మోదీ పట్టాభిషేక మహోత్సవానికి విశిష్ఠ అతిథులు.. వేదిక, ముహూర్తం ఖరారు

ముచ్చటగా మూడోసారి నరేంద్ర మోదీ ప్రధానమంత్రిగా ప్రమాణ స్వీకారం చేసేందుకు రంగం సిద్ధమైంది. జూన్ 9 వ తేదీన సాయంత్రం ప్రధానమంత్రిగా నరేంద్ర మోదీ ప్రమాణం చేయనున్నారు. ఈ వేడుకకు సంబంధించి ఇప్పటికే అన్ని ఏర్పాట్లు అంగరంగ వైభవంగా జరుగుతున్నాయి. ఇక ప్రధానమంత్రి పట్టాభిషేక మహోత్సవానికి వివిధ వర్గాల వారికి ఇప్పటికే ఆహ్వానాలు పంపించారు. భారత్‌కు పొరుగున ఉన్న దేశాల అధినేతలకు కూడా ఆహ్వానాలు అందాయి. ఇక ఎన్డీఏ కూటమిలోని నేతలు, పలు రాష్ట్రాల ముఖ్యమంత్రులు, ప్రతిపక్ష సభ్యులు.. సినీ, క్రీడా, బిజినెస్ సహా పలు రంగాల ప్రముఖులు హాజరు కానున్నారు. దాదాపు 7000 నుంచి 8000 మంది ఈ కార్యక్రమంలో పాల్గొననున్నారు.

ఆదివారం సాయంత్రం ఢిల్లీలో జరగనున్న ప్రమాణ స్వీకార కార్యక్రమానికి దేశంలోని కొందరు ప్రత్యేక వ్యక్తులను కూడా బీజేపీ ఆహ్వానించింది. గత ఏడాది పూర్తయిన కొత్త పార్లమెంటు భవన నిర్మాణంలో పాల్గొన్న శ్రామికులు, పారిశుద్ధ్య కార్మికులు, వందే భారత్ సహా రైల్వే శాఖలోని కీలక ప్రాజెక్టుల్లో పనిచేసిన వారు, పలువురు ట్రాన్స్‌జెండర్లను కూడా ప్రధాని ప్రమాణ స్వీకారానికి ఆహ్వానం పలికారు. భారత దేశ అభివృద్ధికి తమ వంతు కృషి చేస్తున్న ఇలాంటి రంగాల వారిని నరేంద్ర మోదీ తన ప్రమాణ స్వీకార కార్యక్రమానికి ప్రత్యేకంగా ఆహ్వానించారు.

‘ప్రధానమంత్రి నరేంద్ర మోదీ అధికారంలోకి వచ్చినప్పటి నుంచి దేశ రాజకీయాల్లో గణనీయమైన మార్పులు చోటుచేసుకున్నాయి. బలమైన దేశ నిర్మాణంలో పాలుపంచుకున్న ప్రతీ ఒక్కరి సహకారాన్ని ప్రధానమంత్రి గౌరవిస్తారని ఎన్డీఏ కూటమి నేతలు తెలిపారు. ప్రత్యేక కార్యక్రమాలకు వీఐపీలు, వీవీఐపీలకు మాత్రమే ఆహ్వానాలు పంపే రోజులు పోయాయని.. నరేంద్ర మోదీ.. అట్టడుగు వర్గాల్లో వారిని కూడా వీఐపీలుగానే చూస్తారని పేర్కొన్నారు. తాను మూడోసారి ప్రధానిగా ఎన్నికైన వెంటనే దేశాన్ని మరింత అభివృద్ధి చేయడానికి నిరంతరం కృషి చేస్తానని ఎన్నికల ప్రచారంలో నరేంద్ర మోదీ ప్రకటించారు. 2047 నాటికి భారత్‌ను అభివృద్ధి చెందిన దేశాలతో సమానంగా నిలబెట్టడమే తన లక్ష్యమని.. తాను సమయాన్ని వృథా చేసే వ్యక్తిని కాదని చెప్పారు.

ఇక ఆదివారం జరిగే ప్రధానమంత్రి పట్టాభిషేక కార్యక్రమానికి ఇప్పటికే వివిధ దేశాధినేతలు తమకు ఆహ్వానాలు అందినట్లుగా ప్రకటించారు. బంగ్లాదేశ్ ప్రధానమంత్రి షేక్ హసీనా, శ్రీలంక అధ్యక్షుడు రణిల్ విక్రమసింఘే, నేపాల్ ప్రధాని పుష్ప కమాల్ దహాల్ ప్రచండ, భూటాన్ రాజు జిగ్మే ఖేసర్ నామ్‌గేల్ వాంగ్‌చుక్ వంటి విదేశీ నేతలు ప్రధాని ప్రమాణ స్వీకారానికి హాజరు కానున్నారు. ఇటీవల భారత్‌తో వివాదం ఉన్న మాల్దీవులు అధ్యక్షుడు మహమ్మద్ ముయిజ్జూకు కూడా ఆహ్వానం అందించారు. మారిషస్ ప్రధానమంత్రి ప్రవింద్ జుగ్నాథ్‌ను కూడా ఆహ్వానించనున్నట్లు సమాచారం.