ఢిల్లీ మంత్రి అతిషికి సమన్లు.. అరెస్ట్ చేస్తారని తాను ముందే చెప్పానన్న కేజ్రీవాల్

బీజేపీ, ఆమ్ ఆద్మీ పార్టీ మధ్య చాలా రోజులుగా తీవ్ర మాటల యుద్ధం నడుస్తోంది. ఈ క్రమంలోనే ఢిల్లీలో అధికారంలో ఉన్న ఆప్ ప్రభుత్వాన్ని పడగొట్టాలని బీజేపీ చూస్తోందని ఆ పార్టీ చాలాసార్లు తీవ్ర విమర్శలు గుప్పించింది. మరోవైపు.. ఆప్ ఎమ్మెల్యేలను కోట్లు పెట్టి కొనుగోలు చేసేందుకు.. బీజేపీ నేతలు ప్రయత్నాలు చేస్తున్నారని.. ఆప్ నేతలు ఇప్పటికే ఎన్నోసార్లు ఆరోపించారు. ఈ క్రమంలోనే తమ పార్టీ ఎమ్మెల్యేలను కొనుగోలు చేసేందుకు బీజేపీ ప్రయత్నిస్తోందంటూ.. ఆ పార్టీ సీనియర్ నాయకురాలు, ఢిల్లీ మంత్రి అతిషి మార్లేనా గతంలో చేసిన వ్యాఖ్యలపై ఢిల్లీ రౌస్ అవెన్యూ కోర్టు మంగళవారం ఆమెకు సమన్లు జారీ చేసింది. దీనిపై కేజ్రీవాల్ ట్వీట్ చేశారు.

ఇక పరువు నష్టం కేసులో అతిషి మార్లేనాకు ఢిల్లీ రౌస్ అవెన్యూ కోర్టు సమన్లు జారీ చేయడంపై ఢిల్లీ సీఎం అరవింద్‌ కేజ్రీవాల్‌ ట్విటర్‌లో స్పందించారు. ఆమ్ ఆద్మీ పార్టీలో తర్వాత అరెస్ట్ అతిషి మార్లేనాదేనని తాను ముందే చెప్పానని.. ఇప్పుడు ఆ దిశగానే వాళ్లు ప్లాన్‌ చేస్తున్నారని తీవ్ర స్థాయిలో మండిపడ్డారు. ఇది పూర్తిగా నియంతృత్వమని ఆరోపించారు. పూర్తిగా నకిలీ, తప్పుడు కేసుల్లో తమ పార్టీ నేతలను అందర్నీ ఒక్కొక్కరిగా అరెస్ట్ చేస్తున్నారని ధ్వజమెత్తారు. ఈ ఎన్నికల్లో గెలిచి మరోసారి నరేంద్ర మోదీ అధికారంలోకి వస్తే.. ప్రతిపక్ష నేతలందరినీ ఒకరి తర్వాత ఒకరిని అరెస్ట్ చేస్తారని ఆరోపించారు. ఆప్‌ ముఖ్యం కాదని.. నియంతృత్వం నుంచి మన దేశాన్ని కాపాడుకోవడం ముఖ్యని కేజ్రీవాల్ ట్వీట్ చేశారు.

ఆమ్ ఆద్మీ పార్టీలో గెలిచిన ఎమ్మెల్యేలను ప్రలోభాలకు గురి చేసి.. వారికి భారీగా డబ్బులు ఇచ్చి కొనుగోలు చేసేందుకు ప్రయత్నించిందని.. అతిషి మార్లేనా గతంలో తీవ్ర ఆరోపణలు చేశారు. ఒక్కో ఎమ్మెల్యేను కొనుగోలు చేసేందుకు ఏకంగా రూ.25 కోట్లు ఆఫర్ చేశారని ఆరోపించారు. అయితే ఈ ఆరోపణలను బీజేపీ తీవ్రంగా ఖండించింది. అంతేకాకుండా ఈ ఆరోపణలపై బీజేపీ మీడియా విభాగం హెడ్‌ ప్రవీణ్ శంకర్ కపూర్‌.. అతిషి మార్లేనాపై పరువు నష్టం కేసు దాఖలు చేశారు.

అయితే ఈ పరువు నష్టం కేసులో ప్రతివాదిగా అరవింద్ కేజ్రీవాల్‌ పేరును కూడా ప్రవీణ్ శంకర్ కపూర్ ప్రస్తావించినా.. ఆయనకు మాత్రం ఎలాంటి నోటీసులు కోర్టు ఇవ్వలేదు. ఆ కేసుపై మంగళవారం విచారణ జరిపిన ఢిల్లీ రౌస్ అవెన్యూ కోర్టు.. జూన్‌ 29 వ తేదీన విచారణకు హాజరుకావాలని అతిషికి ఆదేశాలు జారీ చేసింది.