నితీష్ కుమార్‌కు ప్రధానమంత్రి పదవి ఆఫర్ ఇచ్చిన ఇండియా కూటమి

ఇటీవల వెలువడిన లోక్‌సభ ఎన్నికల్లో బీజేపీ సొంతంగా మెజార్టీ మార్కును అందుకోలేకపోయింది. ఈ నేపథ్యంలోనే ఎన్డీఏ కూటమిలోని మిగిలిన పార్టీల మద్దతుతో కేంద్రంలో మూడోసారి ప్రభుత్వాన్ని ఏర్పాటు చేసేందుకు బీజేపీ ప్రభుత్వం సిద్ధమైంది. ఆదివారం సాయంత్రం నరేంద్ర మోదీ మూడోసారి ప్రధానమంత్రిగా ప్రమాణ స్వీకారం చేయనున్నారు. అయితే ఎన్డీఏ కూటమిలో చంద్రబాబు నాయుడు, నితీష్ కుమార్‌లు ప్రస్తుతం కీలకంగా మారారు. వీరిద్దరూ కింగ్ మేకర్లు కావడంతో.. కేంద్రంలో 10 ఏళ్ల తర్వాత సంకీర్ణ రాజకీయాలు చూడనున్నాం. ఇక మెజార్టీ మార్కుకు కొద్ది దూరంలో ఆగిపోయిన ఇండియా కూటమి.. ఈసారి ప్రతిపక్షంలోనే ఉంటామని ప్రకటించింది. అయితే నితీష్ కుమార్‌కు ఇండియా కూటమి ప్రధానమంత్రి పదవిని ఆఫర్ చేసిందని.. జేడీయూ సీనియర్ నేత కేసీ త్యాగి సంచలన వ్యాఖ్యలు చేశారు.

కాంగ్రెస్‌ పార్టీ నేతృత్వంలోని ఇండియా కూటమి నుంచి జేడీయూ అధినేత, బీహార్‌ ముఖ్యమంత్రి నితీష్ కుమార్‌కు ప్రధానమంత్రి పదవి ఆఫర్‌ వచ్చినట్లు కేసీ త్యాగి తాజాగా వెల్లడించారు. అయితే ఇండియా నుంచి వచ్చిన ఆ ఆఫర్‌ను నితీష్ కుమార్ తిరస్కరించినట్లు కేసీ త్యాగి స్పష్టం చేశారు. ఈ మేరకు తాజాగా ఇచ్చిన ఓ ఇంటర్వ్యూలో ఈ విషయాన్ని తెలిపారు. నితీష్ కుమార్‌కు ఇండియా కూటమి నుంచి ప్రధాని పదవి ఆఫర్‌ వచ్చినా.. దాన్ని ఆయన తిరస్కరించారని చెప్పారు. ప్రస్తుతం జేడీయూ ఎన్డీఏ కూటమిలో ఉందని.. ఇలాంటి సమయంలో వెనుదిరిగి చూసే ప్రసక్తే లేదని జేడీయూ నేత కేసీ త్యాగి తేల్చి చెప్పారు.

ఈసారి లోక్‌సభ ఎన్నికల్లో బీజేపీకి భారీ షాక్‌ తగిలింది. గతంలో 2014 ఎన్నికల్లో 292.. ఆ తర్వాత 2019 లో 303 సీట్లను సొంతంగా సాధించిన బీజేపీ.. ఎన్డీఏలోని మిత్ర పక్షాల అవసరం లేకుండానే కేంద్రంలో అధికారాన్ని చేపట్టింది. అయితే ఈసారి మాత్రం.. లోక్‌సభలో అవసరమైన మేజిక్‌ ఫిగర్‌ 272 సీట్లను అందుకోలేక 240 స్థానాల వద్దే ఆగిపోయింది. ఇక మిత్రపక్షాలతో కలిసి ఎన్డీఏ కూటమి మొత్తంగా 292 స్థానాలను గెలుచుకుని.. మేజిక్ ఫిగర్ మార్కును దాటేసింది. దీంతో కేంద్రంలో బీజేపీ నేతృత్వంలో ప్రభుత్వాన్ని ఏర్పాటు చేయడంలో.. మూడోసారి ప్రధానిగా నరేంద్ర మోదీ గద్దెనెక్కాలన్నా.. కూటమిలో బీజేపీ తర్వాత అత్యధిక స్థానాలను కైవసం చేసుకున్న టీడీపీ, జేడీయూ పార్టీల మద్దతు ఇప్పుడు తప్పనిసరిగా మారింది.