రెండు రోజుల్లో జైలుకు.. అరవింద్ కేజ్రీవాల్ భావోద్వేగం

మద్యం పాలసీలో మనీల్యాండరింగ్ ఆరోపణలతో అరెస్టయిన ఢిల్లీ ముఖ్యమంత్రి అరవింద్ కేజ్రీవాల్‌కు సుప్రీంకోర్టు ఇచ్చిన మూడు వారాల మధ్యంతర బెయిల్ శనివారంతో (జూన్ 1) ముగియనుంది. బెయిల్‌ను మరో వారం రోజుల పాటు పొడిగించాలన్న కేజ్రీవాల్ విజ్ఞప్తిని సర్వోన్నత న్యాయస్థానం తోసిపుచ్చింది. దీంతో ఆదివారం (జూన్ 2న) ఢిల్లీ సీఎం తిరిగి జైలు వెళ్లనున్నారు. ఈ నేపథ్యంలో సోషల్ మీడియాలో ఆమ్ ఆద్మీ పార్టీ అధినేత భావోద్వేగమైన వీడియోను పోస్ట్ చేశారు.

ఒకవేళ తాను దేశం కోసం చనిపోతే...ఎవరూ బాధపడొద్దని అన్నారు. 50 రోజుల పాటు జైలులో ఉండటంతో ఆరోగ్యం చాలా వరకూ క్షీణించిందని, బరువు తగ్గిపోయానని ఆయన తెలిపారు. చక్కెర వ్యాధికి ఔషధాలు తీసుకోడానికి కూడా తనకు అనుమతి ఇవ్వలేదని ఆరోపించారు. నియంతృత్వం నుంచి దేశాన్ని కాపాడేందుకు తాను జైలుకు వెళ్లడం గర్వంగా ఉందని అన్నారు.

‘‘రేపటికి (జూన్ 1)కి 21 రోజులు పూర్తవుతాయి.. ఆ మర్నాడు నేను జైలుకు వెళ్తాను.. ఈసారి ఎన్ని రోజులు జైల్లో ఉంటానో నాకు తెలియదు.. కానీ, నా ఉత్సాహం ఇంకా ఎక్కువవుతుంది.. నియంతృత్వం నుంచి దేశాన్ని కాపాడేందుకు తాను జైలుకు వెళ్తున్నాను.. అందుకు గర్వంగా ఉంది.. వారు నన్ను చాలాసార్లు నన్ను చాలాసార్లు విచ్ఛిన్నం చేయడానికి ప్రయత్నించారు.. కానీ ఏం చేయలేకపోయారు.. నేను జైల్లో ఉన్నప్పుడు పలు రకాలుగా వేధించారు.. ఔషధాలు ఇవ్వకుండా అడ్డుకున్నారు..20 ఏళ్లుగా నేను డయాబెటిస్‌తో బాధపడుతున్నాను.. పదేళ్ల నుంచి రోజుకు నాలుగుసార్లు ఇన్సులిన్ తీసుకుంటున్నాను.. కానీ, జైల్లో ఉండగా చాలా రోజులు నాకు ఇన్సులెన్స్ ఆపేశారు.. దీంతో రక్తంలో చక్కెర స్థాయిలు 300 నుంచి 325కి చేరాయి.. కొద్ది రోజుల పాటు ఇదేస్థాయిలో చక్కర ఉంటే కిడ్నీలు, కాలేయం దెబ్బతింటాయి.. వాళ్లు ఏం చేయాలనుకుంటున్నారో.. ఎందుకు ఇలా చేస్తున్నారో నాకు తెలియదు’ అని కేజ్రీవాల్ అన్నారు.

‘ఆదివారం మధ్యాహ్నం 3 గంటలకు ఇంటి నుంచి వెళ్లి సరెండర్ అవుతాను.. ఈసారి వేధింపులతో పాటు హింసించే అవకాశం ఉంది.. అయినా నేను తలవంచను.. నేను ఎక్కడ ఉన్నా ఢిల్లీ పనులు నిలిచిపోనివ్వను. మీ ఉచిత కరెంటు, మొహల్లా క్లినిక్‌లు, ఆసుపత్రులు, ఉచిత మందులు, చికిత్స, 24 గంటల కరెంటు ఇంకా అనేకం కొనసాగుతాయి.. జైలు నుంచి తిరిగి వచ్చిన తర్వాత నేను ప్రతి తల్లికి, సోదరికి ప్రతి నెలా రూ.1000 పథకం మొదలుపెడతాను.. జైలుకు వెళ్లే సమయానికి 70 కిలోల ఉండే నా బరువు ప్రస్తుతం 64 కిలోలు ఉంది ’ అని అన్నారు.