లోక్‌సభ ఎగ్జిట్‌పోల్స్ వేళ కాంగ్రెస్ పార్టీ సంచలన నిర్ణయం

దేశవ్యాప్తంగా గత 2 నెలలుగా సాగుతున్న సార్వత్రిక ఎన్నికల ప్రక్రియ ముగింపు దశకు చేరుకుంది. శనివారం చివరిదైన 7 వ దశ ఎన్నికలు జరగనున్నాయి. ఆ తర్వాత జూన్ 4 వ తేదీన దేశంలో లోక్‌సభతోపాటు పలు రాష్ట్రాల అసెంబ్లీ ఎన్నికల ఫలితాలు వెల్లడి కానున్నాయి. ఈ క్రమంలోనే తుది దశ పోలింగ్ ముగియనున్న శనివారం రోజే ఎగ్జిట్ పోల్స్ అంచనాలు వెలువడనున్నాయి. శనివారం సాయంత్రం 6.30 గంటలకు ఎగ్జిట్‌ పోల్స్ విడుదల చేయనున్నారు. అయితే ఎగ్జిట్ పోల్స్ విడుదల కానున్న వేళ.. హస్తం పార్టీ కీలక నిర్ణయం తీసుకుంది. ఎగ్జిట్ పోల్స్ వెల్లడించిన అనంతరం టీవీ ఛానళ్లలో నిర్వహించే డిబేట్లలో పాల్గొనకూడదని కాంగ్రెస్ పార్టీ నిర్ణయించింది.

7 విడతలుగా దేశంలో లోక్‌సభ ఎన్నికలు జరిగాయి. ఈ నేపథ్యంలోనే ప్రస్తుతం అధికారంలో ఉన్న నరేంద్ర మోదీ నేతృత్వంలోని ఎన్డీఏ కూటమి హ్యాట్రిక్ సాధిస్తుందా లేక.. దాదాపు 30 పార్టీల కలయికతో ఏర్పడిన ఇండియా కూటమి నెగ్గి అధికారాన్ని దక్కించుకుంటుందా అనేది స్పష్టం కావాలంటే జూన్ 4 వ తేదీ వరకు ఆగాల్సిందే. అయితే ఈ ఫలితాలపై ఓ అంచనాకు వచ్చేందుకు మాత్రం ఎగ్జిట్ పోల్స్ చాలా కీలకం. ఆ ఎగ్జిట్ పోల్స్ శనివారం సాయంత్రం 6.30 గంటల తర్వాత వెల్లడి కానున్నాయి.

ఇక ఎగ్జిట్ పోల్స్ వెల్లడైన తర్వాత నేషనల్, లోకల్ ఛానెళ్లలో విస్తృతంగా డిబేట్లు జరుగుతాయి. ఈ లోక్‌సభ ఎగ్జిట్ పోల్ చర్చల్లో పాల్గొనకూడదని కాంగ్రెస్ పార్టీ ఒక నిర్ణయం తీసుకుంది. ఈ మేరకు కాంగ్రెస్ పార్టీ అధికార ప్రతినిధి, మీడియా విభాగం ఛైర్మన్ పవన్ ఖేరా వెల్లడించారు. టీవీ ఛానళ్లు టీఆర్పీల కోసం చెప్పే ఊహాహానాల్లో మునిగిపోకూడదని పవన్ ఖేరా తెలిపారు. దేశంలోని కోట్లాది మంది ఓటర్లు తమ ఓటు హక్కును వినియోగించుకున్నారని.. వారి తీర్పు ఖాయం అయిందని చెప్పారు.

అంతేకాకుండా జూన్ 4 వ తేదీన లోక్‌సభ ఎన్నికల ఫలితాలు వెలువడనున్నాయని.. దానికి ముందు టీఆర్పీల కోసం ఊహాగానాలు, స్లగ్‌ఫెస్ట్‌లో మునిగిపోవడానికి కాంగ్రెస్ పార్టీకి ఎటువంటి కారణం కనిపించడం లేదని పవన్ ఖేరా స్పష్టం చేశారు. భారత జాతీయ కాంగ్రెస్ ఎగ్జిట్ పోల్స్‌పై చర్చల్లో పాల్గొనదని పేర్కొన్నారు. ఏ చర్చ ఉద్దేశ్యమైనా ప్రజలకు తెలియజేయడమేనని తెలిపారు. జూన్ 4 వ తేదీన ఫలితాలు వెల్లడయ్యాక నిర్వహించే చర్చల్లో సంతోషంగా పాల్గొంటామని పవన్ ఖేరా ఓ ప్రకటన విడుదల చేశారు. అయితే కాంగ్రెస్ పార్టీలో సంప్రదింపులు చేసిన తర్వాతే ఈ నిర్ణయం తీసుకున్నట్లు విశ్వసనీయ వర్గాల ద్వారా తెలుస్తోంది.