ప్లీజ్ దయచేసి అలా తీసుకోవద్దు.. నాకు చాలా భయంగా ఉంది

ఏపీ ఎన్నికల్లో టీడీపీ విజయం తర్వాత తనకు బెదిరింపులు ఎక్కువగా వస్తున్నాయంటూ నటి, యాంకర్ శ్యామల ఆరోపించారు. టీడీపీ, జనసేన కార్యకర్తల నుంచి తను బెదిరింపులు వస్తు్న్నాయని.. దయచేసి ఎవరూ వ్యక్తిగతంగా తీసుకోవద్దంటూ సోషల్ మీడియాలో వీడియో రిలీజ్ చేశారు. ఏపీ అసెంబ్లీ ఎన్నికల్లో వైసీపీ తరుఫున యాంకర్ శ్యామల ప్రచారం చేశారు. పిఠాపురంలో జనసేన అధినేత పవన్ కళ్యాణ్‌కు వ్యతిరేకంగా ప్రచారం చేశారు. వంగా గీతకు మద్దతుగా క్యాంపెయిన్ చేసిన శ్యామల.. పవన్ మీద విమర్శలు గుప్పించారు. అయితే ఎన్నికల్లో టీడీపీ కూటమి విజయం సాధించింది. దీంతో ఎన్నికల ఫలితాలపై శ్యామల స్పందించారు. ఎన్నికల్లో ఏపీ ప్రజలు ఇచ్చిన తీర్పును స్వాగతిస్తున్నానని చెప్పారు. ఎన్నికల క్షేత్రంలో ప్రజల తీర్పే అంతిమమనీ.. ఈ ఎన్నికల్లో విజయం సాధించిన కూటమికి శుభాకాంక్షలు తెలియజేశారు. అయితే కూటమి విజయం తర్వాత తనకు బెదిరింపులు వస్తున్నాయని శ్యామల ఆరోపించారు.

"వైసీపీ గెలుపు కోసం కష్టపడిన ప్రతి కార్యకర్త, వైసీపీ కుటుంబానికి పేరుపేరునా ధన్యవాదాలు. ఓడిపోయాం కానీ.. ఒకటి గుర్తుపెట్టుకోవాలి. గెలిచినప్పుడు ఏనాడూ విజయ గర్వంతో విర్రవీగలేదు. ఓడిపోయినప్పుడు కుంగిపోలేదు. అలాగే ఈసారి వైఎస్ కూడా జగన్ మోహన్ రెడ్డి గారు మరింత బలాన్ని పుంజుకుని.. మీ అందరి మద్దతుతో గెలుస్తారు. మనం అందరం ఆయన వెంట నడిస్తే మంచి ప్రభుత్వంగా ఏర్పాటవుతాం. ఎప్పటికీ జగన్ అన్నతోనే ఉంటా. ఈ ఐదేళ్లు ఏపీకి మంచి జరగాలని కోరుకుంటున్నా. జై వైసీపీ.. జై జగన్" అని యాంకర్ శ్యామల చెప్పుకొచ్చారు.

"బెదిరిస్తూ చాలా కాల్స్ వస్తున్నాయి. ఒక రకంగా భయమేస్తోంది. మీకు ఒకటి నచ్చుతుంది.. నాకు ఒకటి నచ్చుతుంది. అలా అని మీకు నచ్చంది నాకు నచ్చిందని నేను బతకడానికి వీల్లేదంటే చాలా అన్యాయం. దయచేసి ఏదీ వ్యక్తిగతంగా తీసుకోవద్దు. నేను ఎవరినీ వ్యక్తిగతంగా అనలేదు. ఎవరిపై వ్యక్తిగత విమర్శలు ఎప్పుడూ చేయలేదు. నాకు చాలా గౌరవం. మీరు కూడా వ్యక్తిగతంగా తీసుకోవద్దు. ఒక పార్టీని గెలిపించేందుకు ఎంత చేయాలో అంత చేశా.. అప్పుడు కూడా ఉన్నదే చెప్పాను. లేనిది ఎక్కడా మాట్లాడలేదు. దయచేసి దాన్ని అర్థం చేసుకుంటారని కోరుకుంటున్నా".. అని ఎక్స్ వేదికగా యాంకర్ శ్యామల ట్వీట్ చేశారు.

 అయితే యాంకర్ శ్యామల కొత్త డ్రామాలకు తెరలేపారని టీడీపీ మహిళా నేత ఉండవల్లి అనూష విమర్శించారు. చంపేస్తామని బెదిరిస్తున్నారంటూ సింపతీ డ్రామాలకు ప్రయత్నిస్తున్నారని ఆరోపించారు. నిజంగా బెదిరింపు కాల్స్ వస్తే పోలీస్ స్టేషన్‌లో ఫిర్యాదు చేయాలి కానీ.. సోషల్ మీడియాలో సింపతీ డ్రామాలు ఆడొద్దని హెచ్చరించారు. పవన్ కళ్యాణ్ మీద వ్యాఖ్యలు, పిల్లి పిట్ట కథలు చెప్పింది మాకు గుర్తులేదా అంటూ అనూష ఉండవల్లి చెప్పుకొచ్చారు. అలాగే టీడీపీ నేతలకు, క్యాడర్‌కు నిన్ను పట్టించుకునేంత అర్హత నీకు లేదంటూ విమర్శించారు.