్తున్నారు కొందరు నెటిజన్లు. కోల్‌కతా గెలిచింది కాబట్టి ఇప్పుడు టీడీపీ కూడా గెలుస్తుందని అంటున్నారు. 2014 నాటి సీన్ పక్కాగా మళ్లీ రిపీట్ అవుతుందంటున్నారు. ఈ అంశంపై సోషల్ మీడియాలో ప్రస్తుతం మంచి చర్చ జరుగుతోంది.. కొందరు ఈ అంశాన్ని ప్రస్తావిస్తూ ట్వీట్లు చేశారు. టీడీపీ, వైసీపీ అభిమానుల మధ్య కామెంట్ల బుల్లెట్లు పేలుతున్నాయి.

అంతేకాదు మరికొందరు ఏకంగా దేశవ్యాప్తంగా జరుగుతున్న సార్వత్రిక ఎన్నికలకు కూడా లింక్ పెడుతున్నారు. 2014లో కోల్‌కతా నైట్ రైడర్స్ ఫైనల్‌లో గెలిచి ట్రోఫీని అందుకుందని.. 2014 ఎన్నికల్లో బీజేపీ కేంద్రంలో అధికారంలోకి వచ్చిందని గుర్తు చేస్తున్నారు. 2024లో కూడా ఐపీఎల్‌ ఫైనల్‌లో కోల్‌కతా గెలిచి కప్ దక్కించుకుంది కాబట్టి.. 2024 ఎన్నికల్లో బీజేపీ మరోసారి అధికారంలోకి రావడం ఖాయమంటున్నారు. మొత్తానికి కోల్‌కతా ఐపీఎల్ ట్రోఫీని గెలుచుకోవడానికి.. ఇటు ఆంధ్రప్రదేశ్, అటు కేంద్రంలో అధికారంలోకి వచ్చే పార్టీలకు లింక్ ఉందంటూ అంచనాలు వేస్తున్నారు.

మరికొందరు నెటిజన్లు క్రికెట్‌కు రాజకీయాలకు లింక్ ఉండదనే అభిప్రాయాన్ని వ్యక్తం చేస్తున్నారు. కొన్ని సందర్భాల్లో ఇలాంటి లాజిక్‌లు నిజమవుతాయని.. ప్రతిసారీ అలా జరుగుతుందనడం సరికాదంటున్నారు. క్రికెట్‌లో బాగా ఆడిన జట్టు విజయం సాధిస్తుందని.. రాజకీయాల్లో ప్రజల అభిమానాన్ని గెలుచుకున్న పార్టీకే అధికారం దక్కుతుందంటున్నారు. మరి 2014 సీన్ రిపీట్ అవుతుందా లేదా అన్నది తేలాలంటే జూన్ 4 వరకు ఆగాల్సిందే.