ఎన్నికల్లో ఇండియా కూటమి ఓటమి.. రాహుల్ గాంధీకి కీలక పదవి

లోక్‌సభ ఎన్నికల్లో ఇండియా కూటమి అధికారం సాధించడానికి అవసరమైన సీట్లకు కొద్ది దూరంలో ఆగిపోయింది. అదే సమయంలో అటు బీజేపీకి సొంతంగా మెజార్టీ రాకపోవడంతో మిత్రపక్షాలతో అధికారాన్ని ఏర్పాటు చేసేందుకు సిద్ధమైంది. ఈ క్రమంలోనే ఇండియా కూటమి కూడా అధికారాన్ని ఏర్పాటు చేసేందుకు ప్రయత్నాలు చేసినా.. అవి ఇప్పటివరకు ఫలించకపోవడంతో.. ప్రతిపక్షంలోనే కూర్చుంటామని ప్రకటించింది. అయితే ఇండియా కూటమి ఓడిపోయినా.. కలిసికట్టుగా పోరాటం సాగించాయని కూటమి నేతలు వెల్లడించారు. ఈ సమయంలోనే కాంగ్రెస్ పార్టీ అగ్రనేత రాహుల్ గాంధీకి కీలక పదవి అప్పగించాలని నిర్ణయించుకున్నారు.

ఇండియా కూటమి ప్రతిపక్ష పాత్ర పోషించనున్న నేపథ్యంలో లోక్‌సభలో ప్రతిపక్ష నేతగా ఉండాలని కాంగ్రెస్ వర్కింగ్ కమిటీ సమావేశంలో కాంగ్రెస్ పార్టీ నేతలు రాహుల్‌ గాంధీని కోరారు. శనివారం ఢిల్లీలో జరిగిన సీడబ్ల్యూసీ సమావేశంలో ఈ మేరకు నిర్ణయం తీసుకున్నారు. సీడబ్ల్యూసీ సమావేశం ముగిసిన తర్వాత కాంగ్రెస్ పార్టీ జాతీయ ప్రధాన కార్యదర్శి కేసీ వేణుగోపాల్‌, పార్టీ అధికార ప్రతినిధి జైరామ్‌ రమేశ్‌ మీడియాతో మాట్లాడుతూ ఈ విషయాన్ని వెల్లడించారు.

రాహుల్ గాంధీ లోక్‌సభలో ప్రతిపక్ష నేతగా వ్యవహరించాలని సీడబ్ల్యూసీ సమావేశంలో తాము ఏకగ్రీవంగా ప్రతిపాదన చేశామని కేసీ వేణుగోపాల్‌ తెలిపారు. అయితే తాము చేసిన ప్రతిపాదనపై ఆలోచించి నిర్ణయం తీసుకుంటానని రాహుల్‌ గాంధీ చెప్పినట్లు కేసీ వేణుగోపాల్ వెల్లడించారు. సాధ్యమైనంత త్వరలో తన నిర్ణయాన్ని వెల్లడిస్తానని రాహుల్ గాంధీ చెప్పారని పేర్కొన్నారు. ఇక ఈ లోక్‌సభ ఎన్నికల్లో కేరళలోని వయనాడ్, ఉత్తర్‌ప్రదేశ్‌లోని రాయ్‌బరేలీలో రెండు చోట్లా గెలిచిన రాహుల్‌గాంధీ ఏ స్థానానికి రాజీనామా చేస్తారని మీడియా అడిగిన ప్రశ్నకు కేసీ వేణుగోపాల్ సమాధానం ఇచ్చారు.

రాయ్‌బరేలీ, వయనాడ్‌ నుంచి గెలిచిన రాహుల్‌ గాంధీ రెండు నియోజకవర్గాల్లో ఏదో ఒక స్థానాన్ని వదులుకునేందుకు ఈ నెల 15 వ తేదీ వరకు గడువు ఉందని.. కానీ ఈ 3, 4 రోజుల్లో రాహుల్ గాంధీ నిర్ణయం తీసుకుంటారని కేసీ వేణుగోపాల్‌ చెప్పారు. నితీష్ కుమార్‌ ఇండియా కూటమి వైపు వస్తే ప్రధానమంత్రి పదవి ఇస్తామని ఆఫర్‌ చేసినట్లు జేడీయూ నేత కేసీ త్యాగి పేర్కొన్నారని మీడియా అడిగిన ప్రశ్నకు.. ఆ విషయం తనకు తెలియదని తెలిపారు.